Мыгъэ апэрэу Индием, Афганистан, Ливан, Непал, Палестинэм ыкIи Шри-Ланка «ТекIоныгъэм идиктант» зыщатхыщт площадкэхэр къа­щызэIуахыщтых.

Джащ фэдэу Кореер, Мон­голиер, Вьетнам, Лаос, Кам­боджа, Индонезиер, Бангладеш, Иран, нэмыкIхэри хэлэ­жьэнхэу зэрашIоигъор къагъэшъыпкъэжьыгъ.

Мы Iофтхьабзэр очнэу зэ­рэкIощтым дакIоу, Iудзыгъэ шIы­кIэм тетэу атхын алъэкIыщт.

УФ-м и Къэралыгъо Думэ идепутатэу, мы проектым икIэщакIоу Александр Хинштейн Iофтхьабзэм фэгъэхьыгъэ къэбарыр къыIотагъ. Ащ къызэ­рэхигъэщыгъэмкIэ, шIэныгъэмрэ культурэмрэкIэ Урысые гуп­чэхэм, университетхэм ыкIи еджапIэхэм Iофтхьабзэр ащызэхащэщт.

— Эпидемиологие Iофым изытет елъытыгъэу Пекин, Ханое, Амман, Тегеран, Бейрут Iофтхьабзэр очнэу, Дакке, Нью-­Дели, Калькуттэ ыкIи нэмыкI къалэхэм Iудзыгъэ шIыкIэм тетэу ащыкIощт. Дамаскэ коронавирусым ижъотыпIэу зэрэ­щытым къыхэкIыкIэ диктантыр атхынэу къеуцолIагъэхэп, — къыIуагъ Александр Хинштейн.

«ТекIоныгъэм идиктант» зыщыкIощт чIыпIэхэм къызэрахэ­хъуагъэм ишIуагъэкIэ нэбгырэ миллионныкъом ар атхынэу, Iофтхьабзэр къэралыгъо 75-мэ ащыкIонэу агъэнафэ.

— АдыгеимкIэ диктантым хэлэжьэщтхэм зарагъэтхы, — къеIуатэ «Единэ Россием» ишъолъыр къутамэ и Секретарь игуадзэу АфэшIэгъо Рэмэзан. — Адыгэ Республикэм гъэсэныгъэмкIэ исистемэ икъэралыгъо аттестационнэ къулыкъу ипащэу Артем Журавлевыр сигъусэу гъэсэныгъэмкIэ му­ниципальнэ гъэIорышIапIэхэм ялIыкIохэм онлайн зэIукIэгъу адытиIагъ. Iофтхьабзэм изэхэщэн зызэрэфагъэхьазырырэм тытегущыIагъ: уплъэкIун-шын материалхэм (КИМ) Iоф зэрадашIэрэр, интернетым ыкIуачIэ зыфэдэр, диктантыр зыща­тхыщт чIыпIэхэм рециркулятор­хэр ачIэтхэмэ, санитарнэ шап­хъэр гъэцэкIэгъэнымкIэ ищыкIэгъэ пкъыгъохэр аIэкIэлъхэмэ.

Шъугу къэдгъэкIыжьын, «Те­кIоныгъэм идиктант» хэлэжьэщтхэм ятхын шышъхьэIум и 18-м аублагъ. Сайтэу диктантпобеды.рф зыфиIорэм уихьанышъ, площадкэ мин 11-у итхэм ащыщ къыхэпхын плъэкIыщт. Iофтхьабзэр а зы мафэм — Iоныгъом и 3-м — пстэуми ащыкIощт.

Iэшъынэ Сусан.