Адыгеим мы Унэшхор къыщызэIуахыным ыпэкIэ УФ-м спортымкIэ иминистрэу Олег Матыцинымрэ АР-м и ЛIышъхьэу КъумпIыл Муратрэ зэIукIэгъу зэдыряIагъ.

Физкультурэмрэ спортымрэ республикэм зыщягъэушъомбгъугъэным епхыгъэ Iофхэм, лъэпкъ проектэу «Демографием» ипхырыщын пае атIупщыгъэ федеральнэ проектэу «Спортыр — щыIэныгъэм ишапхъ» зыфиIорэр гъэцэкIагъэ зэрэхъурэм лъэныкъуитIур зэдатегущыIагъ.

ЗэIукIэгъум Урысыем спортымкIэ и Министерствэ, Адыгеим игъэцэкIэкIо ыкIи хэбзэ­гъэуцу органхэм ялIыкIохэр хэ­лэжьагъэх.

Федеральнэ проектым къыщыдэлъытагъэу Адыгеим щыпхыращыхэрэм мымакIэу федэ къызэрахьырэр Олег Матыциным къыхигъэщыгъ. Ащ къызэриIуагъэмкIэ, спорт псэуалъэхэм ягъэуцун, инфраструктурэм игъэпсын алъэныкъокIэ пэрытныгъэр зыIыгъ субъектитфымэ республикэр ащыщ.

— Адыгеим спортым зызэрэщиушъомбгъурэм, гъэхъэ­гъэ инхэр щызышIыгъэ нэбгырабэ зэриIэм ямызакъоу, физкультурэм пылъыр нахьыбэ хъунми мымакIэу Iоф щыдашIэ Федеральнэ проектэу «Спортыр — щыIэныгъэм ишапхъ», къэралыгъо программэу «Физическэ культурэм ыкIи спортым хэхъоныгъэ ашIыныр» зыфиIохэрэм къащыдэлъытэгъэ пстэур гъэ­цэкIагъэ зэрэхъущтми тицыхьэ телъ. Зэпахырэ узэу дунаир зэлъызыкIугъэми лъэпкъ проектхэм япхырыщынкIэ иягъэ къызэрэмыкIуа­гъэр нафэ. Ащ пае лъэшэу республикэм ипащи, ащ ико­мандэ хэтхэми тызэрафэразэр къыхэзгъэщымэ сшIоигъу, — къыIуагъ Олег Матыциным.

АР-м и ЛIышъхьэ Iофхэм язытет министрэр щигъэгъуа­зэзэ, федеральнэ проектым къыщыдэлъытагъэу спорт комплекси 4 зэрэрагъэжьагъэр къы­­Iуагъ. Ахэр Адыгэкъалэ, Джэджэ, Кощхьэблэ ыкIи Шэуджэн районхэр ары зыщашIыхэрэр. Ахэм анэмыкIэу спорт площадкитIу агъэпсы, олимпиадэхэм зыщафагъэхьазырырэ еджапIэм пае оборудование ыкIи футбол ешIэпIитIумэ апае псэуалъэхэр къащэфыгъэх. КъэкIощт илъэсым Красногвардейскэ районым зы спорт комплексышхо ыкIи цIыкIоу щы щагъэуцун гухэлъ яI.

— ЦIыфэу республикэм щыпсэухэрэм, къуаджэм дэс­хэри зэрахэтхэу, спорт псэуа­лъэхэр къызIэкIэгъэхьэ­гъошIу афэшIыгъэныр пшъэ­рылъэу зыфэдгъэуцужьыгъ. Джащ фэдэу зипсауныгъэ пыч фэ­хъу­гъэхэми спортыр зэрящыкIагъэр зыщыдгъэгъупшэ­рэп. Ар мы уахътэм мыдэеу пхырыщыгъэ мэхъу, муниципалитет пэпчъ спортым епхыгъэ инфраструктурэр щытэгъэпсы. Адыгеим псэолъэ 941-у итым щыщэу 567-р къо­джэ псэупIэхэр ары зыщытшIыгъэхэр, — къыIуагъ КъумпIыл Мурат.

БлэкIыгъэ илъэсыр пштэмэ, республикэм щыпсэоу физкультурэм ыкIи спортым апылъыр процент 47-м шъхьарыкIыгъ, ГТО-м ишапхъэхэр зэрагъэцэкIэшъущтыр нэбгырэ мин 30 фэдизмэ аушэтыгъ.

— УФ-м и Президентэу Владимир Путиным цIыфхэм япсауныгъэ анахь шъхьаIэхэм зэращыщыр къыкIигъэтхъыгъ. Ары тиIофшIэн зытедгъэпсыкIырэри. Урысыем спортымкIэ и Министерствэ тиIэпыIэгъоу инфраструктурэм игъэпсын лъэшэу ыуж тихьагъ. БлэкIыгъэ илъэсым республикэ программэу «Развитие физической культуры и спорта» зыфиIорэм къыщыдэлъытагъэ­хэм ягъэцэкIэн сомэ миллион 840-рэ пэIухьагъ, мы илъэсымкIэ гъэнэфагъэр сомэ мил­лион 925-рэ мэхъу, — къы­Iуагъ АР-м и ЛIышъхьэ.