Чъэпыогъум и 1-м блэмыкIэу

Федеральнэ фэгъэкIотэнхэр зиIэ­хэм социальнэ фэIо-фашIэхэр къа­фагъэцэкIэщтхэмэ, хьауми ахэм ачIыпIэкIэ ахъщэ тын къафэкIощтмэ ежьхэм къыхахынэу амал яIэу щыт. Законым къызэрэщыдэлъытагъэмкIэ, ар чъэпыогъу мазэм и 1-м шIомы­кIэу къагъэнэфэн фае.

НахьыпэкIэ къыхихыгъахэу ыкIи ащ зэхъокIыныгъэ фишIын гухэлъ зимыIэхэр ПенсиехэмкIэ фондым екIолIэнхэ ищыкIагъэп, ау зэблэзыхъумэ зышIоигъохэм пIалъэм шIомыкIэу фондыр щагъэгъозэн фае. Ащ фэ­гъэхьыгъэ лъэIу тхылъыр МФЦ-м щыптыми хъущт, электроннэ шIыкIэри къызфэбгъэфедэни плъэкIыщт.

Джащ фэдэу лъэIу тхылъым итынкIэ интернетыр бгъэфедэн амал щыI. УФ-м ПенсиехэмкIэ ифонд инэкIубгъо: www. pfrf.ru, къэралыгъо фэIо-фашIэхэм япортал: www.gosuslugi.ru.

Социальнэ фэIо-фашIэхэр къызэрэзыIэкIэбгъэхьащт шIыкIэр илъэс къэс зэблэпхъун уфит. Ахэр къызэратыхэрэм ащыщых сэкъатныгъэ зиIэхэр, зэо-зэпэуцужьхэм яветеранхэр, радиацием иягъэ зэригъэкIыгъэхэр, нэмыкIыбэхэр.

ФэIо-фашIэхэм анахьэу ахъщэр нахьышIоу къыхэзыхыгъэхэм пенсием е мазэ къэс къатырэ ахъщэ тыным тегъэхъуагъэу къаратырэр илъэс къэс индексацие ашIы. Мэзэе мазэм къыщыублагъэу сомэ 1155-рэ чапычи 6-рэ хъугъэ.

Ащ щыщэу сомэ 889-рэ чапыч 66-р Iэзэгъу уцхэм, нэмыкIэу псауныгъэм изэтегъэуцожьын ищыкIэгъэ медицинэ пкъыгъохэм е гъомылапхъэхэм ателъытагъ, соми 137-рэ чапыч 63-р гъэпсэфыпIэ-IэзапIэм ипутевкэ, соми 127-м ехъур ащ зэрэкIощт мэшIоку гъо­гум е нэмыкIэу къалэхэр зэзыпхырэ маршрутым тет транспортым ыпкIэ апай. Адыгеим щыпсэоу ащ фэдэ социальнэ фэIо-фашIэхэр къызтефэхэрэр нэбгырэ 41000-м ехъу.

Телефоныр жъугъэфедэзэ

Зэрэдунаеу зэлъызыкIугъэ вирусыр джыри зэкIэкIожьыгъэп. Ащ фэшI, илыягъэу цIыфхэм шъуахэмыхьэу, мо­бильнэ приложениер жъугъэфедэн амал зэрэщыIэр УФ-м ПенсиехэмкIэ ифонд и Къутамэу АР-м щыIэм джы­ри зэ шъугу къегъэкIыжьы.

Мы приложениемкIэ унэе лицевой счетым, ны мылъкум язытет, пенсиеу е нэмыкI ахъщэ тынэу агъэнэфагъэр зыфэдизыр зэбгъэшIэнхэ плъэкIыщт. Джащ фэдэу ПенсиехэмкIэ фондым упчIэу фыуиIэр фэбгъэзэн уфит, тхылъ горэ уищыкIагъэми, цIыфхэр езгъэблагъэрэ къулыкъум Iоф зэришIэрэ графикым зыщыбгъэгъуазэ пшIоигъоми IэпыIэгъу къыпфэхъущт.

Фондым иприложение зэрэбгъэфедэщтым ыпкIэ птын ищыкIагъэп, Android ыкIи iOS зыфиIорэ платформэхэм ащыбгъэпсын плъэкIыщт. Ащ уихьаным пае тамыгъиплI хъурэ кодыр иптхэнышъ, авторизацие пшIын фае. Нэужыми а кодыр иптхэзэ приложениер бгъэфедэщт.

ПIалъэр лъагъэкIотагъ

Федеральнэ хэбзэгъэуцугъэу «О на­циональной платежной си­с­те­ме» зыфиIорэм къызэрэ­щы­дэ­­­лъы­тагъэмкIэ, пенсиер бан­кым къызIэ­кIигъахьэхэрэм чъэ­пы­огъу мазэу къа­кIорэм и1-м къыщыублагъэу картэу «МИР» зы­­фиIорэр ары яахъщэ къы­зэры­хьащтыр.

Почтэм е нэмыкI организациеу пенсиехэр аIэкIэз­гъахьэхэрэм къызфихьыхэрэм мы шапхъэр анэсырэп.

Пенсионерхэм ащыщыбэхэм «МИР»-р агъэфедэ, арэу щытми, ыгъэпсынэу зигъо имыфагъэхэр джыри щыIэх. Ахэм чъэпыогъум и 1-м нэс пIалъэ яI, нэмыкI картэу аIэкIэлъым пенсиер къэкIощт.

Нахьыпэрэм фэдэу, пенсиер къызэрэIэкIэхьащт шIыкIэр шъхьадж зэрэфаеу къыхихыни, къыхихыгъэр зэблихъужьыни фит. Ащ пае лъэIу тхылъыр ПенсиехэмкIэ фондым ичIыпIэ органэу зыпэблагъэм е МФЦ-м ащитын ылъэкIыщт, интернетыр ыгъэфедэми хъущт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу