ЦIыфым ищыIэныгъэ анахь мэхьанэ зиIэ хъугъэ-шIагъэу къыхэхъухьэхэрэм ащыщ унэгъошIэныр. Лъэпсэ пытэ зиIэ унагъор, насыпышIо щыIэныгъэр бгъэпсынхэр зэшъхьэгъусэ зэфэхъухэрэм ялъытыгъ. ШIулъэгъуныгъэ къа­бзэу, шъхьэкIэфэныгъэу нэбгыритIумэ азыфагу илъыр агъэпытэзэ, кIаугъуаезэ щыIэныгъэ гъогум къызэдырыкIохэмэ — ар къадэхъущт.

Илъэс зэкIэлъыкIохэм гъэзетэу «Адыгэ макъэм» Iоф щызышIэу, адыгэ шэн-хэбзэ зэхэтыкIэхэм афэIорышIэу, зищытхъурэ зиIэдэбрэкIэ къахэщэу Гъонэжьыкъо Сэтэнае унагъо ихьагъ. Зыхэхьэгъэ Абрэджхэм ялIакъо лъэпэ мафэ ридзэнэу, ыгъэбэгъонэу тыфэлъаIо.

Мэхьанэшхо зиIэ хъугъэ-шIагъэмкIэ зэшъхьэгъусэ зэфэхъугъэхэ Мэсхъудрэ Сэтэнаерэ редакцием иIофышIэхэр афэгушIох. ЛъэпкъымкIэ щысэшIу унэгъо зэгурыIожь дахэ агъэпсынэу, щы­Iэныгъэ гъогу кIыхьэм зэготхэу къы­зэдырыкIонхэу тафэлъаIо!