Коронавирусым зимыушъомбгъунымкIэ шъолъыр оперативнэ штабым зэхэсыгъоу иIагъэр Адыгэ Республикэм и ЛIышъхьэу КъумпIыл Мурат зэрищагъ.

Республикэм ипащэ Iофтхьабзэр къызэIуихызэ, зэпахырэ узым пэшIуекIогъэнымкIэ пшъэ­дэкIыжь зыхьырэ структурэхэм зэкIэми IофшIэным зэхъо­кIыныгъэ фашIын зэрэфаер хи­гъэунэфыкIыгъ.

— Эпидемиологическэ уплъэ­кIунхэм язэхэщэн зэрифэ­шъуа­шэу тыкъекIолIэным, зэпахырэ узым изиушъомбгъун къызще­жьэрэр гъэунэфыгъэным мэхьанэшхо иI. Ащ ишIуагъэкIэ коронавирусым пэшIуекIогъэным фытегъэпсыхьэгъэ шIуагъэ къэзытырэ унашъохэр тшIынхэ тлъэкIыщт, — къыIуагъ Къум­пIыл Мурат.

Роспотребнадзорым АдыгеимкIэ и ГъэIорышIапIэ ипащэу Сергей Завгороднем къызэри­IуагъэмкIэ, пандемиер къызе­жьагъэм щыублагъэу нэбгырэ мини 145,8-мэ тестхэр арагъэ­кIугъэх, зэпахырэ узыр къы­зыхагъэщыгъэр 3480-рэ мэхъу, нэбгырэ 2964-рэ хъужьыгъэ, 29-мэ ядунай ахъо­жьыгъ.

Адыгеим и ЛIышъхьэ зэри­лъытагъэмкIэ, коронавирусым зимыушъомбгъуным фытегъэ­псыхьэгъэ пэшIорыгъэшъ Iоф­тхьабзэхэр зэхащэхэ зыхъукIэ гъэсэныгъэм иучреждениехэм анахьэу анаIэ атырагъэтын фае. Непэрэ мафэм мыщ кIэлэ­еджакIохэр къякIолIэжьыгъэх, ащ къыхэкIыкIэ зэпахырэ узыр кIэлэцIыкIухэми, ахэм яунагъо­хэм арысхэми къапыхьан ылъэ­кIыщт.

— ЕджапIэхэм къякIолIэрэ пстэуми ятемпературэ шыгъэным, жьыр зыукъэбзырэ пкъыгъохэр ахэм ачIэтыным ыкIи обработкэ шIыгъэнхэм, гъэсэныгъэм иучреждениехэм ахэт пщэрыхьапIэхэм ясанитарнэ зытет шапхъэхэм адиштэным ренэу тылъыплъэн фае. Iофы­шIэхэм узэрэзекIощт шIыкIэр къагурыIоным мэхьанэшхо иI. ЕджэпIэ чIэхьэгъум дэжь са­нитарнэ фильтрэм иIоф­шIэн щызэтегъэуцогъэн фае, — къы­хигъэщыгъ Адыгеим и ЛIышъхьэ.

Джащ фэдэу республикэм ипащэ пшъэрылъ къыгъэуцугъ предприятиехэм, сатыушIыпIэ псэуалъэхэм ыкIи шхапIэхэм санитарнэ шапхъэхэр ащагъэгъэцэкIэнхэмкIэ уплъэкIун Iоф­тхьабзэу ащызэхащэхэрэм ахэ­гъэхъогъэнэу.

АР-м псауныгъэр къэухъумэгъэнымкIэ иминистрэу Мэрэ­тыкъо Рустем къызэриIуагъэмкIэ, республикэм имедицинэ учреждениехэм гриппым пэ­шIуекIорэ вакцинэ мин 60 (на­хьыжъхэм апае) къаIэкIэхьагъ, кIэлэцIыкIу вакцинэри атырагощэнэу рагъэжьагъ.

Врачхэм ыкIи кIэлэегъаджэ­хэм апэдэдэ вакцинэр ахэлъхьэгъэн зэрэфаер, ахэм япчъа­гъэ процент 90-м къыщыкIэ зэрэмыхъущтыр республикэм ипащэ хигъэунэфыкIыгъ. КъызэраIуагъэмкIэ, цIыфхэм япроцент 60-м ехъумэ вакцинэр ахалъхьащт.

— Илъэсныкъо фэдиз хъугъэу врачхэм гъэлъэшыгъэ шIыкIэм тетэу Iоф ашIэ, ахэм атегъэуагъэр джыри нахьыбэ тшIы хъущтэп. Гриппым ыкIи пэтхъу-Iутхъум замыушъом­бгъунымкIэ иммунизацием мэ­хьанэшхо иI, — къыIуагъ КъумпIыл Мурат.

Джащ фэдэу цIыфхэр жъу­гъэу зыхэлэжьэхэрэ Iофтхьа­бзэхэм, анахьэу джэгухэм, язэ­хэщэн пстэуми анаIэ тырагъэтын, шапхъэу щыIэхэр агъэ­цэкIэнхэ зэрэфаер зэхэсыгъом къыщаIуагъ.

АР-м и ЛIышъхьэ ипресс-къулыкъу