Къэралыгъо автоинспекцием къеты
Щынэгъончъэ гъогухэр ярэIэх!
Iоныгъом и 1-м Адыгеим иеджапIэхэм яIухьэгъухэм гъогурыкIоныр ащыщынэгъончъэным инспекторхэм анаIэ тырагъэтыгъ.
ИлъэсыкIэ еджэгъур зэрэрагъэжьэжьыгъэмкIэ ыкIи щынэгъончъэ гъогухэр яIэнхэу полицейскэхэр кIэлэеджакIохэм афэлъэIуагъэх.
Мы мафэм полицейскэ нэбгыри 100-м ехъурэмэ гъэсэныгъэм иучреждениехэм къулыкъур ащахьыгъ. ЛъэсрыкIохэр зэхэтхэу зыщызэпырыкIыхэрэ, машинабэ зыщызекIорэ чIыпIэхэм анахьэу анаIэ тырагъэтыгъ.
ЕджакIохэм ащыщхэм щынэгъончъэным ишапхъэхэм афэгъэхьыгъэу, ны-тыхэм язекIуакIэ ныбжьыкIэхэмкIэ щысэшIу хъунэу зэдэгущыIэгъухэр адашIыгъэх.
МэфэкIымкIэ афэгушIуагъэх
ШIэныгъэм и Мафэ тефэу зипсауныгъэ зэщыкъогъэ кIэлэцIыкIухэр зыщаIыгъхэ еджэпIэ-интернатым Адыгеим и Къэралыгъо автоинспекторхэр щыIагъэх.
Адыгэ Республикэм и ГИБДД ихэушъхьафыкIыгъэ батальон икомандирэу Едыдж Мурат еджэпIэ-интернатым чIэс кIэлэцIыкIухэм заIуигъэкIагъ, илъэсыкIэ еджэгъур зэрэрагъэжьэжьыгъэмкIэ афэгушIуагъ, щынэгъончъэу гъогум зэрэщызекIонхэ фаер агу къыгъэкIыжьыгъ.
Джащ фэдэу еджапIэм къызыIуащэхэкIэ гъогу зэпырыкIыпIэм нахь щысакъынхэм, нэфынэр къэзытырэ пкъыгъохэр агъэфедэнхэм Едыдж Мурат анаIэ тыраригъэдзагъ. ШIэныгъэ куухэр зэрагъэгъотынхэу, гъогурыкIоным ишапхъэхэр агъэцэкIэнхэу ар афэлъэ- Iуагъ. ШIухьафтын цIыкIухэмкIэ еджакIохэр ыгъэгушIуагъэх.
Лъэпкъ проектым къыдыхэлъытагъэу
Лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэм иедзыгъо шъхьаIэхэм ащыщ гъогурыкIоныр зэрэзэхэщагъэм ыкIи ащ епхыгъэ шапхъэхэр зэрагъэцакIэхэрэм автоматикэ шIыкIэм тетэу лъыплъэгъэнымкIэ технологиякIэхэр гъэпсыгъэнхэр.
Адыгеим а Iофым изы Iахь щырагъэжьагъ, гъогурыкIоным ишапхъэхэр зэраукъуагъэр къыхэзгъэщыхэрэ сурэт ыкIи видео тезыхырэ комплексыкIэхэр агъэпсых.
Лъэпкъ проектым къыдыхэлъытагъэу, 2024-рэ илъэсым ехъулIэу хэбзэукъоныгъэхэр къыхэгъэщыгъэнхэмкIэ автоматикэ шIыкIэм тетэу Iоф зышIэрэ камерэ 99-м нахь мымакIэу ыкIи хьылъэзещэ автомобильхэр зыщауплъэкIурэ пункти 6-рэ Адыгеим щагъэпсынхэу агъэнафэ.
2020-рэ илъэсым мы Iофым пэIуагъэхьанэу сомэ миллиони 146-рэ къатIупщыгъ, ащ ишIуагъэкIэ камерэ 52-рэ агъэуцущт.
