Адыгеим социальнэ-экономикэ хэхъоныгъэ ышIыным фытегъэпсыхьэгъэ унэе программэр гъэцэкIагъэ зэрэхъурэм щытегущыIагъэх АР-м и ЛIышъхьэу КъумпIыл Мурат тыгъуасэ зэхищэгъэ зэхэсыгъом.

Iофтхьабзэм хэлэжьагъэх Адыгеим экономикэ хэхъоны­гъэмкIэ ыкIи сатыумкIэ иминист­рэу Геннадий Митрофановыр, республикэм псауныгъэр къэу­хъумэгъэнымкIэ иминистрэу Мэ­рэтыкъо Рустем, АР-м псэо­лъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ ипащэ иапэрэ гуадзэу Лафышъэ Рэмэзан, культурэмкIэ минист­рэм иапэрэ гуадзэу Ольга Гавшинар, шъолъырым финансхэмкIэ иминистрэ иапэрэ гуадзэу Екатерина Косиненкэр, АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат, рес­публикэм икъэралыгъо бюджет учреждениеу «Стройзаказчи­кым» ипащэу Абрэдж Аслъан, Мыекъопэ къэлэ администра­цием ипащэ ипшъэрылъхэр зы­гъэцэкIэрэ Сергей Стельмах, Тэхъутэмыкъое районым ипсэу­пIэхэм япащэхэр.

Адыгеим и ЛIышъхьэ зэхэсыгъом пэублэ псалъэ къыщишIызэ къыхигъэщыгъ шъолъырым со­циальнэ-экономикэ хэхъоныгъэ ышIыным фытегъэпсыхьэгъэ унэе программэм игъэцэкIэн сыд фэдэрэ лъэныкъокIи мэхьанэшхо зэриIэр.

— Мы программэм ишIуа­гъэкIэ пшъэрылъыбэхэр зэшIотхынхэ тлъэкIыщт, инфраструктурэм ыкIи социальнэ мэхьанэ зиIэ псэуалъэхэм ягъэпсынкIэ амалышIу тиIэщт, а пстэури цIыфхэм ящыIэкIэ-псэукIэ на­хьышIу хъуным фэIорышIэщт. Мы IофшIэнымкIэ УФ-м и Правительствэ къыдгот, IэпыIэгъу къытфэхъу, — къыIуагъ КъумпIыл Мурат.

Унэе программэм ипроектхэм ащыщ автомобиль гъогоу «Дахъо — Лэкъо-Накъэ» игъэ­кIэжьын. Ащ епхыгъэ IофшIэнхэр рагъэжьагъэх.

Псэуалъэм изэтегъэпсыхьан зэхэщагъэ зэрэхъурэм лъып­лъэн­хэ, чIыгум епхыгъэ Iофы­гъохэр псынкIэу зэшIохыгъэнхэм анаIэ тырагъэтын зэрэфаер республикэм ипащэ хигъэунэфыкIыгъ, ащкIэ профильнэ министерствэм пшъэрылъ гъэнэфагъэхэр фишIыгъэх.

Мэхьанэшхо зиIэ инфраструктурэ псэуалъэхэм ащыщэу гъэстыныпхъэ шхъуантIэр зыщы­зэбгыращырэ станциеу «Краснооктябрьскэм» гъэцэкIэжьынхэр рашIылIэнхэу щыт. Непэрэ мафэм ехъулIэу тхьапэхэр агъэ­хьазырых, нэмыкI IофшIэнхэр зэхащэх.

Адыгеим и ЛIышъхьэу КъумпIыл Муратрэ ПАО-у «Газпром» зыфиIорэм иправление итхьаматэ игуадзэу Виталий Маркеловымрэ зэдыряIэгъэ зэдэгущыIэгъум шъолъырым гъэстыныпхъэ шхъуантIэр къыIэкIэ­хьаным иIофыгъохэмкIэ IэпыIэгъу ыгъотынэу зэзэгъыгъэх. Ащ пае IофшIэкIо куп зэхащэнэу зэдаштагъ.

Джащ фэдэу Мыекъуапэ дэс сабыибэ зэрыс унагъохэм псэу­пIэхэр зытырашIыхьанхэ алъэ­кIыщт чIыгу Iахьхэм инженернэ инфраструктурэр ащыгъэпсыгъэ­ным иIофыгъуи зэхэсыгъом къы­щаIэтыгъ. Сергей Стельмах къызэриIуагъэмкIэ, проектнэ­-сметнэ документацием игъэ­хьазырын ыкIэм фэкIуагъ, мы илъэсымкIэ муниципалитетым ищыкIэгъэ мылъкур IэкIэлъ.

Мы IофшIэным пшъэдэкIы­жьышхо пылъэу къекIолIэгъэн зэрэфаер, шэпхъэшIухэм ади­штэрэ коммуникациехэр щыIэхэ зыхъукIэ чIыгу Iахьэу къаратыгъэхэм цIыфхэм псынкIэу псэупIэхэр ащашIынхэ, ащ дакIоу яунагъохэм псэукIэ амалэу яIэхэр нахьышIу ашIынхэ зэра­лъэкIыщтыр КъумпIыл Мурат къыхигъэщыгъ.

АР-м и ЛIышъхьэ ипресс-къулыкъу