Водитель 37-рэ къаубытыгъ

ШышъхьэIум и 10-м къыщегъэжьагъэу и 16-м нэс Адыгеим игъогухэм хъугъэ-шIэгъи 10 щагъэунэфыгъ, ахэм нэбгыри 3 ахэкIодагъ, 13-мэ шъобжхэр атещагъэхэ хъугъэ.

Ащ нэмыкIэу мы уахътэм къыриубытэу зыпари зыхэмыкIодэгъэ гъогу хъугъэ-шIэгъэ 70-рэ Адыгеим игъогухэм къатехъухьагъ. Ахэм янахьыбэр зыща­гъэунэфыгъэр Мыекъуапэ ыкIи Тэхъутэмыкъое районыр арых.

Адыгеим и Къэралыгъо автоинспекцие къызэритыгъэмкIэ, автомобильхэм азыфагу илъын фэе гъогу­уанэр зэраукъуагъэм къыхэкIэу аварие 16 хъугъэ. Джащ фэдэу мы уахътэм къыриубытэу гъогогъу 48-рэ машинэхэр зэутэкIыгъэх.

Адыгеим и Къэралыгъо автоинспекцие иподразделениехэм мы мафэхэм гъогогъу 2350-рэ гъогурыкIоным ишапхъэхэр аукъуагъэхэу къыхагъэщыгъ. Ешъуагъэхэу автомобилыр зезыфэщтыгъэ водитель 37-мэ административнэ пшъэдэкIыжь атыралъхьагъ. Ащ фэдэхэр нахьыбэу къызщыхагъэщыгъэхэр Мые­къуапэ, Тэхъутэмыкъое районыр арых. Джащ фэдэу гъогурыкIоным ишапхъэхэр зыукъогъэ лъэсрыкIо нэбгыри 143-мэ алъэныкъокIэ административнэ протоколхэр зэхагъэуцуагъэх.

Адыгеим и Къэралыгъо автоинспекцие икъулы­къушIэхэм водительхэм зафегъазэ гъогум сакъыныгъэ къыщызхагъэфэнэу, гъогурыкIоным ишапхъэхэр амыукъонхэу. Джащ фэдэу лъэсрыкIохэми агу къегъэ­кIыжьы, афыхахыгъэ зэпырыкIыпIэхэм гъогур ащызэпачынэу, сакъыныгъэ къащызха­гъэфэнэу.

Илъэси 2-м нэс хьапс атыралъхьан алъэкIыщт

Ешъуагъэхэу транспортым Iусхэм якъыхэгъэщын ыкIи ахэм пшъэдэкIыжь ягъэхьыгъэныр Адыгеим и Къэралыгъо автоинспекцие икъулыкъу ипащэхэм янэплъэгъу рагъэкIырэп.

БэмышIэу гъогу-патруль къулыкъум иIофышIэхэм илъэс 29-рэ ыкIи 74-рэ зыныбжь хъулъфыгъитIу Красногвардейскэ районым къыщагъэуцугъэх. ТIуми медицинэ уплъэкIунхэр ашIынэу адагъэп. Нэужым къызэрэнэфагъэмкIэ, илъэскIэ узэкIэIэбэжьмэ, ешъуагъэ­хэу автомобилым зэрэIусыгъэхэм къыхэкIэу тIуми административнэ пшъэдэкIыжь атыралъхьагъэу щытыгъ. Мыщ фэдэ хъугъэ-шIагъэ Джэджэ районми къыщыхагъэщыгъ. Илъэс 30 зыныбжь хъулъфыгъэр къызагъэуцум, медицинэ уплъэкIунхэр афишIыгъэп. Мыщ ыпэкIэ ешъуагъэу къагъэуцуи, хъулъфыгъэм административнэ пшъэдэкIыжь тыралъхьэгъагъ.

Полицием икъулыкъушIэхэм оперативнэ Iофтхьабзэу Теуцожь районым щызэхащагъэм ишIуагъэкIэ ешъуа­гъэу рулым Iусыгъэ нэбгыритIу къаубытыгъ. ТIури апэрэп ешъуагъэу къызэрагъэуцухэрэр. Мыщ фэдэ щысабэ къэпхьын плъэкIыщт.

ШышъхьэIу мазэр къызихьагъэм къыщыублагъэу ятIуанэу ешъуагъэу рулым Iусыгъэ нэбгыри 7 автоинспекторхэм къаубытыгъ. Ахэм яавтомобильхэр аIахыгъэх ыкIи хэушъхьафыкIыгъэ уцупIэм дагъэу­цуагъэх.

Адыгеим иполицие шъугу къегъэкIыжьы, Урысыем и Уголовнэ кодекс къызэрэдилъытэрэмкIэ, ятIуанэу ешъуагъэу къаубытыгъэм илъэси 2-м нэс хьапс тыралъхьан алъэкIыщт.

