Унэм нэбгырэ пчъагъэу исым зэхъокIыныгъэ фэхъугъэмэ ащ шъолъыр операторыр щыжъугъэгъозэн фаеу зэрэщытыр джыри зэ шъугу къэ­тэгъэкIыжьы. Адыгеим пыдзэфэ пытэхэр зэрэIуащыхэрэм ыуасэ унэм исым ипчъагъэ елъытыгъэу щагъэнафэ. ООО-у «ЭкоЦент­рэм» иIофшIэн зырегъажьэм, псэупIэ кой администрациехэм ыкIи цIыфэу республикэм щыпсэухэрэм къатырэ пчъа­гъэхэм къапкъырыкIызэ, унэхэм арысхэм япчъагъэ ыгъэу­нэфыгъ. Арэу щытми, мы Iоф­шIэныр ащ къыщыуцурэп.

— ЩыIэныгъэр лъэкIуатэ, цIыфхэр мэкощых, зыгорэм макIох, къэтых, къагъэзэжьы… Ащ пэпчъ нэбгырэ пчъагъэу унэм исым зэхъокIыныгъэ фэ­хъу. Законым къызэрэщыдэ­лъытагъэмкIэ, шъолъыр операторыр ащ щызгъэгъозэн фаер унэр зыер ары. Пчъагъэм хэ­кIыгъэмэ къызэриIорэм фэдэу, къыхэхъуагъэми макъэ къыгъэ­Iуныр ипшъэрылъ. Ар къыдэтлъытэзэ хэкIыр зэрэIуащырэм ыуасэ тэ кIэтэлъытыкIыжьы, — къыIуагъ ООО-у «ЭкоЦент­рэм» и Адыгэ шъолъыр къутамэ ипащэу Алыбэрд Налбый.

Квитанциеу къэкIуагъэм итха­гъэр мытэрэзэу къычIэ­кIы­мэ, шъоркIэ зэрэнахь Iэрыфэгъу шIыкIэм тетэу компанием зыкъыфэжъугъэзэн фае. Офис­хэр зыдэщыIэхэр шъугу къэтэгъэкIыжьы: МыекъуапэкIэ ура­мэу Пионерскэр, 297, Адыгэ­къалэкIэ урамэу Советскэр, 2В ыкIи поселкэу ЯблоновскэмкIэ урамэу Школьнэр, 10/1.

Компанием иинтернет нэкIу­б­гъоу https://adygeya.clean-rf.ru зыфиIорэм шъуихьэми пэIу­дзыгъэ шIыкIэм тетэу шъузгъэгумэкIырэр зэхэшъуфын шъу­лъэкIыщт. Паспортыр, псэупIэр зэрэшъуиунаер ыкIи нэбгырэ пчъагъэу щыпсэурэр зыфэдизыр къэзыушыхьатырэ тхылъхэр шъуIыгъынхэ фае.

ООО-у «ЭкоЦентрэм» и Адыгэ шъолъыр къутамэ ипресс-къулыкъу

НэкIубгъор зыгъэхьазырыгъэр

ХЪУТ Нэфсэт.