ГазрыкIуапIэхэр непэкIэ зыщагъэпсыгъэр Урысыем ипсэупIэхэм япроцент 70-р ары. Урысыем и Президентэу Владимир Путиным пшъэрылъ зэрафишIыгъэм тетэу чэзыу-чэзыоу 2030-рэ илъэсым нэс тыдэкIи ахэр щагъэпсынхэ фае.

Ау а пшъэрылъыр амыгъэцэкIэшъуным ищынагъо зэрэщыIэм епхыгъэу партиеу «Единэ Россием» хэтхэр амал горэхэм яусагъэх, ахэм игъо алъэгъугъ ыпкIэ хэмылъэу цIыфхэм газрыкIуапIэм зыпашIэнэу.

Шъолъырхэм газыр зэраIэ­кIахьэрэм иIофыгъокIэ зэхэсыгъоу щыIагъэм «Единэ Россием» и Генеральнэ совет исекретарэу Андрей Турчак агу къызэрэщигъэкIыжьыгъэмкIэ, газрыкIуапIэм непэ зыпызышIэ­хэрэм сомэ мин 400 фэдиз атын фаеу мэхъу. Газыр къящэ­лIэгъэнымкIэ джыдэдэм пшъэ­дэкIыжь зыхьыхэрэр шъолъыр­хэр ары. «Газпромым» магистральнэ газрыкIуапIэр егъэпсы, етIанэ регион компаниехэм цIыфхэм зэзэгъыныгъэ ада­шIышъ, яунэхэм газыр афыращалIэ. Унэр нахь чыжьэу газрыкIуапIэм пэIудзыгъэ къэс нахь лъапIэу къафыдэкIы. Тюменскэ хэкум ис унагъо горэм газрыкIопIэ километрэ 41-рэ зэрагъэпсыгъэм пае сомэ миллион 28-рэ ытын фаеу тыра­гъэфагъ. «Единэ Россием» хэтхэм зэралъытэрэмкIэ, ыпкIэ хэмылъэу цIыфхэм яунэхэм газыр аращэлIэн фае, ахэм къащэфынэу щытыр газ котелымрэ хьакумрэ ары ныIэп. «Газпромым» ежь имылъкукIэ Iофхэр зэкIэ зэшIуихынхэ фае.

Андрей Турчак ишIошIкIэ, компанием мылъкоу ыгъэкIо­дырэр фигъэкъужьыгъэным пае къэралыгъо IэпыIэгъу лъэпкъ зэфэшъхьафхэм яусэгъэн фае. ГущыIэм пае, НДПИ-мкIэ фэ­гъэкIотэныгъэхэр ащ фэшIы­гъэнхэр, облигациехэр къыдэгъэкIыгъэнхэр ыкIи нэмыкIхэр.

ЦIыфхэм газыр фыращэным илъэситIум нэс Урысыем ще­жэхэу къыхэкIы. Мэзищым къы­кIоцI ар афищэгъэнымкIэ «Единэ Россием» предложениеу къыхьыгъэм Минэнергом къыдыригъэштагъ. Ащ епхыгъэ Iоф­тхьабзэхэр зэкIэ зы чIыпIэм щызэшIохыгъэнми ведомствэр къезэгъыгъ.

«ЦIыфхэм амал яIэн фае яфэIо-фашIэхэр МФЦ-хэм е газым игощын фэгъэзэгъэ организациехэм къащафагъэцэ­кIэнхэу. Ахэм чIыпIэ пчъагъэ къачъыхьанэу щытэп. Джащ фэдэу унэхэм газыр заIэкIа­гъэхьан фэе пIалъэмкIи шэпхъэ зыкIхэр гъэнэфэгъэнхэ фае», — хигъэунэфыкIыгъ Андрей Турчак.

Сыбыррэ КъокIыпIэ Чыжьэм­рэ якъоджэ Iудзыгъэхэм газ­рыкIуапIэхэр ащыгъэпсыгъэныр федэп. Ащ епхыгъэу мы къуа­джэхэм адэсхэу баллонхэм арыт газыр зыIэкIагъахьэхэрэм уасэм­кIэ афыдеплъыгъэн фае.

2030-рэ илъэсым нэс Урысые Федерацием ишъолъырхэм газрыкIуапIэхэр ащыгъэ­псыгъэнхэм тегъэпсыхьэгъэ фе­деральнэ проектым ащ фэдэ предложениехэри, нэмыкIхэри лъапсэ фэхъущтых. ГазрыкIуапIэхэм ягъэпсынкIэ Iофтхьабзэу зэрахьащтхэр, лъэпкъ проектхэм къащыдэлъытагъэхэм ади­штэщтых, шъолъыр пэпчъкIэ операторыр агъэнэфэщт.

Мы лъэныкъомкIэ Iофыгъоу къэтэджхэрэм язэхэфын фэ­гъэзэгъэщт куп «Единэ Россием» зэхищэщт. Ащ хэхьащтых «Газпром Межрегионгазым» ипащэхэр, Урысыем мэкъу-мэщымкIэ, финансхэмкIэ, псэо­лъэшIынымкIэ я Министерст­вэ­хэм ялIыкIохэр. Партием про­ектыкIэу къыхихыщтым тетэу газрыкIуапIэхэр чIыпIэхэм зэращагъэпсырэм гъунэ лъафыщт. 2021-рэ илъэсым Къэралыгъо Думэм хэдзынэу иIэщтым а проектыр зыдиIыгъэу «Единэ Россиер» хэлэжьэщт.

Адыгеим и ЛIышъхьэу, «Единэ Россием» ирегион къутамэ и Секретарэу КъумпIыл Мурат мы лъэныкъомкIэ партием игъо ылъэгъугъэхэм къадыригъэ­штагъ.

«Тэ гухэлъ шъхьаIэу тиIэр цIыфхэм ящыIэкIэ-псэукIэ зыкъегъэIэтыгъэныр ары. Къуа­джэхэм хэхъоныгъэ ягъэшIы­гъэным фытегъэпсыхьэгъэ къэ­ралыгъо программэхэм рес­публикэр зэрахэлажьэрэм ыкIи ПАО-у «Газпромым» гъусэныгъэ зэрэдыриIэм яшIуагъэкIэ мы аужырэ илъэсхэм республикэм ипсэупIэхэм япроцент 87,6-мэ газыр алъагъэIэсын алъэкIыгъ. Ау, газыр псэупIэм къыдаща­гъэми, ащ дэс пстэуми амал яIэп яунэ ар ращэлIэнэу. Къо­джэдэсхэм сызаIукIэкIэ ар ­къы­саIокIэу къыхэкIы, социальнэ хъытыумкIэ къыслъагъэIэ-сэуи мэхъу. ЫпкIэ хэмылъэу цIыфхэм яунэхэм газыр ящэлIэгъэнымкIэ «Единэ Россием» Iофтхьабзэу къырихьыжьагъэм къыдесэгъаштэ. ЦIыфхэмкIэ ар федэшхо хъущт», — хигъэунэфыкIыгъ Адыгэ Республикэм и ЛIышъхьэ.

Адыгэ Республикэм и ЛIышъхьэ ипресс-къулыкъу