«Зэкъошныгъ» Мыекъуапэ — «Махачкала» Ма­хачкала — 1:0. ШышъхьэIум и 23-м Адыгэ республикэ стадио­ным щызэдешIагъэх.

«Зэкъошныгъ»: Гиголаев, ХъуакIо, Хьагъур, Каракоза, Подковыров, Дыхъу, Ещенко, Къонэ, Такълый (Манченко, 80), Крылов (Шъхьэлахъо, 81), Бабенко (Гъыщ, 88). Къэлапчъэм Iэгуаор дэзы­дзагъэр: Къонэ Амир — 26, пенальтикIэ.

ТекIоныгъэм командитIури яшъыпкъэу зэрэфэбэнагъэхэм ешIэгъур къыгъэдэхагъ. «Зэ­къошныгъэр» нахьыбэрэ ыпэкIэ илъыщтыгъ, «Махачкала» иухъумакIохэр чIыпIэ къин ридзэ­щтыгъэх.

Я 26-рэ такъикъым «Махачкала» иешIакIохэм ащыщ шапхъэр зэриукъуагъэм фэшI судьям пенальтир ыгъэунэфыгъ. «Зэ­къошныгъэм» икапитанэу Къонэ Амир пенальтир дэгъоу ыгъэцэ­кIагъ, хъагъэм Iэгуаор дидзагъ.

Дагъыстан иешIакIохэр пчъагъэу 1:0-м емызэгъыхэу апэкIэ къылъыкIуатэщтыгъэх. «Зэкъошныгъэм» текIоныгъэр зыIэкIи­мыгъэкIэу ухъумэн Iофыгъохэр дэ­гъоу ыгъэпсыщтыгъэх. Гиго­лаевым, ХъуакIом, Хьагъурым, нэмыкIхэм зэгурыIоныгъэ ахэ­лъэу зэрешIэхэрэм, къэлапчъэр цыхьэшIэгъоу къызэраухъумэрэм командэм гушхоныгъэ къыхилъхьэщтыгъ. Дыхъур, Ещенкэр, Къонэр зэхэщэн пшъэрылъхэр зыгъэца­кIэхэрэм ащыщыгъэх. Къонэ Амир ыпэкIэ зилъыкIэ, ухъума­кIохэм бырсыр аришIылIэщтыгъ. Крыловым, Бабенкэм, нэмыкIхэм къэлапчъэм Iэгуаор дамы­дзагъэми, ухъумакIохэр бэрэ агъэгумэкIыгъэх.

Пресс-зэIукIэр

«Зэкъошныгъэм» итренер шъхьа­Iэу, Адыгэ Республикэм изаслуженнэ тренерэу Ешыгоо Сэфэрбый къызэрэтиIуагъэу, тиешIакIохэм яIэпэIэсэныгъэ ха­гъахъо. Республикэм щапIугъэхэ ХъуакIом, Дыхъум, Манченкэм, Шъхьэлахъом, Гъыщым, нэмыкIхэм яешIакIэ уегъэразэ, гуетныгъэ ахэлъ. «Зэкъошныгъэр» зэнэкъокъум щылъыкIотэным фэшI уахътэ ищыкIагъ. ЕшIакIохэм ясэнаущыгъэ къызэIуахыныр неущрэ мафэм телъытагъэу щыт.

КIэуххэр

Я 3-рэ ешIэгъухэу купэу «Къыб­лэм» щыкIуагъэхэм якIэуххэр.

«Кубань-Холдинг» — «Черноморец» — 1:1, «Ессентуки» — «Биолог» — 1:2, «Форте» — «Кубань» — 0:2, «Краснодар-3» — «Спартак» — 3:2, СКА — «Динамо» — 1:2, «Легион» — «Анжи» — 4:1, «Мэщыкъу» — «Интер» — 3:1.

ЧIыпIэхэр

1. «Кубань» — 9 2. «Кубань-Холдинг» — 7 3. «Легион» — 7 4. «Мэщыкъу» — 6 5. «Анжи» — 6 6. «Краснодар-3» — 6 7. «Динамо» — 6 8. «Черноморец» — 4 9. «Зэкъошныгъ» — 3 10. «Махачкала» — 3 11. «Интер» — 3 12. СКА – 3 13. «Биолог» — 3 14. «Форте» — 3 15. «Спартак» — 1 16. «Ессентуки» — 0 17. «ТIуапсэ» — 0. ШышъхьэIум и 29-м я 4-рэ ешIэгъухэр купэу «Къыблэм» щыкIощтых.