НыбжьыкIэхэр зэнэкъокъущтых
Фестивалэу «Российская студенческая весна» зыфиIорэр мыгъэ Iоныгъом и 5-м къыщегъэжьагъэу и 9-м нэс Ростов хэкум щыкIощт.
Ащ нэбгырэ мини 2-м ехъу хэлэжьэнэу агъэнафэ. Iофтхьабзэм икIэщакIохэр Урысыем иныбжьыкIэхэм я Союзрэ платформэу «Россия — страна возможностей» зыфиIорэмрэ.
Творческэ ыкIи сэнаущыгъэ зыхэлъ ныбжьыкIэхэу тикъэралыгъо ишъолъыр пстэуми къарыкIыщтхэм хэхъоныгъэ ашIынымкIэ IэпыIэгъу афэхъугъэныр Iофтхьабзэм ипшъэрылъ шъхьаI. Мы илъэсым фестивалым хэлэжьэщтхэр лъэныкъуи 9-кIэ зэнэкъокъущтых.
— Шъолъыр 70-мэ къарыкIыщт ныбжьыкIэ мини 2-р чIыпIэ зэнэкъокъухэм, интернет-проектэу «Студ.весна. Онлайн» зыфиIорэм текIоныгъэ къащыдэзыхыгъэхэр ары, — къеIуатэ мыкоммерческэ организациеу «Россия страна возможностей» зыфиIорэм игенеральнэ пащэу Алексей Комиссаровым. — Мы илъэсым фестивалым зэхъокIыныгъэхэр фэтшIыгъэх. Анахь шъхьаIэщтыр «Модэм» епхыгъэр ары. Зэнэкъокъу программэм къыдыхэлъытагъэу къагъэхьазырыгъэ шъуашэхэр фестивалым къыщагъэлъэгъощтых. Джащ фэдэу, музыкальнэ едзыгъор лъэныкъуитIоу зэтетыутыгъ: «ОрэдкъэIоныр» ыкIи «Музыкальнэ Iэмэ-псымэхэр».
НыбжьыкIэхэм зыкъызэрагъэлъэгъощтым уасэ фишIыщт лъэныкъо пстэуми хэшIыкI куу фызиIэ жюрим ыкIи едзыгъохэмкIэ къахьыгъэ баллхэр зэхагъэхъожьынхэшъ кIэуххэр къэнэфэщтых. Едзыгъо пэпчъ текIоныгъэр нэбгырэ зырызэу афагъэшъошэщт. Ащ дакIоу гранд-призерхэр къыхагъэщыщтых.
Жюрим нэбгырэ 40 хэтыщт: Урысыем итеатральнэ тын анахь лъапIэу «Золотая маска» зыфиIорэм илауреатэу, къэшъуакIохэр зыгъасэхэу Владимир Варнава, театрэмрэ киномрэ яактрисэу Анастасия Панинар, проектэу «Жъуагъохэм яфабрик» зыфиIорэм ипродюсерэу Владимир Коробка, музыкантэу Вахтанг, нэмыкIхэри.
Урысыем иныбжьыкIэхэм я Союзрэ Газпромбанкымрэ зэгъусэхэу творческэ ныбжьыкIэхэм агу къыдащэенэу ахъщэ шIухьафтын зэрылъ Iофтхьабзэ зэхащэщт. Анахь дэгъухэм сомэ мини 100, сомэ мин 50 ыкIи сомэ мин 30 атырагощэщт.
Фестивалэу «Российская студенческая весна» зыфиIорэм илъэс къэс Адыгеим илIыкIохэр хэлажьэх. Ау коронавирусым ыпкъ къикIыкIэ мыгъэ зы нэбгыр ныIэп тиреспубликэ икIыщтыр. «Студенческая весна» зыфиIорэ шъолъыр организацием икоординаторэу Анастасия Чудаковам къызэриIуагъэмкIэ, Адыгэ къэралыгъо университетым и МГГТК идизайнер ныбжьыкIэу Анна Горковенкэр фестивалым хэлэжьэщт. Лъэпкъ нэшанэхэр къызыхэщыхэрэ коллекциеу «Сокол ясный» зыфиIорэр фестивалым къыщигъэлъэгъощт. Мыщ хъулъфыгъэ шъоши 6 хэхьэ.
— БлэкIыгъэ илъэсым ичъэпыогъу мазэ испанскэ дизайнер агентствэм ипащэу Ольга Иф Адыгеим къызэкIом, дизайнер ныбжьыкIэу Анна Горковенкэм иколлекцие лъэшэу ыгу рихьи ынаIэ къытыридзагъ, — къыIуагъ Анастасия Чудаковам. — Ащ лъэпкъ нэшанэхэр къызэрэхэщыхэрэр, лъэныкъо зэфэшъхьафыбэ къызэлъиубытэу зэришIыгъэр къыхигъэщыгъ ыкIи Испанием ригъэблэгъагъ. Ау зэпахырэ узэу коронавирусыр къызежьэм пстэури къызэтеуцуагъ.
Адыгеим икIыщт дизайнер ныбжьыкIэр зэнэкъокъум къащыхэщынэу фэтэIо!
Iэшъынэ Сусан.