КIэлэцIыкIухэм апай
УФ-м и Правительствэ кIэлэцIыкIу ибэхэм ыкIи лъыплъэн зимыIэу къэнагъэхэм псэукIэ амалэу яIэр нахьышIу шIыгъэным пэIуигъэхьанэу сомэ миллион 43,3-рэ Адыгеим къыфэтIупщыгъэнэу унашъо ыштагъ. Ар ащ ипащэу Михаил Мишустиным министрэхэм я Кабинет зэхэсыгъоу иIагъэм къыщиIуагъ.
Джащ фэдэу илъэси 3 — 7 зыныбжь кIэлэцIыкIухэм мазэ къэс афатIупщырэ ахъщэ тыным пэIухьанэу субсидиеу 2020-рэ илъэсым къатIупщырэри нахьыбэ шIыгъэным фэгъэхьыгъэ унашъо аштагъ. Ащ пае ахъщэ тедзэу агъэнэфагъэр сомэ миллион 227,8-рэ мэхъу. ЗэкIэмкIи зэхэубытагъэу УФ-м и Правительствэ иIэпэчIэгъэнэ фонд къыхэхыгъэу къатIупщыгъэр сомэ миллион 408,5-рэ мэхъу.
Шъугу къэтэгъэкIыжьы, илъэси 3 — 7 зыныбжь кIэлэцIыкIухэм мазэ къэс Адыгеим щаратырэр сомэ 4799,5-рэ. ПстэумкIи ар зыфагъэнэфагъэр унэгъо 13136-рэ мэхъу, ар кIэлэцIыкIу 16288-рэ. Ахъщэу афатIупщыгъэр зэхэубытагъэу сомэ миллион 560-рэ.
АР-м иминистрэхэм я Кабинет зэхэсыгъоу джырэблагъэ иIагъэм АР-м и ЛIышъхьэу КъумпIыл Мурат ахъщэ тыныр зыфагъэнэфэгъэ кIэлэцIыкIухэм зэкIэми хэзыгъэ имыIэу ар афатIупщынэу АР-м IофшIэнымкIэ ыкIи социальнэ хэхъоныгъэмкIэ Министерствэм щыфигъэпытагъ.
— Зэпахырэ узэу дунаир зэлъызыкIугъэм илъэхъан цIыфхэм социальнэ IэпыIэгъу ятыгъэным УФ-м и Президентэу Владимир Путинымрэ Правительствэмрэ мылъкушхо пэIуагъахьэ. Анахь шъхьаIэр пстэумэ апэу кIэлэцIыкIу ибэхэмрэ сабый зэрыс унагъоу зигъот макIэхэмрэ IэпыIэгъур зэрафагъэзагъэр ары, — къыIуагъ КъумпIыл Мурат.
Къыхэдгъэщымэ тшIоигъу УФ-м и Къэралыгъо Думэ идепутатэу Владислав Резник ишIушIэ хэлъэу УФ-м и Федеральнэ ЗэIукIэ и Комиссиеу бюджет ахъщэм игощын фэгъэзагъэм къыхьыгъэ предложением къыпкъырыкIызэ Правительствэм унэшъуитIури зэриштагъэр.
АР-м и ЛIышъхьэ ипресс-къулыкъу.