«ЭкоЦентрэм» къеты
Нахьыбэу зэхадзы хъугъэ
ИлъэскIэ узэкIэIэбэжьмэ пластикым хэшIыкIыгъэ пкъыгъохэр шъхьафэу цIыфхэм ратэкъонхэу контейнерхэр пыдзэфэ пытэхэм ядэщын фэгъэзэгъэ шъолъыр операторым ыгъэуцугъэх.
Нэужым къызэрэнэфагъэмкIэ, Адыгеим щыпсэухэрэм ахэр игъоу алъытагъ, нахьыбэуи агъэфедэхэ хъугъэ.
Ащ фэдэ пкъыгъохэр тхьамафэм зэ Iущыгъэнхэу графикым итыгъ ау, джы зэрэхъугъэмкIэ, ар макIэ. Гъэмэфэ мэфэ фабэхэм пластикым хэшIыкIыгъэ бэшэрэбхэм арыт псыр нахьыбэу цIыфхэм агъэфедэ ыкIи контейнерхэр охътэ кIэкIым ушъагъэ мэхъух.
Ащ фэшI шышъхьэIу мазэу тызыхэтым региональнэ операторым графикыр нэмыкI ышIыгъ. Джы ахэр тхьамафэм тIо, бэрэскэжъыемрэ тхьэумафэмрэ, Iуещых.
Шъугу къэтэгъэкIыжьы, ащ фэдэ контейнерым пластикым хэшIыкIыгъэ псэуалъэу литритфым нахьыбэ зэрымыфэхэрэр ары ишъудзэщтыр. Ахэм ахэхьэх псы, квас, сок, щэ, кефир ыкIи нэмыкI шъонхэр, дагъэр, бытовой химиер зэрытхэр, ау щатэ, йогурт, нэмыкIэу щэм хэшIыкIыгъэхэр, кIэнкIэ, майонез, кофе, щай, чипсхэр, цэхэр зэралъэкIырэ пастэхэр зэрылъыгъэхэр арышъутакъо хъущтэп.
ХэкIыр зыщыIуащырэ уахътэм епхыгъэ упчIэ зиIэр мы телефонхэмкIэ къытеон ылъэкIыщт: 8-800-707-05-08, 8(8772)21-06-00, 8-962-868-14-62.
Унэр загъэкIэжьыгъэм ыуж
Программэ гъэнэфагъэм къыщыдэлъытагъэу фэтэрыбэу зэхэт унэхэр республикэм етIупщыгъэу щагъэкIэжьых.
ПсэолъэшIхэм унашъхьэхэр, псым, фабэм якIуапIэхэр, шъхьаныгъупчъэхэр зэблахъух, нэмыкIэу ащызэшIуахырэр бэ. Ахэм ауж пыдзэфэ инхэр щагухэм адиз мэхъух. Хэта ар Iузыщырэр?
ПсэолъэшIын IофшIэнхэм къапызыгъэ пыдзафэхэр дэщыгъэнхэм фэгъэхьыгъэ тхылъыр къызатыкIэ, ащ къыпкъырыкIызэ региональнэ операторым дещых.
— Ащ фэдэ пыдзафэхэм яIущын подрядчикэу унэр зыгъэкIэжьыгъэр ары зипшъэрылъыр. Ащ пае зэзэгъыныгъэ ышIынэу хэбзэгъэуцугъэми къыщеIо. ХэкIыр Iуимыщымэ тазыр ытыщт. IофшIэнхэр еухыфэкIэ емыжэу, тIэкIу-тIэкIоу даригъэщыныр нахь тэрэз. ЗиIофшIэн хэшIыкI фызиIэ подрядчикхэм ар агъэцакIэ, пыдзафэхэр бэу зэIуагъакIэхэрэп, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый.
Пыдзафэхэм ядэщын фэгъэхьыгъэ тхылъыр пэIудзыгъэ шIыкIэм тетэу интернет нэкIубгъом щыптын плъэкIыщт. Мары адресыр: https:adygeya.clean-rf.ru. Джащ фэдэу офисхэм уякIуалIэми хъущт: МыекъуапэкIэ урамэу Пионерскэр, 297-рэ, поселкэу ЯблоновскэмкIэ урамэу Школьнэр, 10/1.
ООО-у «ЭкоЦентрэм» и Адыгэ шъолъыр къутамэ ипресс-къулыкъу