Телефон гъэп­­цIакIор къыхагъэщыгъ

2020-рэ илъэсым, гъатхэм Красногвардейскэ районым щыпсэурэ цIыфым гъэпцIагъэ зыхэлъ бзэджэшIагъэ дызэрахьагъэу агъэунэфыгъ. Лажьэ зырахыгъэм къызэриIуагъэмкIэ, гъэпцIакIом къыфигъэхьыгъэ счетым сомэ мин 30 фыригъэхьагъ.

Мы Iофым епхыгъэу полицием икъулыкъушIэхэм игъэкIотыгъэ уплъэкIунхэр зэхащагъэх ыкIи уголовнэ Iоф къызэIуахыгъ.

ЕтIани бэ темышIэу мы хъугъэ-шIагъэм ехьщыр мы районым щызэрахьагъэу полицием къэбар къыIэкIэ­хьагъ. ХэбзэухъумакIохэм оперативнэ уплъэкIун Iоф­тхьабзэу зэрахьагъэхэм къахэкIэу Iудзыгъэ шIыкIэм тетэу гъэпцIагъэ зыхэлъ бзэджэшIагъэ зезыхьагъэр къычIагъэщыгъ. ГъэпцIакIор Краснодар краим щы­псэоу полицием ыгъэунэфыгъ.

Ащ икъэубытын АР-м хэгъэгу кIоцI IофхэмкIэ и Министерствэ Росгвардием иподразделение икъулыкъушIэхэр къыхигъэлэжьагъэх.

Телефон гъэпцIакIом епхыгъэ къэбарыр зэкIэ къыз­IэкIагъахьи, Адыгеим иполицие икъулыкъушIэхэр гъу­нэгъу шъолъырым командировкэ кIуагъэх. Къулы­къушIэхэм оперативнэ Iофтхьабзэу зэрахьагъэхэм яшIуагъэкIэ Краснодар краим щыпсэурэ илъэс 43-рэ зыныбжь хъулъфыгъэр къаубытыгъ. Полицием иIофы­шIэхэм зэрагъэунэфыгъэмкIэ, мыщ фэдэ гъэпцIагъэ зыхэлъ бзэджэшIагъэхэр ыпэкIи зэрэзэрихьагъэм къыхэкIэу мызэу, мытIоу ащ хьапс телъыгъ.

Зэгуцафэхэрэм иунэ къызалъыхъум телефонхэр, сим-картэхэр, нэмыкI пкъыгъохэр къырагъотагъэх. БзэджашIэм иIоф Адыгеим щаIощт. Зэрагъэунэфы­гъэмкIэ, зэрарэу цIыфхэм къафихьыгъэр сомэ мин 500-м ехъу. БзэджашIэр ышIагъэм еуцолIэжьыгъ.

Мы уахътэм ехъулIэу гъэпцIагъэ зыхэлъ бзэджэшIагъэ зэрэзэрихьагъэмкIэ уголовнэ Iофи 3 Адыгеим къыщыфызэIуахыгъ. Джыри Iофи 7-мэ ахэплъэх.

Гъогогъуи 7-рэ кушъхьэ­фачъэр атыгъугъ

Мы аужырэ уахътэм кушъхьэфачъэр зэратыгъурэм епхыгъэ хъугъэ-шIагъэхэм япчъагъэ хэхъуагъ. Ахэм лъапсэ афэхъурэр кушъхьэфачъэр зиехэр ащ лъымыплъэхэу къызэрагъанэрэр ары.

ШышъхьэIур къызихьагъэм щыублагъэу Адыгеим кушъхьэфэчъи 7 щатыгъугъ. Нахьыбэу мы хъугъэ-шIагъэр зыщагъэунэфыгъэр Тэхъутэмыкъое районыр ары.

Къалэу Мыекъуапэ щыпсэурэ илъэс 44-рэ зыныбжь хъулъфыгъэм икушъхьэфачъэ псыхъом инэпкъ дэжь щыIуафыгъ. Мыщ фэгъэхьыгъэ лъыхъон Iофтхьабзэхэр полицием зэрехьэх.

Тэхъутэмыкъое районым щыпсэурэ илъэс 34-рэ зыныбжь хъулъфыгъэм икушъхьэфэчъитIу шIуаты­гъугъ. Оперативнэ-лъыхъун Iофтхьабзэу къулыкъушIэхэм зэрахьагъэхэм яшIуагъэкIэ Инэм щыпсэурэ хъулъфыгъэу илъэс 43-рэ зыныбжьыр къаубытыгъ.

Ащ нэмыкIэу мы район дэдэм къатыбэу зэтет унэу дэтым ичIэхьэгъу дэжь щытыгъэ кушъхьэфачъэр зытыгъугъэр къычIагъэщыгъ. Мыщ щыпсэурэ хъулъфыгъэу илъэс 38-рэ зыныбжьым ытыгъугъэр къыIахы­жьыгъ.

Къэзыгъэхьазырыгъэр КIАРЭ Фатим.