Адыгеим и ЛIышъхьэу КъумпIыл Мурат зэпахырэ узхэм апэуцу­жьы­гъэнымкIэ Адыгэ Республикэм исанитар комиссие изэхэсыгъо ты­гъуа­сэ зэрищагъ.

Коронавирусым зызыщиу­шъомбгъурэ лъэхъаным псауныгъэм икъэухъумэн фэгъэзэгъэ IэзапIэхэр пэтхъу-Iутхъум еIэзэгъэным зэрэфэхьазырхэм, гриппымрэ пэтхъу-Iут­хъумрэ цIыфыбэмэ къызяута­лIэкIэ, социальнэ псэуалъэхэмрэ гъэсэныгъэмкIэ учреждениехэмрэ Iоф ашIэным зэрэфэхьазырхэм атегущыIагъэх.

«Псауныгъэм икъэухъумэн епхыгъэ Iофыгъохэм джыдэдэм лъэшэу тынаIэ атетэгъэты. Коронавирусым лъэшэу зыкъызештэм медицинэ учреждениехэм зэдырагъаштэу Iоф зэрашIагъэр, отраслэм амалэу иIэ­хэм зэрахигъэхъуагъэр хэзгъэу­нэфыкIы сшIоигъу. Медицинэ IофышIэхэу непи яIофшIэпIэ чIы­пIэхэм аIутхэм псэемыблэжьныгъэрэ лIыгъэшхорэ мыщкIэ къызхагъэфагъ. Ахэм нэбгырэ пчъагъэмэ ящыIэныгъэ къагъэ­нэжьыгъ, япсауныгъэ зэтыра­гъэуцожьыгъ. Ау ащ дакIоу къыхэгъэщыгъэн фае Iофхэм язытет непи зэрэхьылъэр, джыри тыгупсэфы зэрэмыхъущтыр», — къыIуагъ Адыгэ Республикэм и ЛIышъхьэ.

Бжыхьэ-кIымэфэ лъэхъаным Урысыеми, зэрэдунаеуи чъыIэ къызыхахьэхэрэм, гриппыр, пэтхъу-Iутхъур къызэуталIэхэрэм япчъагъэ анахьэу хэхъо. Экспертхэм къызэраIорэмкIэ, коронавирусымкIэ Iофхэр джыри къэдэижьынхэ ылъэкIыщт.

«ЦIыфхэр щынэгъуапIэ зэрифэн ылъэкIыщтхэр къыдэ­лъытэгъэн, тхьамыкIагъоу къэ­хъун ылъэкIыщтхэм пэшIоры­гъэшъэу зафэгъэхьазырыгъэн фае. Тисымэджэщхэмрэ поликлиникэхэмрэ зыпкъ итэу Iоф ашIэн, цIыфхэм медицинэ IэпыIэгъу дэгъу арагъэгъотын фае», — къыхигъэщыгъ Адыгеим и ЛIышъхьэ.

Республикэм и ЛIышъхьэ зэ­рилъытэрэмкIэ, коронавирусым зимыушъомбгъуным пае Iофхэм язытет джыри гъунэ лъафын фае. Шэпхъэ гъэнэ­фагъэхэм джыри татемыхьа­жьынымкIэ узхэм защыдзые­гъэным мэхьанэшхо иI.

«Гриппыр къямыутэлIэнымкIэ цIыфхэр прививкэ ашIыхэу мы илъэсым иIоныгъо аублэщт. Урысые Федерацием и Президент пшъэрылъ къафишIыгъ цIыфхэм япроцент 60-мэ вакцинэр ахалъхьанэу. Джащ пае къэбар жъугъэм имуниципальнэ амалхэр къызыфэжъугъэфедэх, цIыфхэм шъуадэгущыI. ИщыкIагъэу зыхъурэм цIыфхэр поликлиникэхэм яшъущалIэх. Предприятиехэм ащылажьэ­хэрэм гриппыр къямыутэлIэнымкIэ амалхэр зешъухьэх. Коронавирусым пэуцужьыгъэнымкIэ Iэзэгъу уцэу агъэхьа­зырыгъэм нэмыкIэу, пэтхъу-Iутхъухэм яIэзэгъэным паекIи Iэ­зэгъу уцхэм яIэпэчIэгъанэ зэгъэуIугъэн фае», — къыIуагъ КъумпIыл Мурат.

Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем зэ­хэсыгъом къызэрэщиIуагъэмкIэ, нэбгырэ 3195-мэ коро­нави­русыр республикэм къы­щяу­тэ­лIагъ; джыдэдэм нэбгырэ 361-мэ сымэджэщхэм къа­щя­Iазэх, нэбгырэ 372-мэ амбу­латорнэу яIазэх, пстэумкIи нэ­бгырэ 25-мэ ядунай ахъо­жьыгъ.

Министрэм зэхэсыгъом къызэрэщиIуагъэмкIэ, илъэс къэс нэбгырэ мин 46-м фэдизмэ гриппымрэ пэтхъу-Iутхъу уз зэ­фэшъхьафхэмкIэ къяуталIэх. Ащ фэдэ сымаджэхэр республикэм имедицинэ учреждениехэм зэратырагощэщтхэ шIыкIэри агъэнэфагъ. Апэрэ чэзыоу ахэр стационар-обсерваторхэм ащэщтых, коронавирус яIэу къызыхагъэщыкIэ республикэ инфекционнэ сымэджэщым, Мыекъопэ къэлэ, Инэм район сымэджэщхэм ащыIэ госпи­тальхэм ащэщтых.

Коронавирусыр къызыхамыгъэщырэ кIэлэцIыкIухэмрэ на­хьыжъхэмрэ республикэ ин­фекционнэ сымэджэщым, Инэм район сымэджэщым, Мыекъопэ районым игупчэ район сы­мэджэщ, Джэджэ районым игупчэ район сымэджэщ, рес­публикэ кIэлэцIыкIу сымэджэщым къащяIэзэщтых. ПстэумкIи ахэм апае пIэкIор 204-рэ агъэ­нэфагъ. Гриппымрэ пэтхъу-Iутхъумрэ агъэгумэкIыхэрэр на­хьыбэ зыхъукIэ, чIыпIэ 479-м нэсэу агъэхьазырыщт.

Республикэм и ЛIышъхьэ муниципалитетхэм япащэхэм пшъэрылъ афишIыгъ мы IофымкIэ псауныгъэр къэухъумэгъэнымкIэ министерствэм IэпыIэгъу фэхъунхэу.

Роспотребнадзорым Адыгэ РеспубликэмкIэ и ГъэIорышIапIэ ипащэу Сергей Завгороднем къызэритыгъэмкIэ, нэбгырэ мин 280-рэ прививкэ ашIыщт. Ащ пае республикэм джыри вакцинэ мин 55-рэ къызIэкIигъэхьан фае. ЛэжьэкIо 50-м ехъу зыIут организациехэм республикэм исанитар врач шъхьаIэ зыкIэтхэжьыгъэ тхылъыр афагъэхьыщт, IофшIапIэм Iутхэм вакцинэр зыхырагъэлъхьанэу ащ итыщт.

Гурыт еджапIэхэр илъэсыкIэ еджэгъум зэрэфэхьазырхэр Адыгэ Республикэм гъэсэны­гъэмрэ шIэныгъэмрэкIэ ими­нистрэ иапэрэ гуадзэу Евгений Лебедевым къыIотагъ. КъэкIощт тхьэмафэм гурыт еджапIэхэм аIутхэм зыкъаухъумэжьынымкIэ ящыкIэгъэ пкъыгъохэр, еджэныр щынэгъончъэу зэхэщэгъэнымкIэ оборудованиер зэращэфыщт ахъщэр муниципалитетхэм къа­IэкIэхьащт. Республикэ бюджетым а гухэлъхэм апае сомэ миллион 30 къыхагъэкIыщт.

Зэхэсыгъом икIэух респуб­ликэм и ЛIышъхьэ Iофыгъоу зыхэплъагъэхэмкIэ пшъэрылъ гъэнэфагъэхэр афишIыгъэх, кIэ­лэегъаджэхэм, врачхэм, социальнэ IофышIэхэм прививкэ зарагъэшIыным мэхьанэшхо зэриIэр агу къыгъэкIыжьыгъ.

Адыгэ Республикэм и ЛIышъхьэ ипресс-къулыкъу