«Роспотребнадзорым» Адыгэ РеспубликэмкIэ и ГъэIорышIапIэ Iоныгъом и 4-м пресс-зэIукIэ щыкIуагъ. Iофыгъо шъхьаIэу ащ зыщытегущыIагъэхэр гриппым пэуцужьырэ вакцинэр цIыфхэм ахэлъхьэгъэныр ары.

Ащ хэлэжьагъэх Адыгэ Рес­публикэм псауныгъэр къэухъу­мэгъэнымкIэ иминистрэу Мэ­рэтыкъо Рустем, ыпшъэкIэ зигугъу къэтшIыгъэ ведомствэм ипащэу Сергей Завгороднер, «Росздравнадзорым» респуб­ликэмкIэ икъутамэ ипащэу Шы­мыгъэхъу Айтэч, журналистхэр.

Сергей Завгороднем Iоф­тхьабзэр пэублэ псалъэкIэ къы­зэIуихыгъ.

— Непэ тыди анахь Iофыгъо шъхьаIэу щытыр коронавирусым зимыушъомбгъуныр ары, — къы­Iуагъ ГъэIорышIапIэм ипащэ. — Ащ дакIоу бжыхьэ-кIымэфэ лъэхъа­ным щынагъоу къэуцухэ­рэм ащыщ гриппымрэ пэтхъу-Iут­хъум­рэ. Мары Iоныгъом и 1-м кIэлэеджэкIо нэбгырэ мини 6 фэдизыр еджапIэхэм къякIо­лIэ­жьыгъэх. Ащ фэдизрэ уахътэм емыджэу щысыгъэхэм ­зэпахырэ уз гъэнэфагъэхэр яIэхэу къы­чIэкIын ылъэкIыщт. Арышъ, ны-­тыхэм зафэтэгъазэ тхьамэфитIу-щым къыкIоцI анаIэ атырагъэтынэу, унэм къимыкIы­хэзэ температурэ яIэмэ ауплъэ­кIун­хэу, ашъхьэ узэу, япсау­ныгъэ изытет ыгъэгумэкIыхэу къа­Iомэ, еджапIэм амыгъэкIонхэу.

Пресс-зэIукIэм Iофыгъо шъхьа­Iэу къыщаIэтыгъэр гриппым пэшIуекIорэ вакцинэр цIыфхэм ахэлъхьэгъэныр ары. Вакцинэм епхыгъэ упчIабэхэр непэ къэуцух — ищыкIагъа ар ябгъэшIы­нэу, изытет идэгъугъэ, псауныгъэмкIэ щынагъо къыхэкIэу щытмэ, нэмыкIхэри.

А упчIэхэм игъэкIотыгъэ джэуапхэр къаритыжьыгъэх министрэм.

— Илъэс къэс мы Iофыгъом игугъу тэшIы ыкIи амалэу щы­IэмкIэ нахь нэбгырабэмэ зэрахэтлъхьащтым ыуж тит, — къыIуагъ Мэрэтыкъо Рустем. — Ыпэрэ илъэсхэм республикэм щыпсэухэрэм япроцент 42-р ары ныIэп прививкэ тшIыщтыгъэр. Ау мыгъэ Iофыр нахь къэзгъэхьылъэхэрэм коронавирусыр къахэхъуагъ. Сыда пIомэ ар къызэузырэм джыри гриппыр къызеутэкIыкIэ фэукIочIыщтэп, идунай ыхъожьыным ищынагъо къэуцу. Арышъ, мы мафэхэм анахьэу тынаIэ зытедгъэтын фаер гриппым пэуцужьырэ вак­цинэм нахьыбэу цIыфхэр къызэлъедгъэубытынхэр ары. Мы Iофтхьабзэм хахьэу Iоныгъом къыщегъэжьагъэу цIыфхэм япроцент 60-мэ (нэбгырэ мин 281-мэ), узыр къяолIэнымкIэ щынагъо зышъхьащытхэм япроцент 75-мэ вакцинэр ахэтлъхьанэу тэгъэнафэ.

