ИлъэсыкIэ еджэгъумкIэ тафэгушIо!
Адыгэ Республикэм иеджэпIэ зэфэшъхьафхэм япчъэхэр мы мафэхэм къызэIуахыжьыгъэх, илъэсыкIэ еджэгъур ащырагъэжьэжьыгъ.
Анахьэу къыхэдгъэщымэ тшIоигъохэр, мыгъэ апэрэу ублэпIэ еджэпIэ пчъэшъхьаIухэм ялъэбэкъогъэ сабыйхэу илъэси 6 — 7 зыныбжьхэр арых. КIэлэцIыкIугъо-сабыигъор ары ныбжьырэу охътэ пычыгъо дахэу хэткIи къэнэжьырэр: апэрэ одыджыныр, апэрэ урокыр, апэрэ кIэлэегъаджэр. Арышъ, шъэожъыехэу, пшъэшъэжъыехэу еджэныр езгъэжьагъэхэм, янэ-ятэхэм ыкIи якIэлэегъаджэхэм мы мэфэкIымкIэ тыгу къыддеIэу тафэгушIо! Гъэсэныгъэ-шIэныгъэ лъэгъожъыеу зытеуцохэрэр насып къэкIуапIэ афэхъунышъ, цIыфышIу зафэ хъунхэу, псауныгъэ пытэ яIэнэу тафэхъохъу.
Сабыйхэм, апэрэ классым кIуагъэхэм, еджэныр ашIогъэшIэгъонынэу ыкIи къафэпсынкIэнэу афэтэIо. Сыд фэдэрэ лъэпэогъуми щымыщынэхэу, зыфырикъужьхэзэ, шIэныгъэхэм ыкIи шэн-зекIокIэ тэрэзхэм афэкIонхэу, еджэкIо цIыкIу чан ыкIи пэрыт хъунхэу Тхьэм тафелъэIу.