Лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэр анахь дэгъоу зыгъэцэкIэрэ шъолъырхэм Адыгеир ащыщ. Мы пшъэрылъыр зэшIохыгъэ зэрэхъурэм ынаIэ тет Адыгэ Республикэм и ЛIышъхьэу КъумпIыл Мурат. Мы проектым ишIуагъэкIэ гъогу псэолъэ 46-рэ, ар километрэ 35,8-рэ мэхъу, респуб­ликэм щагъэцэкIэжьыщт. Ащ пэIухьащт сомэ миллион 491-м щыщэу сомэ миллион 331-р — федеральнэ, сомэ миллиони 160-р — республикэ бюджетым къахэхыгъ.

— 2024-рэ илъэсым нэс гъогухэм атегъэуагъэр нахь макIэ хъунэу, язытет нахьы­шIоу, хъу­гъэ-шIагъэу атехъу­хьэрэм ипчъа­гъэ къыщыкIэнэу типшъэрылъ. ГъогурыкIоныр щынэгъончъэу щытыным тэркIэ мэхьанэшхо иI. Транспорт инфраструктурэ зэтегъэпсы­хьагъэр шъолъырым иэкономикэ хэхъоныгъэхэр ышIынхэм, инвестициеу къыхалъ­хьэ­рэр нахьыбэ хъуным афэIорышIэ, — къыIуагъ КъумпIыл Мурат.

ЫпшъэкIэ зигугъу къэтшIыгъэ проектым къыдыхэлъытагъэу агъэцэкIэжьыгъ Мыекъуапэ иурамэу Апшеронскэр. Метрэ 900 зикIыхьэгъэ гъогу Iахьыр федеральнэ шапхъэхэм адиштэ хъугъэ. 2020-рэ илъэсым муниципальнэ мэхьанэ зиIэ гъогу IахьипшI ашIыгъ ыкIи агъэ­кIэжьыгъ.

Гъогухэм ягъэцэкIэжьынкIэ 2021-рэ илъэсым телъытэгъэ гухэлъыр пIалъэу агъэнэфагъэм ыпэ итхэу республикэм щагъэцэкIэнэу рагъэжьагъ. Респуб­ликэм ипащэ пшъэрылъэу къыгъэуцугъэм диштэу мы IофшIэныр лъагъэкIотэщт, тигъогухэм язытет нахьышIу шIыгъэным зэрифэшъуашэу дэлэжьэщтых.

(Тикорр.). Сурэтым итыр: Мыекъуапэ иурамэу Апшеронскэм игъогу зэтырагъэпсыхьагъ.