Зэпахырэ узэу коронавирусыр щынагъоу зэрэщытым, ащ Адыгеим зыщимыу­шъомбгъунымкIэ шIэгъэн фаехэм, гриппым зыщау­хъумэным пае цIыфхэм шIокI имыIэу вакцинэр зэрахалъхьащтым иIофы­гъохэм защытегущыIэ­гъэхэ игъэкIотыгъэ зэхэсыгъо тыгъуасэ зэхищагъ Адыгеим ыкIи Пшызэ шъолъыр ащыпсэурэ быслъымэнхэм я ДиндэлэжьапIэ.

Iофтхьабзэм хэлэжьагъэх АР-м псауныгъэр къэухъумэгъэнымкIэ иминистрэу Мэрэтыкъо Рустем, Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, Мыекъопэ къэлэ клиническэ сымэджэщым реанимациемкIэ ыкIи интенсивнэ терапиемкIэ отделением ипащэу ВэкъэшIэ Рустем, республи­кэм иимамхэр.

Министрэм зэхахьэм къызэрэщиIуа­гъэмкIэ, коронавирусыр къызежьа­гъэм къыщыублагъэу республикэмкIэ ар къызпыхьагъэхэм япчъагъэ процент 0,6-рэ мэхъу. Непэрэ мафэм ехъулIэу гъэлъэшыгъэ шIыкIэм тетэу Iоф ашIэ, цIыфхэр къызэраухъумэщтхэм пылъых.

Зэхэсыгъор зэрэкIуагъэм фэгъэхьыгъэ игъэкIотыгъэ тхыгъэ тигъэзет къыхиутыщт.

КIАРЭ Фатим.