Адыгэ Республикэм и ЛIышъхьэу КъумпIыл Мурат тыгъуасэ зэхищэ­гъэ зэхэсыгъом шъолъырым ит еджапIэхэм ачIэсхэм шхын стыр аIэкIэ­гъэ­хьэгъэным иIофыгъо щытегущыIагъэх.

Урысые Федерацием и Президент иунашъокIэ Iоныгъом и 1-м къыщыублагъэу ублэпIэ классхэм ащеджэрэ кIэлэеджа­кIохэм ыпкIэ хэмылъэу шхын стыр аIэкIагъахьэ. Ащ дакIоу гъот макIэ ыкIи сабыибэ зэрыс унагъохэм къарыкIыгъэхэми, зянэ-зятэ зимыIэжьхэми, фэ­гъэкIотэныгъэ зиIэ кIэлэеджа­кIохэми мы лъэныкъомкIэ анаIэ атырагъэтын, агъэшхэнхэ фае.

Республикэм ипащэ къызэри­IуагъэмкIэ, илъэсыкIэ еджэгъур зырагъэжьэжьыгъэм щыублагъэу фэгъэкIотэныгъэ зиIэ кIэлэцIыкIухэр еджапIэхэм зэ­ращамы­гъашхэхэрэм къыхэкIэу ны-ты­хэм пчъагъэрэ зыкъыфагъэзагъ.

— Уф-м и Президентэу Владимир Путиным пшъэрылъ къыгъэуцугъ ублэпIэ классхэм аще­джэхэрэм ыпкIэ хэмылъэу шхын стыр аIэкIэдгъэхьанэу, ар зэрифэшъуашэу гъэцэкIагъэ хъугъэ. Ау социальнэу мыухъумэгъэ купхэм ахэхьэрэ кIэлэцIыкIухэри зыщыдгъэгъупшэхэ хъущтэп, илъэс заулэ хъугъэу ыпкIэ амы­тэу ахэр тэгъашхэх. Арышъ, апэрэхэми, ятIонэрэхэми шэп­хъэшIухэм адиштэрэ шхын алъы­Iэсын фае. Мы IофшIэнымкIэ хэукъоныгъэ щыIэ хъущтэп, — къыхигъэщыгъ КъумпIыл Мурат.

Адыгеим ивице-премьерэу Наталья Широковам къызэриIуа­гъэмкIэ, Урысыем и Президент ипшъэрылъ проценти 100-кIэ гъэцэкIагъэ хъугъэ — ублэпIэ классхэм арысхэм зэкIэми шхын стыр араты, зэкIэмкIи ахэм япчъагъэ мин 24,8-рэ мэхъу. Мыщ пэIухьащт сомэ миллиони 106-р федеральнэ ыкIи респуб­ликэ бюджетхэм къахэхыгъ.

Ащ нэмыкIэу фэгъэкIотэныгъэ зиIэ кIэлэцIыкIу мини 10 фэдиз республикэм щэпсэу. Ахэм ягъэ­шхэн пэIухьащт мылъкур муни­ци­пальнэ бюджетхэм къадыхэ­лъы­тагъэу щытыгъ, ау шхын стырым ыуасэкIэ шапхъэу щыIэм зэхъо­кIыныгъэ зэрэфэхъугъэм къы­хэкIэу ахъщэм щыкIагъэх. Ащ иягъэкIэ, илъэсыкIэ еджэгъур зырагъэжьэжьым, фэ­гъэкIотэныгъэ зиIэ кIэлэеджа­кIохэм ягъэшхэнкIэ гъэсэныгъэм иучреждениехэр гумэкIыгъо хэ­фагъэх.

Зэхэсыгъом хэлэжьагъэхэм мыщ епхыгъэ предложение гъэ­нэфагъэхэр къахьыгъэх, ыпшъэ­кIэ зигугъу къэтшIыгъэ купым хахьэхэрэм шхын стыр аIэкIэгъэ­хьэгъэным тефэщт ахъщэр субсидие шIыкIэм тетэу къэралыгъо программэм къыдыхалъытэныр игъоу алъэгъугъ.

Республикэм ипащэ мы лъэныкъом фэгъэзэгъэ вице-премь­ерымрэ АР-м гъэсэныгъэмрэ шIэныгъэмрэкIэ и Министерст­вэрэ пшъэрылъ къафишIыгъ Iофыгъор охътэ кIэкIым зэшIуа­хынэу, хэкIыпIэ къагъотынэу.

— Профильнэ Министерствэм­рэ муниципалитетхэмрэ яIо зэ­хэлъэу мы Iофыгъом изэшIохын къекIолIэнхэ, акIуачIэ рахьылIэн фае. Социальнэу мыухъумэгъэ унагъохэм къарыкIырэ сабыйхэм тынаIэ атедгъэтын, ащ да­кIоу пан­демием илъэхъан ахэм яха­хъо нахь макIэ зэрэхъугъэри къы­дэтлъытэн фае. КIэлэеджакIо­хэр зэрагъашхэрэм сэ сшъхьэ­кIэ сылъэплъэ, — къышIыгъ зэ­фэ­хьысыжьхэр республикэм ипащэ.

АР-м и ЛIышъхьэ ипресс-къулыкъу.