Лъэпкъ проектэу «Щынэгъончъэ ыкIи шэпхъэшIухэм адиштэрэ авто­мобиль гъогухэр» зыфиIорэм хахьэу 2020-рэ илъэсым телъытэгъэ гъэцэкIэжьын IофшIэнхэр ипIалъэм къыпэу аухыгъэх. Мыщ фэгъэхьыгъэу джырэ­благъэ «Адыгеяавтодорым» пресс-конференцие щыкIуагъ. Iофтхьабзэм хэлэжьагъэх гъогу хъызмэтым иIофышIэхэр ыкIи журналистхэр.

«Адыгеяавтодорым» ипащэу Алексей Корешкиным къызэри­IуагъэмкIэ, лъэпкъ проектым игъэцэкIэнкIэ 2020-рэ илъэсым федеральнэ ыкIи республикэ бюджетхэм сомэ миллион 491,5-рэ къатIупщыгъ. Шъолъыр автомобиль гъогухэм ягъэцэ­кIэжьын зэкIэмкIи сомэ мил­лион 219,5-рэ пэIуагъэхьагъ.

МыекъуапэкIэ километри 10 зэрылъ гъогу Iахьхэм гъэцэ­кIэжьын IофшIэнхэр ащыкIуа­гъэх. Ахэм нэфрыгъозэ пкъыгъуи 5 ащагъэуцугъэх, 4-р кIэхэмкIэ зэблахъугъэх. Поселкэу Яблоновскэм иурамхэу Пушкиным ыцIэ зыхьырэмрэ Заводскоимрэ яавтомобиль гъогухэм асфальтэу ателъыгъэр зэблахъугъ. Ащ нэмыкIэу рес­публикэм икъоджэ псэупIэ 22-мэ ягъогу Iахь 30 агъэцэкIэ­жьыгъ.

«Адыгеяавтодорым» ипащэ къызэриIуагъэмкIэ, лъэпкъ проектым хахьэу IофшIэнымкIэ шэпхъакIэхэр агъэфедагъэх. IофшIэнэу агъэцэкIагъэхэм ядэгъугъэ къэзыушыхьатырэ уплъэкIунхэр ашIых. Лъэпкъ проектым пшъэрылъэу иIэр шэпхъэшIухэм адиштэу гъогухэр зэтегъэпсыхьэгъэн къодыер арэп, автомобильхэр на­хьыбэу зыщызечъэхэрэ гъо-гухэр щынэгъончъэнхэр ыкIи авариехэр къащымыхъунхэм фытегъэпсыхьэгъэнхэр ары. Мыщ­кIэ республикэм къэгъэ­лъэгъонышIухэм къазэрэфэкIуа­гъэхэр нафэ.

Адыгеим и Къэралыгъо автоинспекцие изэфэхьысыжьхэм къызэрагъэлъэгъуагъэмкIэ, мы аужырэ илъэситIум къыкIоцI шъолъыр мэхьанэ зиIэ автомобиль гъогухэм аварийнэ щынагъоу щыт участкэхэм япчъагъэ фэдитIукIэ нахь макIэ хъугъэ. Джащ фэдэу видеолъыплъэн пкъыгъоу агъэуцугъэхэми яшIуагъэ къэкIуа-гъэу плъытэн плъэкIыщт. Мы илъэсым ыкIэхэм нэс зэкIэмкIи мыщ фэдэ пкъыгъуи 100-м ехъу агъэуцун гухэлъ яI. 2024-рэ илъэсым ехъулIэу лъэпкъ проектым хахьэу ахэм япчъагъэ фэдитIукIэ нахьыбэ хъущт.

КIАРЭ Фатим.