Iоныгъом и 6-м мыл Унэшхо Мыекъуапэ къы­щы­зэIуахынэу щыт.

Аужырэ илъэсхэм Адыгэ Рес­публикэм икъэлэ шъхьаIэ ста­дионэу, спорт Унэшхоу, кIэлэ­цIыкIу джэгупIэу щашIыгъэмэ япчъагъи, ягъэпсыкIи тагъэгушIо.

Стадионэу «Зэкъошныгъэм» фэдэ зимыIэ командэхэр Урысыем изэнэкъокъу хэлажьэх. Футбол клубэу «Тамбовыр» икъа­лэ щешIэн ылъэкIырэп. Апшъэрэ купым хэтэу Саранскэ е нэмыкI къалэхэм изэIукIэгъухэр ащэкIох.

Спорт Унэшхоу «Ошъутенэр» шэпхъэ лъагэхэм адештэ. Кобл Якъубэ ыцIэ зыхьырэ спорт Унэ­шхом хэгъэгум изэнэкъокъухэр щызэхащэх. Мэшэлахь, тиспорт псэуалъэхэр ятеплъэкIи дахэх.

Мыл Унэшхор Мыекъуапэ иура­мэу Степноим тет. Спорт псэуа­лъэр лъэгъупхъэ, «Ошъутенэм» къыпэгъунэгъу. Жьыр а лъэныкъом щыкъабз, псауныгъэр зыщагъэпытэрэ спорт псэуалъэхэр щагум къыщызэIуахыгъэх.

Хоккеир, лъэрычъэхэр, псауныгъэр…

Унэшхом хоккей щешIэнхэ, лъэрычъэхэм атетхэу искусствэм хэхьэрэ спорт лъэпкъхэр къыщагъэлъэгъонхэ, зэнэкъокъу­хэр щызэхащэнхэ алъэкIыщт. Физкультурэм пылъыхэм япсауныгъэ щагъэпытэщт, языгъэпсэфыгъо уахътэ гум ри­хьэу щагъэ­кIощт.

Мыекъуапэ Урысыем и Къыблэ шъолъыр хэхьэрэ къалэхэм ащыщ. Арэу щытми, кIымэфэ спорт лъэпкъхэмкIэ зэIукIэгъухэр щызэхащэнхэм фэхьазыр хъугъэ. Мыл Унэшхом тIысыпIэхэр иIэх, нэбгыри 100 заулэ чIэфэщт.

Iоныгъом и 6-м Унэшхор игъэ­кIотыгъэу къызэIуахынэу зэхэщакIохэм загъэхьазыры. Урысыем и Правительствэ икъулыкъу­шIэхэр, хэгъэгум хоккеимкIэ и Федерацие ипащэу, спортсмен цIэрыIоу Владислав Третьяк, нэмыкIхэри къырагъэблэгъагъэх. Адыгеим ипащэхэр, спортым иIофышIэхэр зэхахьэм хэлэжьэщтых.

Сурэтым итыр: Мыл Унэшхом итеплъ.