Ны мылъкум фэгъэхьыгъэ программэм гъэтэрэзыжьынхэр фэшIыгъэнхэм УФ-м и Президентэу Владимир Путиныр кIэщакIо фэхъугъ ыкIи ащ фэгъэхьыгъэ федеральнэ хэбзэгъэуцугъэм гъэтхэпэ мазэм кIэтхагъ.

Унагъом ахъщэ IэпыIэгъоу къэралыгъом къыритырэр нахьыбэ шIыгъэнэу, ны мылъкур зыпэIуагъэхьащтхэми ахэгъэхъогъэнэу, ахэм ягъэпсын нахь къы­зэрыкIоу шIыгъэнэу, программэм ипIалъэ лъыгъэкIотэгъэнэу къащыдэ­лъытагъ.

Апэрэ сабыим пае

КIэу къыхэхьагъэхэм анахь шъхьаIэр ны мылъкум къыщыдэлъытэгъэ ахъщэр апэрэ сабыим пае унагъом къыратынэу зэрэхъугъэр ары. 2020-рэ илъэсым щылэ мазэм и 1-м къыщыублагъэу унагъоу апэрэ сабыир къызэрыхъухьагъэм е ыпIунэу къаIызыхыгъэм сомэ 466617-рэ къыраты.

Ахъщэм къыхэхъуагъ

2020-рэ илъэсым ятIонэрэ е ащ къы­кIэлъыкIорэ сабыир къызэрыхъухьагъэ­хэм е ыпIунэу къаIызыхыгъэхэм нахьыпэкIэ къаратыгъэм джыри сомэ 150000 къафыхагъахъо. ПстэумкIи ны мылъкум къыщыдэлъытагъэу къаратырэр сомэ 616617-рэ мэхъу.

Джы нахь гъэхьазырыгъошIу

2021-рэ илъэсым къыщыублагъэу ны мылъкум исертификат игъэпсыни, игъэ­федэни нахь IэшIэх хъугъэх. Сертификатым игъэпсын IофшIэгъу мэфитф, ар зыпэIуигъэхьащтым фэгъэхьыгъэ лъэIу тхылъым зэрэхэплъэщтхэм мэфипшI нахьыбэ атырагъэкIуадэрэп. ЗыгорэкIэ нэмыкI ведомствэ горэм зыфагъэзэн фаеу хъугъэми, мэфэ 15 — 20 ныIэп зэрэпэлъынхэ фаер.

Шапхъэу щыIагъэхэм мы илъэсыр екIыфэкIэ джыри кIуачIэ яIэщт. Ны мылъкум исертификат игъэпсын пIалъэу пылъыр мэфэ 15, лъэIу тхылъым зэрэхэплъэщтхэм — зы маз. ПенсиехэмкIэ фондым ичIыпIэ органхэр ахэр охътэ нахь кIэкIым зэшIуахынхэм пылъых.

ПенсиехэмкIэ фондым уемыкIуалIэу

Мэлылъфэгъу мазэу къа­кIорэм ыгузэгу къыщыублагъэу джыри зы шэпхъакIэ кIуачIэ иIэ хъугъэ. Унагъом сабый къихъухьагъэмэ, ны мылъкум исертификат пае ныр е тыр ПенсиехэмкIэ фондым екIолIэн ищыкIэгъэжьэп. ЗАГС-м сабыир къызэрэхъугъэмкIэ фондым макъэ ригъэ­Iущт ыкIи ащ иIофышIэхэм тхылъхэр агъэ­псых. Ащ лъыпытэуи ахъщэм игъэфе­дэни унагъор ыуж ихьан ылъэкIынэу щыт.

Сертификатыр гъэпсыгъэ зэрэхъугъэр ПенсиехэмкIэ фондым икъэбарлъыгъэ­Iэс системэ рагъахьэ, интернет нэкIубгъом ным «унэе кабинетэу» щигъэпсыгъэми агъэхьы. КIэлэцIыкIур ыпIунэу къаIызыхыгъэ унагъохэм сертификатыр агъэпсыным пае, нахьыпэрэм фэдэу, лъэIу тхылъ атын фае. Сыда пIомэ, сабыир зэраштагъэмкIэ макъэ зыгъэIун зылъэкIыщтыр ны-тыхэр ары ныIэп.

Кредитым итыжьыни нахь IэшIэх хъугъэ

Ны мылъкум къыщыдэлъытэгъэ ахъщэр нахьыбэм псэукIэ амалхэр нахьышIу шIыгъэныр ары зыпэIуагъахьэрэр. Банкым чIыфэ къыIахи псэупIэ ащэфыгъэмэ, ащ агъэкIожьы е ипотекэр агъэ­псынэу ыуж ихьагъэхэмэ, ежьхэм яIахьэу а ахъщэр халъхьэ. Джы ащ игъэпсыни нахь IэшIэх хъугъэ.

НахьыпэкIэ ны мылъкум къыщыдэ­лъытэгъэ ахъщэр ипотекэм пэIубгъэ­хьа­жьынэу уфаемэ е о уиIахьэу хаплъхьэ пшIо­игъомэ, ащ пае лъэIу тхылъыр ПенсиехэмкIэ фондыми, банкыми яптынхэ фаеу щытыгъ. ШэпхъакIэхэм къызэращыдэлъыта­гъэмкIэ, унагъор банкым екIуалIэмэ зэкIэри фагъэпсыщт.

Дачэм унэ щыпшIыщтмэ

Дачэм унэ щишIымэ зышIоигъохэм ащ ны мылъкур пэIуагъэхьанэуи гъэтэрэзыжьынхэм къащыдэлъытагъ. Ащ чIыгур унагъом зэриунаер ыкIи псэолъэ­шIын Iофхэр щызэшIуихынхэу фитыныгъэ зэриIэр къэзыушыхьатырэ тхылъхэр ары ищыкIагъэхэр.

2026-рэ илъэсым нэс

А зэпстэумэ анэмыкIэу ны мылъкум фэгъэхьыгъэ программэм 2026-рэ илъэ­сым итыгъэгъазэ и 31-м нэс кIуачIэ иIэнэу ашIыгъ. Ащ нэс сабый къызыфэ­хъугъэхэм е ыпIунэу къаIызыхыгъэхэм зэкIэми а къэралыгъо IэпыIэгъур къаратыщт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.