Ащ фэдэ къэбар ТАСС-м къеты УФ-м псауныгъэр къэухъумэгъэнымкIэ иминистрэу Михаил Мурашко игу­щыIэхэр IэубытыпIэ ышIыхэзэ. «Вакцинэр жъугъэу шъолъырхэм заIэкIэдгъэхьащтыр Iоныгъо мазэр ары», — къыIуагъ Мурашко. Ащ къы­хигъэщыгъ апэдэдэ вакцинэр ме­дицинэм иIофышIэхэмрэ кIэлэегъа­джэхэмрэ зэраIэкIагъэхьащтыр. Егъэ­­зыгъэкIэ вакцинэр зыми зэ­рэхамылъхьащтыр, нэбгырэ пэпчъ ишIоигъоныгъэ къызэрэдалъытэщтыр министрэм джащ фэдэу къыIуагъ.

Регистрациер кIугъэным иящэнэрэ ушэтын хэлэжьэнхэу агъэнэфэгъэ нэбгырэ мин 40-м щыщэу мини 2,5-мэ джырэ уахътэм вакцинэр зэрэзыхалъхьэрэми Мурашко къы­кIигъэтхъыгъ.

Коронавирусым пэшIуекIорэ вакцинэр апэдэдэ къэзыугупшысыгъэр ыкIи регистрациер езыгъэкIугъэр Урысыер ары. УФ-и и Президентэу Владимир Путиным а къэбарыр шышъхьэIум и 11-м къыIопщыгъ. Ащ къыкIэлъыкIоу, шышхьэIум и 15-м препаратым икъыдэгъэкIын фе­жьагъэх, ау жъугъэу затIупщыщтыр шэкIогъу мазэр арэу къаIуагъ. Джащ ыуж цIыфхэм ар нахь къаIэкIэхьан алъэкIыщт.

Вирусологиемрэ биотехнологиемрэ я Къэралыгъо гупчэу «Векторыри» вакцинэм икъэгъотын дэлажьэ.