2020 — 2021-рэ илъэсыкIэ еджэгъур Iоныгъом и 1-м зэрэхэгъэгоу щырагъэжьэжьыгъ. Адыгеим иеджапIэхэм кIэлэеджэкIо 56622-рэ къякIолIэжьыгъ, ахэм ащыщэу 6150-рэр апэрэ классым ихьагъэх.Адыгэ Республикэм гъэсэ­ны­гъэмрэ шIэныгъэмрэкIэ и Министерствэ къызэритыгъэмкIэ, еджапIэхэр зэкIэри илъэсыкIэ еджэгъум фэхьазырхэу пэгъо­кIыгъэх. Роспотребнадзорым къыгъэуцугъэ шапхъэхэм атетэу ахэр зэтырагъэпсыхьагъэх.

Мыекъуапэ иеджапIэхэр пштэ­мэ, Iоныгъом и 1-м нэ-бгырэ мини 2 фэдизыр апэрэ классым къэкIуагъэх. Ахэм зэпстэуми еджэнымкIэ Iэмэ-­псымэхэр зыдэлъ Iалъмэкъхэр Адыгеим и ЛIышъхьэ ишIу­хьафтынэу аратыгъэх.

ШIэныгъэм и Мафэ епхыгъэ мэфэкI зэхахьэхэр игъэкIотыгъэу еджапIэхэм ащызэхаща­гъэхэп. Ащ хэлэжьагъэхэр а 1-рэ, я 9-рэ, я 11-рэ классхэр ары. Адрэ классхэм Iоныгъом и 2-м къыщегъэжьагъэу шэпхъэ гъэнэфагъэхэм атетхэу еджэныр аублэжьыщт.

Мыекъопэ администрацием гъэсэныгъэмкIэ и Комитет къы­зэритыгъэмкIэ, тикъэлэ шъхьаIэ иеджапIэхэм я 9-рэ классхэм нэбгырэ 1557-рэ ыкIи я 11-рэ классхэм еджэкIо 706-рэ къякIолIэжьыгъэх.

Хэгъэгу зэошхом ТекIоныгъэр къызыщыдахыгъэр илъэс 75-рэ зэрэхъугъэм фэгъэхьыгъэ Урысые урокэу «Помнить —значит знать» зыфиIорэмкIэ илъэсыкIэ еджэгъур зэкIэ гъэсэныгъэм иучреждениехэм къащызэIуахыгъ. Урысые Федерацием просвещениемкIэ и Министерствэ социальнэ хъытыоу «ВКонтакт» зыфиIорэм официальнэ нэкIубгъоу щыриIэм онлайн-сыхьатыр къыща­гъэлъэгъуагъ.

Iэшъынэ Сусан.