КIэлэеджакIохэм ягъэшхэн
УблэпIэ классхэм арыс кIэлэеджакIохэм ыпкIэ хэмылъэу шхын стыр аIэкIэгъэхьэгъэным УФ-м и Президентэу Владимир Путиныр ары кIэщакIо фэхъугъэр. Добавить новую
Илъэсэу тызыхэтым имэзае Джэпсалъэу къышIыгъэм ар къыщиIогъагъ ыкIи пшъэрылъ гъэнэфагъэхэр къышIыгъагъэх. Ахэр гъэцэкIэгъэнхэм фэшI ащ фэгъэхьыгъэ хэбзэгъэуцугъэр мэзаем и 18-м УФ-м и Къэралыгъо Думэ ыштагъ.
Шапхъэхэм адиштэу гъэхьазырыгъэ ыкIи псауныгъэмкIэ шIуагъэ къэзытырэ шхыныгъохэр кIэлэеджакIохэм аIэкIэгъэхьэгъэнхэм фэгъэхьыгъэ законопроектэу апэрэ еджэгъумкIэ аштагъэм ублэпIэ классхэм арысхэм ыпкIэ хэмылъэу шхыныгъо стырхэр ятыгъэнхэр шIокI зимыIэ Iофэу зэрэщытым фэгъэхьыгъэ гъэтэрэзыжьынхэр УФ-м и Президент къыфишIыгъэх. Ахэр къыдэлъытагъэхэу ятIонэрэ еджэгъумкIэ законыр аштагъ. 
2020-рэ илъэсым Iоныгъом и 1-м къыщыублагъэу ащ кIуачIэ иIэ хъущт. ЕджапIэхэр, ащ техническэу зэрэфэхьазырхэм елъытыгъэу, игъорыгъоу техьащтых. УФ-м и Президент пшъэрылъэу къышIыгъэр ыкIи законым къызэрэщыдэлъытагъэр 2023-рэ илъэсым иIоныгъо мазэ и 1-м нэс зэкIэ еджапIэхэр ащ фэхьазырынхэ фаеу ары.
УФ-м и Премьер-министрэу Михаил Мишустиным джырэблагъэ къэралыгъом ипащэ къызэрэщигъэгъозагъэмкIэ, Урысыем ит еджапIэхэм япроцент 75-р ублэпIэ классхэм арыс кIэлэеджакIохэм ыпкIэ хэмылъэу шхын стыр аIакIагъэхьаным фэхьазырых. Владимир Путиным къэнэгъэ процент 25-р зэрэбэм къыкIигъэтхъызэ, мы лъэныкъом фэгъэзагъэхэм нахь гъэлъэшыгъэу Iоф дашIэнэу къафигъэпытагъ.
Апэрэ-яплIэнэрэ классхэм арысхэр ары мы законым къыхиубытэщтхэр. Ахэм зы шхыныгъо ыкIи щай, какао зыфэпIощт шъонэу сабыйхэм аратыхэрэм ащыщэу зы ыпкIэ хэмылъэу аIэкIагъэхьащтыр. Мыщ мылъкоу пэIухьащтыр федеральнэ, шъолъыр ыкIи чIыпIэ бюджетхэм къахэхыгъэщт.
УблэпIэ классхэм арыс кIэлэеджакIохэм ыпкIэ хэмылъэу шхыныгъо стырхэр аIэкIэгъэхьэгъэнхэм пэIухьэрэм субъектхэм яIахьэу халъхьэрэм пае субсидие къаратыжьынэуи къыдэлъытагъ. Ащ ишапхъэхэр УФ-м и Правительствэ къыгъэнэфэщтых.
2020-рэ илъэсым сомэ миллиард 21-рэ ащ пэIуагъэхьанэу агъэнэфагъ. УФ-м и Президент и Джэпсалъэ зигугъу къыщишIыгъэхэр гъэцэкIэгъэнхэм пае бюджетым зэхъокIыныгъэхэр фашIыгъэх, ащ фэгъэхьыгъэ унашъор аштагъ.
АР-м и ЛIышъхьэу КъумпIыл Мурат кIэлэеджакIохэм ягъэшхэн изэхэщэн лъэшэу ынаIэ тет, зэкIэ ащ фэгъэзагъэхэм игъом ыкIи икъоу япшъэрылъхэр агъэцэкIэнхэуи афигъэпытагъ. Къэралыгъо Совет — Хасэм икомитетэу гъэсэныгъэм фэгъэзагъэм изэхэсыгъохэми мыщ епхыгъэ Iофхэм мызэу-мытIоу ащытегущыIагъэх. Нэужым ублэпIэ классхэм арыс кIэлэеджакIохэм шхын стыр ыпкIэ хэмылъэу аIэкIэгъэхьэгъэным фэшI, АР-м и Къэралыгъо Совет — Хасэм идепутатхэм гъэсэныгъэм фэгъэхьыгъэ законым ия 6-рэ статья зэхъокIыныгъэхэр фашIыгъэх.
НахьыпэкIэ кIэлэеджакIохэм ягъэшхэн муниципалитетхэр ары фэгъэзэгъагъэхэр. Ащ фэшI фэгъэкIотэнхэр зиIэ унагъохэм къарыкIыгъэ кIэлэцIыкIухэр ары ныIэп ыпкIэ хэмылъэу шхын стыр зыIэкIагъахьэщтыгъэхэр. Джы федеральнэ ыкIи шъолъыр законхэм къазэращыдэлъытагъэмкIэ, гъэсэныгъэм епхыгъэ организациехэм яублэпIэ классхэм арыс кIэлэеджакIохэм зэкIэми ащ фэдэ амал яIэщт.
Республикэ законэу аштагъэм игъэцэкIэн мы илъэсым иIоныгъо мазэ къыщыублагъэу тыгъэгъазэм ыкIэм нэс сомэ миллион 18-рэ мин 595,5-рэ шъолъыр бюджет ахъщэу пэ-Iуигъэхьащт, къэкIорэ 2021-рэ илъэсым сомэ миллион 45-рэ мин 989,4-рэ тефэщт.
ХЪУТ Нэфсэт.