Спорт псэуалъэхэм нэIуасэ зафишIыгъ
УФ-м спортымкIэ иминистрэу Олег Матыцинымрэ АР-м и ЛIышъхьэу КъумпIыл Муратрэ спорт псэуалъэу Мыекъуапэ дэтхэм ащыщхэм ащыIагъэх.
Адыгэ республикэ стадионэу 2008-рэ илъэсым къыщегъэжьагъэу 2017-рэм нэс гъэцэкIэжьын IофшIэнхэр зэрашIылIагъэхэм апэ кIуагъэх. ПстэумкIи а проектым сомэ миллион 925-рэ тефагъ. Ащ щыщэу сомэ миллион 645-р федеральнэ мылъкум къыхэхыгъ.
Стадионым тIысыпIэу иIэр нэбгырэ мин 14-м ехъумэ ателъытагъ, атлетикэ псынкIэм ищыкIэгъэ пстэур зыхэт комплекс щагъэпсыгъ, футбол ешIапIэр Европэм ишапхъэхэм адештэ. Ар Олег Матыциными къыхигъэщыгъ, псэуалъэр зэрагъэфедэрэм, спортсменхэм гъэхъагъэу яIэхэм къакIэупчIагъ.
АР-м и ЛIышъхьэ атлетикэ псынкIэмкIэ ыкIи футболымкIэ Урысые зэнэкъокъухэр мыщ мызэу, мытIоу зэрэщызэхащагъэхэр къыIуагъ. Ахэм анэмыкIэуи футболымкIэ республикэ командэу «Зэкъошныгъэм» иджэгунхэр щэкIох.
Нэужым щэрыонымкIэ спорт еджапIэу 2000-рэ илъэсым Сидней щыкIогъэ Олимпиадэм чемпион щыхъугъэ Сергей Алифиренкэм ыцIэ зыхьырэм щыIагъэх. Ар 2016-рэ илъэсым агъэуцугъ. Квадратнэ метрэ мин 17 хъурэ унэм ишIын ыкIи ищыкIагъэхэм ягъэпсын сомэ миллион 95-м ехъу пэIухьагъ. Ащ щыщэу сомэ миллион 85,8-р федеральнэ бюджетым къыхэхыгъ.
Олимпийскэ чемпионэу Сергей Алифиренкэм щэрыуапIэр къаригъэлъэгъугъ. Ащ къызэриIуагъэмкIэ, спорт Iофтхьабзэхэр щызэхэщэгъэнхэм ар фытегъэпсыхьагъ, ар къэзыушыхьатырэ сертификат иI, Урысыем спортымкIэ и Министерствэ иреестрэ хэт спорт псэуалъэхэм ахагъэхьагъ.
Комплексым зы уахътэм нэбгыри 100-мэ зыщагъэхьазырын алъэкIыщт. ЗэIухыгъэхэу, метрэ 50-м ыкIи 25-м ателъытагъэхэу щэрыопIитIу хэт, ятIонэрэ къатым «пневматическэ» зыфаIорэм фэдэу метри 10 ыкIи 25-мэ ателъытагъэхэр щыгъэпсыгъэх.
Спорт щэрыоным Адыгеим лъэшэу зэрэщыпылъхэр республикэм ипащэ къыкIигъэтхъыгъ. Спортсменэу езгъэжьэгъакIэхэмкIэ щысэтехыпIэх тичIыпIэгъухэу олимпийскэ чемпионэу Сергей Алифиренкэмрэ Паралимпийскэ чемпионэу Валерий Пономаренкэмрэ.
Министрэм псэуалъэм осэ ин къыфишIыгъ, спортсменэу Iофтхьабзэхэм ахэлажьэхэрэр зыщыпсэущтхэри комплексым къыдыхэлъытэгъэнхэм мэхьанэ зэриIэри къыкIигъэтхъыгъ. Медицинэм иамалхэр къызIэкIэгъэхьэгъошIу афэшIыгъэнхэр ары анахьэу къыхигъэщыгъэр.
— Гъэхъагъэхэр ашIынхэм имызакъоу, япсауныгъэ къыщымыкIэными спортсменхэмкIэ мэхьанэшхо иI. Арышъ, Iофтхьабзэхэм языфэгъэхьазырынкIэ амалышIухэр, япсауныгъэ изытет зэрэлъыплъэщтхэр къыдэлъытэгъэнхэ фае, — къыIуагъ министрэм.
АР-м и ЛIышъхьэ спортымкIэ шъолъыр гупчэ агъэпсын, инфраструктурэми нахь зырагъэушъомбгъун гухэлъ зэряIэр къыIуагъ.
АР-м и ЛIышъхьэ ипресс-къулыкъу.