Илъэси 4 хъугъэ партийнэ проектэу «Здоровое будущее» зыфиIорэр «Единэ Россием» зыпхырищырэр. Мы проектым икоординаторэу, Къэралыгъо Думэм псауныгъэм икъэухъумэнкIэ икомитет итхьаматэу Дмитрий Морозовым зэрилъытэрэмкIэ, партием хэтхэм медицинэм пае нахьыбэу мылъку къэтIупщыгъэ­ным, пэублэ медикэ-санитар IэпыIэгъоу аратырэм зегъэу­шъомбгъугъэным, адэбз узхэм агъэгумэкIыхэрэм яIэзэгъэным, кIэлэеджакIохэм нахьышIоу медицинэ IэпыIэгъу ягъэгъоты­гъэ­ным, Iэзэгъу уцхэр зэра­IэкIахьэхэрэм хэбзэ икъу хэлъхьэгъэным анаIэ тырагъэтыгъ. Ащ шIуагъэ горэхэри къыкIэкIогъахэх. ГущыIэм пае, кIэлэцIыкIу медицинэр лъэпкъ проектэу «Псауныгъэм икъэухъумэн» зыфиIорэм изы Iахь хъугъэ.

«ЦIыфхэм яхахъо хаубытыкIырэ хэбзэIахьым щыщэу сомэ миллиони 5-м ехъур орфаннэ уз зиIэхэм апэIугъэ­хьэгъэным ехьылIэгъэ уна­шъоу Урысыем и Президент ышIыгъэр зэрагъэцакIэрэр тэуплъэкIу», — къыIуагъ Дмит­рий Морозовым. Проектым тетэу уплъэкIун зэфэшъхьафхэр шъолъырхэм ащызэхащэх. ГущыIэм пае, партпроектым чанэу хэлажьэ­хэрэмрэ волонтерхэмрэ кIэлэцIыкIу сымэджэщхэм, поликлиникэхэм язытет бэмышIэу ауплъэкIугъ. ЧIыпIэхэм ащыIэ врачхэр ащкIэ къадеIагъэх. Мы лъэныкъомкIэ Урысыем ишъо­лъырхэм зэдэлэжьэныгъэ дэгъу зэрэзэдыряIэм псауныгъэм икъэухъумэн фэгъэзэгъэ лъэныкъом хэхъоныгъэ регъэшIы. Партпроектым иобщественнэ совет изэхэсыгъо шъолъырхэм къащарахьыжьэрэ Iофтхьабзэхэм щатегущыIэх, етIанэ зэ­рэхэгъэгоу ащ фэдэхэр щагъэцэ­кIэнэу игъо алъэгъу. Джащ тетэу Мурманскэ, Липецкэ, Волгоградскэ хэкухэм япроектхэр тыдэкIи ащагъэфедэ хъугъэ.

«Партпроектым къепхыгъэ общественнэ советрэ экспертнэ советрэ зэрэзэхэтщагъэхэр дэгъу. ЦIыфхэм яшIоигъоныгъэ­хэм такIэдэIукIызэ, Iоф тэшIэ. ГущыIэм пае, медицинэ учреждениехэм амал яIагъэп адэбз уз зиIэхэм икъоу IэпыIэгъу афэхъунхэу. Мы Iофы­гъомкIэ партийнэ линие плъыр зызэхэтэщэм, нэбгырэ мин пчъагъэмэ ящыкIэгъэ IэпыIэгъур агъотыгъ», — къы­Iуагъ Дмитрий Морозовым.

Партпроектым къызэрэщыдэ­лъытагъэм тетэу коронавирусыр къызэузыхэрэм яIэзэрэ врачхэм ахъщэ тегъахъо аIэкIэхьэгъэ- аIэкIэмыхьагъэр мыгъэ ауплъэ­кIугъ, а ахъщэм хэбзэIахьыр хамыубытыкIынэу арагъэшIыгъ.

«Медицинэ IофышIэхэм щынэгъончъэу Iоф ашIэным фытегъэпсыхьэгъэ федеральнэ шапхъэхэм якъыхэхын джыдэдэм Iоф дэтэшIэ. Коронавирусым зыкъызэришта­гъэм епхыгъэу телемедицинэми мэхьанэу иIэм нахь зыкъи­Iэтыгъ. ГущыIэм пае, Москва, Татарстан, нэмыкI шъолъыр­хэм арыс врачхэм зэпэIудзыгъэ шIыкIэм тетэу онлайн- консультациехэр цIыф­хэм афызэхащагъэх, къяутэлIэгъэ узхэр къафызэхафыгъэх», — къыIуагъ Дмитрий Морозовым.

Телемедицинэ технологиехэмкIэ цIыфхэм зэряIэзэщтхэм ехьылIэгъэ законым гъэтэрэзыжьынхэу фашIыгъэхэр ятIо­нэрэ хэплъэгъумкIэ аштагъэх. «Единэ Россием» и Генеральнэ совет исекретарэу Андрей Турчак зэрилъытэрэмкIэ, телемедицинэм тапэкIэ хэхъоныгъэ­шхо ышIын ылъэкIыщт.

«Мы аужырэ мазэхэм мафэ къытфэхъугъ псауныгъэм икъэухъумэнкIэ дистанционнэ технологиякIэхэр гъэфедэгъэн­хэ зэрэфаер. «Единэ Россием» мы илъэсым иублэгъу телемедицинэм иамалхэм нахь зырагъэушъомбгъунэу игъо ылъэгъугъагъ, типредложениехэм ащыщхэр законыкIэм лъапсэ фэхъугъэх. Ащ къызэрэщыдэлъытагъэмкIэ, зэпахырэ узхэм лъэшэу зызаушъомбгъукIэ е ошIэ-дэмышIэ тхьамыкIагъо къызы­хъу­кIэ ары ащ фэдэ телемедицинэ технологиехэр загъэфедэщтхэр», — къыIуагъ Ан­д­рей Турчак.