ЦIыфыр зыфыщыIэр бын-унагъо ышIэныр, илъфыгъэхэр гъогу занкIэ тырищэнхэм дакIоу, дунаим зехыжькIэ игугъу дахэкIэ, шIукIэ зэрашIыжьын лъагъо къыгъэнэныр ары.

Непэ сыкъызытегущыIэщт бзылъфыгъэм ар къыдэхъугъ. Теуцожь районым ит къуаджэу Къунчыкъохьаблэ къыщыхъугъэ ыкIи щапIугъэ ХъокIо (Пэнэшъу) Минхъан зигугъу къэсшIы сшIоигъор.

Минхъан дунаим зехыжьыгъэр шышъхьэIум и 28-м илъэс мэхъу. Къунчыкъохьаблэ дэсхэми, ащ къегъэтIысэкIыгъэ къуа­джэхэми бзылъфыгъэр шIукIэ агу къинагъ, дахэкIэ игугъу ашIыжьы, зэрэщымыIэжьыр чIэнагъэу алъытэ. Сыда пIомэ ХъокIо Минхъан быслъымэн диныр зыбгъодэлъэу, емызэщыжьэу зылэжьыхэрэм ащы­щыгъ. Зидунай зыхъожьыгъабэхэм ар КъурIан афеджагъ, ыгъэпскIыгъэх, быслъымэн диным диштэу адэзекIуагъ.

Минхъан агъэтIылъынэу унэм къызырахым, къэзэ­рэ­угъоигъэ­хэм апашъхьэ ефэндым гущыIэ дэхабэу къыфи­Iуагъэр зымыуасэ щыIэп. ЦIыфышIоу, цIыф гъэтIылъы­гъэу щытыгъ, ныбжьи гущыIэ лые ымыIоу, къоджэдэсхэм якIасэу къыгъэшIагъ.

Сэри гущыIэгъу сыфэхъугъэу щытыгъ. Нэнэжъым ынэхэм нурэр къакIихэу, инэплъэгъу ифэбагъэ къыплъигъэIэсэу уз­Iэпищэщтыгъэ. Илъэс 89-рэу къыгъэшIагъэм рыразэу ичIыIахь ыгъотыжьыгъ.

Ащ къызэриIожьыщтыгъэмкIэ, янэ-ятэхэр диным пылъыгъэх. Ахэм къакIэрихыгъэ шIэныгъэр ары къызфигъэфедагъэр. Ащ игукъэошхуагъ КъурIаным арапыбзэкIэ къеджэн зэримылъэ- кIыщтыгъэр, Iэятхэр, духьэхэр зэкIэ адыгабзэкIэ тхыгъэхэу къыIощтыгъэх, сымаджэхэр ыдэжь кIохэзэ напщэ атырихыщтыгъ. ИнэмазшIыгъуи, инэкIи блигъэкIыгъэхэп.

Къунчыкъохьаблэ мэщыт дэмытыфэ бзылъфыгъэ нэбгырэ 20 фэдизэу диныр зылэ­жьы­хэрэр Минхъан иунэ къакIохэзэ, нэмаз щаригъэшIыщтыгъ.

«Диным цIыфыгъэр, гукIэ- гъур къыхэкIых, псэ зыпытхэр шIу уегъэлъэгъух. Нэмаз сшIы зыхъукIэ сыгукIэ сэтхъэжьы, сыкъызытекIыжьыкIэ зэкIэ къыз­дэхъугъэу къысшIошIы», — Минхъан ыIо зэпытыгъ.

Ишъхьэгъусэу Байзэтрэ ежьыррэ сабыи 6 къакIэхъу- хьагъ. ГухэкI нахь мышIэми, Байзэт нахь пасэу дунаим ехыжьи, ибын ылъэ зэрэтыригъэуцощтым Минхъан ыуж итыгъ. Сыд фэдиз илъэс пчъагъэ ны-тыхэм къагъэшIагъэми, ялъфыгъэхэмкIэ мэкIэщт. Джащ фэд, Минхъан илъэс пчъагъэм ибынхэм ашъхьагъ итыгъэми, ар чIэнэгъэшхо зэрафэхъугъэр, лъэшэу къазэрэщыкIэрэр зэш- зэшыпхъухэм къаIо.

ЦIыфышъхьэм нахь лъапIэ Алахьым къыгъэхъугъэп. Мы­лIэжьыни къыгъэхъугъэп. Ау ущэIэфэ, Тхьэр гукIэгъушIэшъ, уелъэIун фае, узэрелъэIурэр къыпфишIэщт. Джащ фэдагъ ХъокIо Минхъани, щэIэфэ Тхьэм елъэIугъ, игъо къэси дунаим ехыжьыгъ. Ау пстэуми анахь лъапIэр джы игугъу дахэкIэ, шIукIэ зэрашIыжьырэр ары. Тхьэм джэнэт лъапIэ къырет!

Iэшъынэ Сусан.