Къыблэ федеральнэ шъолъырымкIэ гъэIорышIакIохэм язэнэкъокъоу «Лидеры России» зыфиIорэм икIэух ушэтынхэу мэзаем и 8 — 9-м Ростов-на-Дону щы­кIуа­гъэм Адыгеир къэзыгъэлъэгъогъэ нэбгырэ 11-мэ анахь дэгъухэу къыхагъэщыгъэх Дмитрий Иг­на­то­вым­рэ Се­мен Синицынымрэ. Дмитрий Игнатовыр республикэ гъэзетэу «Адыгэ макъэм» иIофышI, Семен Синициныр пшъэдэкIыжь гъэ­нэфагъэ зыхьырэ обществэу «Си­бирские инновационные системы» зыфиIорэм ипащ.

ТиIофшIэгъоу Дмитрий Адыгэ къэ­ралыгъо университетым щеджагъ, апшъэрэ гъэсэныгъитIу щызэригъэгъотыгъ — хьисапымрэ компьютернэ шIэныгъэхэмрэкIэ ифакультет «Хьисап» зыфиIорэ лъэныкъомкIэ ще­джагъ ыкIи ащкIэ кIэлэегъэджэ сэнэхьатыр къыщызIэкIигъэхьагъ. Унэе хъызмэт­шIапIэхэм ащыщ программистэу Iоф щишIагъ, илъэситф хъугъэу «Адыгэ макъэм» ибухгалтер шъхьаI.

Адыгеим и ЛIышъхьэу КъумпIыл Мурат иинстаграм нэкIубгъокIэ къа­фэгушIуагъ «Лидеры России» зы- фи­Iорэ зэнэкъокъум исуперфинал ихьэ­гъэхэ Дмитрий Игнатовымрэ Семен Синицынымрэ.

Республикэм илIыкIохэр зыхэлэжьэщтхэ Iофтхьабзэр Iоныгъом и 6 — 7-м Подмосковьем щыкIощт. Проектым текIоныгъэ къы­щыдэзы­хыгъэ нэбгыри 100 къыха­хыщт.

ТиIофшIэгъоу Дмитрий Игнатовым гъэхъэгъэшIухэр ышIынхэу, текIоныгъэ къыдихынэу тыфэлъаIо.

КIАРЭ Фатим.