Урысые зэнэкъокъоу «Илъэсым иуна­гъу» зыфиIоу лъэпкъ проектэу «Де­мо­графием» къыхиубытэу зэха­щэрэм текIоныгъэ къыщыдихыгъ Адыгеим щыщ унагъом.

Унагъом имэхьанэ къэIэтыгъэным, пшъэдэкIыжьэу ны-тыхэм яIэн фаер къагурыIоным ар тегъэпсыхьагъ, 2016-рэ илъэсым къыщыублагъэу зэхащэ, кIэщакIохэр Урысые Федерацием IофшIэнымкIэ ыкIи социальнэ ухъумэнымкIэ и Министерствэрэ сабыйхэу чIыпIэ къин ифагъэхэм Iэпы-Iэгъу ягъэгъотыгъэнымкIэ Фондымрэ.

Тикъэралыгъо лъэпкъ ыкIи культурнэ зэфэмыдэныгъэу илъыр унагъохэм ящысэкIэ, ахэм ятарихъ, Iофэу ашIэрэмкIэ, ятворчествэкIэ, сабыйхэр зэрапIурэмкIэ, нахьыжъхэр зэ­ралъытэрэмкIэ, хабзэхэр къызэраухъумэхэрэмкIэ къэгъэлъэ­гъогъэным зэнэкъокъур фэIорышIэ.

Унэгъо анахь дэгъухэр лъэныкъуитфыкIэ къыхахых: «Сабыибэ зэрыс унагъу», «Унэгъо ныбжьыкI», «Къуаджэм щыпсэурэ унагъу», «Урысыем иунэгъо дышъ», «Унагъор — хабзэхэм яухъумакIу».

Тызыхэт илъэсымкIэ лъэныкъоу «Унагъор — хабзэхэм яухъумакIу» зыфиIорэм текIоныгъэ къыщыдихыгъ НэмытIэ­къохэу Аслъан Андзаур ыкъорэ МулиIэт Сэфэрбый ыпхъурэ яунагъоу Теуцожь районым щыпсэурэм.

«Илъэсым иунагъу» зыфиIорэ Урысые зэнэкъокъум щытекIуа­гъэхэр мэфэкI шIыкIэкIэ за­гъэшIощтхэр шэкIогъу мазэм и 29-р ары, онлайн шъуашэм итэу ар рагъэкIокIыщт. Мы унагъом фэгъэхьыгъэ къэбар игъэкIотыгъэр тигъэзет нахь кIасэу къыхиутыщт.

Къэбарыр АР-м IофшIэнымрэ социальнэ хэхъоныгъэмрэкIэ и минис­терствэ къытIэкIигъэхьагъ