Урысые Федерацием и Правительствэ 2018-рэ илъэсым мэлылъфэгъум и 28-м ышIыгъэ унашъоу N 792-р зытетым диштэу 2021-рэ илъэсым щылэ мазэм и 20-м къыщегъэжьагъэу гъэщхэкI хьазыр­хэм цифрэ тамыгъэхэр атетынхэ фае. Ащ фэдэ тамыгъэхэр зыте­тыщт гъомылапхъэхэр Урысые Фе­дерацием и Правительствэ къыгъэ­нэфэщтых.

Ащ фэдэ тамыгъэхэр зэратырагъэуцощтым мылъкушхо пэIухьанэу къыра­дзэ. АщкIэ ищыкIэгъэ оборудованиер, цифрэ кодхэр къащэфын, производственнэ линиехэр нэмыкIэу зэтырагъэпсы­хьа­жьынхэ, IофышIэхэр рагъэджэнхэ, штатым хагъэхъон фаеу хъущт.

Адыгэ Республикэм ипредприятие пэрытхэу щэм гъомылапхъэхэр хэзышIыкIыхэрэм ащ фэдэ оборудованиемрэ компьютерхэмрэ къащэфынхэм пае сомэ миллиони 6-м нэсэу, илъэсым къыкIоцI тамыгъэхэр зэратырагъэуцощтхэм сомэ миллионым нэсэу хъарджхэр ашIыщтых. Предпринимательствэ цIыкIумрэ гурытымрэ апылъхэу щэ отраслэм епхыгъэхэм япроизводствэ къызэтеуцоным нэсэу мылъкушхо агъэкIодыщт.

Предприятиехэм япродукциехэм тамыгъэхэр зэратырагъэуцощтхэм епхыгъэу гъэщхэкIхэр нахь лъапIэ хъущтых. ЦIыфхэм нахьыбэрэ агъэфедэхэрэм ахэр ахэхьэх. Коронавирусым зыкъызыщиштэгъэ лъэхъаным социальнэу мыухъумэгъэ цIыфхэм ар нахь лъапIэ зэрэхъурэр зыхашIэщт.

Джыдэдэм гъэщхэкIхэм якъыдэгъэкIын, язещэн, яIугъэкIын гъунэ лъызыфырэр федеральнэ къэралыгъо информационнэ системэу «Меркурий» зыфиIорэр ары. Фермэм къытыращышъ, тучаным щэр зэрэнагъэсырэм ехьылIэгъэ къэбархэр зэкIэ ащкIэ зэрагъашIэх.

Республикэм ищэ отраслэ чIыпIэ къин имыуцоным, социальнэ мэхьанэ зиIэ гъомылапхъэхэм (гъэщхэкIхэри ахэм зэу ащыщ) ауасэ зыкъемыгъэIэтыгъэным атегъэпсыхьагъэу Адыгэ Республикэм и ЛIышъхьэу КъумпIыл Мурат Урысые Федерацием и Правительствэ и Тхьаматэу Михаил Мишустиным зыфигъэ­загъ, тамыгъэ гъэнэфагъэхэр зытырагъэуцон фаехэм гъэщхэкIхэр ахэгъэкIыгъэнхэмкIэ амалэу щыIэхэм ахэплъэнэу елъэ­Iугъ.

Адыгэ Республикэм и ЛIышъхьэ ащкIэ предложениеу къыхьыгъэм Адыгеим мэкъу-мэщымкIэ и Министерствэ тыгъуа­сэ зэхэсыгъоу щыкIуагъэм хэлэжьагъэ­хэм къыдырагъэштагъ. Адыгэ къуаер къыдэзыгъэкIыхэрэм я Союз, Адыгеим ифермерхэм я Союз, отраслэм ипредприятие цIыкIухэм ялIыкIохэр ащ хэлэжьагъэх. Продукциеу къыдагъэкIырэм идэгъугъэ къемыгъэIыхыгъэным ахэм къыдырагъэштагъ.

Адыгэ Республикэм къыщыдагъэкIырэ адыгэ къуаер Урысые Федерацием имызакъоу, IэкIыб къэралыгъохэми дэгъоу ащащэфы. ГущыIэм пае, 2012-рэ илъэсым къыщегъэжьагъэу Адыгэ Рес­публикэм къыщыдагъэкIырэ къуаехэр Германием, Азербайджан, Араб Эмират Зэхэтхэм, Америкэм ащэх. Къуаем ыуасэ зыхагъахъокIэ, IэкIыб къэралыгъо бэдзэрхэм ащ нахь макIэу къащыкIэупчIэнхэм ищынагъо щыIэ хъущт.

Адыгэ Республикэм и ЛIышъхьэ ипресс-къулыкъу