Авариехэр нахьыбэу зыщыхъурэ щынэгъо чIыпIэхэу Къэралыгъо автоинспекцием къыгъэнэфагъэхэм ахэр атырагъэуцощтых.
ЗэIукIэгъухэр адыряIагъэх
КIэлэцIыкIухэм яилъэсыкIэ еджэгъу рамыгъэжьэжьызэ, автоинспекторхэм ны-тыхэм ыкIи кIэлэегъаджэхэм зэIукIэгъухэр адыряIагъэх. Iофыгъо шъхьаIэу зытегущыIагъэхэм ащыщ щынэгъончъэ гъогухэмкIэ еджапIэм ныбжьыкIэхэр зэрэращэлIэщтхэр.
ЗэдэгущыIэгъур окIофэ гъогурыкIоным ишапхъэхэр кIэлэцIыкIухэм дэгъоу арагъэшIэнхэмкIэ ны-тыхэр полицейскэхэм къакъоуцонхэу араIуагъ. ШIокI имыIэу ар загъэцакIэкIэ сабыйхэм ящынэгъончъагъэ ухъумагъэ хъущт.
Джащ фэдэу апэрэ мазэхэм щынэгъончъэ гъогухэр ны-тыхэм къыхахыхэзэ, кIэлэцIыкIухэр еджапIэм ащэхэмэ нахь тэрэзэу полицейскэхэм алъытагъ. ХэушъхьафыкIыгъэ ныбалъэхэр, тIысыпIэхэр, щынэгъончъэ бгырыпхыр зэрагъэфедэнхэ фаер агу къагъэкIыжьыгъ.
Гъэсэныгъэм иучреждениехэм автомобилькIэ аIухьэхэ зыхъукIэ сакъыныгъэ къызхагъэфэнэу инспекторхэр къяджагъэх.
Тазырыр зэратыжьын алъэкIыщт шIыкIэр
Автомобилыр зезыфэхэрэм гъогурыкIоным ишапхъэхэр зэраукъуагъэмкIэ тазырэу къатыралъхьагъэр зэратыжьыщт шIыкIэм фэгъэхьыгъэу Адыгеим и Къэралыгъо автоинспекцие макъэ къегъэIу.
Административнэ тазыр водителым зэрэтыралъхьагъэм епхыгъэ унашъо зэрашIыгъэм икъэбар игъом къалъыIэсыным фэшI къэралыгъо фэIо-фашIэхэм я ЗыкI портал www.gosuslugi.ru зыфиIорэм зыщатхымэ нахьышIу.
Едзыгъоу «Уведомления о штрафах» зыфиIорэм хэхьанхэшъ, sms-хэр къаIэкIэхьанхэр къыхахыщт. Ащ ыпкIэ хэлъэп.
Къэралыгъо ыкIи муниципальнэ ахъщэ тынхэм я Къэралыгъо къэбар системэ тазырым фэгъэхьыгъэр къызэрихьагъэм тетэу а фэIо-фашIэм кIэтхагъэм sms-кIэ макъэ къырагъэIущт.
Джащ фэдэу транспортым игъэзекIонкIэ нэмыкI пшъэдэкIыжьхэм афэгъэхьыгъэ къэбар Къэралыгъо автоинспекцием иофициальнэ нэкIубгъоу www.gibdd.ru зыфиIорэм ижъугъотэщт.
ЦIыфым тазыр къызэрэтыралъхьагъэм икъэбар игъом къызыIэкIахьэкIэ, мэфэ 20-м къыкIоцI ащ ызыныкъу ытыжьыщтыр.
ГъогурыкIоным ишапхъэхэр зэраукъуагъэхэм епхыгъэ административнэ тазырхэр почтэм ыкIи банкхэм, къэралыгъо ыкIи муниципальнэ фэIо-фашIэхэм я ЗыкI портал яамалкIэ атынхэ алъэкIыщт.
НэкIубгъор зыгъэхьазырыгъэр Iэшъынэ Сусан.