ПшъэдэкIыжь рагъэхьыгъ

Джэджэ районым щыпсэурэ хъулъ­фыгъэм кIэлэпIупкIэр зэримытырэм къыхэкIыкIэ лъыхъущтыгъэх. Мы ма­фэ­хэм ар зыдэщыIэр агъэунэфыгъ ыкIи административнэ пшъэдэкIыжь рагъэхьыгъ.

Джэджэ район хьыкумым унашъоу ышIыгъэмкIэ хъулъфыгъэм къыгъахъэрэм ызыныкъо исабый ритынэу щытыгъ. Ау ар ыгъэцэкIэным дэгуIэщтыгъэп, ар хэгъэкIи, хьыкум приставхэм бэрэ зашIуигъэбылъэу хэтыгъ. Ащ къыхэкIыкIэ лъыхъунхэу рагъэжьагъ. А уахътэм ехъулIэу чIыфэу зэIуигъэкIагъэр сомэ мин 70-м кIэхьагъ.

Хьыкум приставхэм Iофтхьабзэу зэхащагъэхэм ишIуагъэкIэ ар зыдэщыIэр агъэунэфын алъэкIыгъ ыкIи ащ ылъэныкъокIэ административнэ протокол зэхагъэуцуагъ. Джэджэ районым ихьыкум участкэу N 2-м изэгъэшIужь хьыкумышIэ хъулъфыгъэм лажьэ иIэу ылъытагъ ыкIи мэфи 10 административнэ арест тырилъхьагъ.

Ари зимыгъэцакIэкIэ, уголовнэ Iоф къыфызэIухын алъэкIыщт.

КIэлэцIыкIухэм яфитыныгъэхэр къаухъумэ

КIэлэпIупкIэр игъом зымытыхэрэм язекIуакIэ зэрэмытэрэзыр агуры­гъэ­Iогъэным, зытефэхэрэм пшъэдэкIыжь пхъашэ ягъэхьыгъэным хьыкум при­с­тавхэм анаIэ тет.

Пшъэрылъхэр гъэцэкIагъэ зэрэхъурэм ежь ышъхьэ­кIэ лъэплъэ республикэм ихьыкум пристав шъхьаIэ. Хэбзэгъэуцугъэм мы лъэныкъомкIэ къыдилъытэрэ шапхъэхэр агъэлъэшыгъэх, ны-тыхэу зипшъэрылъхэр зымыгъэцакIэхэрэм уголовнэ Iофхэр къапагъэтаджэхэу къыхэкIы. Ащ Iофыр нэшъумыгъэсэу, алиментхэр игъом ыкIи икъоу шъутынхэу хьыкум приставхэр къышъоджэх.

Хьыкум приставхэм я Федеральнэ къулыкъу и ГъэIорышIапIэу Адыгэ Республикэм щыIэм Iофтхьа-бзэу «Хьыкум приставхэр — кIэлэцIыкIухэм апай» зыфиIорэр илъэс къэс зэхещэ. АлиментхэмкIэ чIыфэхэр къаIыхыжьыгъэным пае зипшъэрылъхэр зымы­гъэцэкIэрэ ны-тыхэм адэжь хьыкум приставхэр макIох, ахэм адэгущыIэх, язекIуакIэ зэрэмытэрэзыр агура­гъаIо. Сабыим ипIункIэ хэбзэгъэуцугъэм къы­гъэ­нэфэрэ лъэныкъохэр зымыгъэцакIэхэрэм адми­нистративнэ пшъэдэкIыжь зэрахьыщтым дакIоу, уголовнэ Iофи къафызэIуахын зэралъэкIыщтыр араIо. ЗэдэгущыIэгъухэм ахэлажьэх динлэжьхэр, муниципальнэ образованиехэм, гурыт еджапIэхэм япащэхэр, къэбар жъугъэм иамалхэм ялIыкIохэр, нэмыкIхэри.

Джащ фэдэу кIэлэпIупкIэр зымытыхэрэм Iоф зыщашIэрэ организациехэм ябухгалтериехэр хьыкум приставхэм ауплъэкIух, охътэ гъэнэфагъэм къэралыгъом икIынхэ зэрэфимытхэм фэгъэхьыгъэ унашъо­хэр ашIых, административнэ хэбзэукъоныгъэ зэрашIы­гъэмкIэ протоколхэр зэхагъэуцох, уголовнэ Iофхэр къызэIуахых, чIыфэ зытелъхэм ямылъку арест атыралъхьэ. Мы унашъохэм зэкIэми пшъэрылъэу яIэр зы — сабыйхэм къатефэрэр игъом ыкIи бырсыр къыпымыкIэу ны-тыхэм къатыныр ары.

Хьыкум приставхэм я Федеральнэ къулыкъу и ГъэIорышIапIэу АР-м щыIэм ипресс-къулыкъу