Гриппым пэшIуекIорэ вакцинэу мыгъэ къыдагъэкIыгъэр аушэтыгъэу щыт, уз хьылъэ къыхэкIынэу тлъытэрэп. Вакцинэм цIыфым ииммунитет ыгъэпытэщт, ащ ишIуагъэ къэмыкIощтмэ, зыпари зэрар къы­хьыщтэп. КъэIогъэн фае, практикэм къызэригъэлъагъорэмкIэ, вакцинэм зыпари зэримылIыкIыгъэр, ау, гриппыр зыхэужъы­ныхьэкIэ, цIыфыр ащ илIыкIын ылъэкIыщт. ЕгъэзыгъэкIэ вакцинэр зыми халъхьащтэп, ау къагурыIоу нахьыбэмэ ахатлъхьэмэ бэкIэ нахь дэгъу. ШIокI имыIэу вакцинэр апэу зыхэтлъхьащтхэм ащыщых медицинэм иIофышIэхэр, кIэлэегъаджэхэр, зыныбжь хэкIотагъэхэр ыкIи хэужъынахьыгъэ уз зиIэхэр.

Мэрэтыкъо Рустем къызэри­IуагъэмкIэ, цIыфым ииммунитет коронавирусым есэным пае, зэкIэмкIи процент 60-м кIахьэу сымэджэнхэ фае. Мыщ дэжьым министрэм къыкIигъэтхъыгъ уз щынагъор къыхэгъэщыгъэным, гъэхъужьыгъэным ыкIи ащ пэуцужьыгъэным тиврачхэр зэрэ­фэхьазырхэр. Адрэ зэпахырэ узхэм афэдэу мэкIэ-макIэу цIы­фым ииммунитет мыщ есэщт ыкIи нахь псынкIэ къыфэ­хъущт. Ау мы мафэхэм ащ джыри тыкъыфэкIуагъэп, ащ уахътэ ищыкIагъ. Гукъау нахь мышIэми, бэхэр егъэсымаджэх, цIыфхэм ядунай ахъожьы.

ГущыIэр лъигъэкIотагъ Шы­мы­гъэхъу Айтэч. Тикъэралыгъо къы­щашIыгъэ вакцинэу къаIэ­кIэхьагъэхэм язытет зэрэдэ­гъур, ахэр псауныгъэр къэухъумэ­гъэнымкIэ Дунэе организацием зэриуплъэкIугъэхэр ипсалъэ къы­щыхигъэщыгъ. IэкIыб къэралыгъохэм къащыдагъэкIыхэрэр нахь къыхэзыххэрэ цIыфхэр щыIэх, ар шъхьадж зэрэшIоигъу, ау Урысыем къыщашIыгъэхэм уицыхьэ ателъынэу зэрэщытыр «Росздравнадзорым» икъутамэ ипащэ хигъэунэфыкIыгъ.

Гриппым пэшIуекIорэ вакцинэр зыхябгъэлъхьаным пае шъхьадж зэпхыгъэ поликлини­кэм зыфигъэзэн ылъэкIыщт. Псауныгъэр къэухъумэгъэнымкIэ министрэм къызэриIуагъэмкIэ, медицинэ учреждениехэу мы Iофым фэгъэзагъэхэр икъу фэдизэу ащ фэхьазырых. Зэхэт купхэу лъэIу къэзытыхэрэм яIоф­шIапIэ, нэжъ-Iужъхэу зе­мыкIошъухэрэм яунэхэм кIохэзэ ахалъхьащт.

Мы Iофыр Iэпэдэлэл амы­шIы­нэу, вакцинэр зыхарагъэлъхьа­нэу Iофтхьабзэм хэлэжьагъэхэр къыфэджагъэх. Джащ фэдэу, анаIэ зытырарагъэдзагъэхэм ащыщ режимым тытекIы зэрэмыхъущтыр. Маскэр тIумылъэу, шапхъэу щыIэхэр тымыгъэца­кIэхэ зыхъукIэ, бэдэдэ къэсы­мэджэн ылъэкIыщт. Ащ фэдэ зыхъурэм, джыри IофшIапIэхэр зэфашIыщтых, цIыфхэр агъэтIысыщтых. Арышъ, тызфэжъугъэсакъыжь.

Iэшъынэ Сусан. Сурэтхэр Iэшъынэ Аслъан тырихыгъэх.