ИлъэсыкIэ еджэгъур, хабзэ зэрэхъугъэу, къэралыгъомкIи, унагъомкIи, кIэлэцIыкIухэмкIи, кIэлэегъаджэхэмкIи мэхьанэшхо зиIэ Iофыгъоу щыт.

2020-рэ илъэсыр зэпахырэ узэу коронавирусыр тыдрэ чIыналъи зыщыщыхъушIэрэ илъэс. Ащ елъытыгъэу цIыфхэри гумэкIыгъо хэфагъэх. Ини цIыкIуи щыIэкIэ тынчыр зэщымыкъомэ ашIоигъу, ыпэкIэ фэдэу, илъэсыкIэ еджэгъур Iоныгъом и 1-м рагъэжьэжьыным щэгугъых.

ШIэхэу тиеджапIэхэм япчъэ­хэр къызэIуахыжьыщтых. Ащ теубытэгъэ шъыпкъэ иIэуи сшIэрэп, ау егъашIэм илъэсыкIэ еджэгъур Iоныгъом и 1-м ра­гъэжьэжьыщтыгъэшъ, джыри аущтэу хъунэу тыфай. Тигу­хэлъхэр зэфэдэхэу зы гъогу тызэдытетэу еджапIэм тыкIуагъ, тисабыйхэр бжыхьэ мэзэ гухахъом еджэпIэ хъоо-пщаухэм ренэу якIужьыщтыгъэх. Джыри аущтэу кIэлэегъэджэ нэгу ихыгъэхэр сабый гу къэбзэ цIыкIу­хэм къапэгъокIынхэу тэлъаIо! ТикIэлэцIыкIухэм гъогу мафэкIэ яеджэн рагъэжьэжьынэу тафэлъаIо! Янэ-ятэхэр ягъусэхэу, еджакIохэр гъэкIэрэкIагъэхэу, къэгъагъ Iэрамхэм къагъэ­да­хэхэу, ячэф-гушIо макъэ зиIэтэу, илъэсыкIэ еджэгъум иапэрэ мафэ еджэпIэшхом екIолIэжьыщтыгъэх. Джыри ар хамынэу еджакIо, кIэлэегъаджэ пэпчъ зэфэзэщыгъэхэу, зэфэчэфхэу зэIукIэжьынхэу тэгугъэ!

Адыгэ Республикэм ина­хьыжъхэм я Совет итхьаматэу, Гъобэкъуае икIэлэ пIугъэу, адыгэм ижэбзэ къабзэ зыгъэфедэшъоу ГъукIэлI Нурбый журналэу «Зэкъошныгъэм» икIэлэегъэ­джагъэхэм шIулъэгъоу афыриIэмрэ зыдеджагъэхэр зыфэ­дагъэхэмрэ къыригъэхьэгъагъ. Апэрэу мы тхыгъэмкIэ Нурбый итхакIи, игупшысакIи нэIуасэ сыфэхъугъагъ. Ащ ыужми ытхыгъэхэм сяджагъ ижэбзэ бай сшIогъэшIэгъонэу. Мыр сыгу къызфэкIыжьыгъэр еджапIэм кIэлэегъаджэр уапашъхьэ итэу ишIэныгъэрэ игупшысэрэ къызэрэщыпхэхьащтым фэдэу сыд фэдэ техникэкIи уиунэ уисэу узэре­джэрэр зэрэмыхъущтыр ары. Узэлэгъухэм шIу узэрэлъэ­гъоу, узэдеджэ, узэдэджэгу, еджэпIэ нэфынэри ятIонэрэ унэ пфэхъу. Тисабыйхэу тигугъапIэхэм пстэури къадэхъунэу, тидунай зыпкъ иуцожьынэу, яапэрэ кIэ­лэегъаджэ янэ-ятэ-хэм афэдэу дахэкIэ, шIукIэ агу къи­нэжьынэу, ежьхэри еджэгъэ- гъэсагъэхэу, адыгэ лъэпкъыр арыгушхоу шIэныгъэм игъогу рыкIошъунхэу, илъэсыкIэ еджэгъу мафэ къафихьанэу сэ­лъаIо! Сиусэхэр шIухьафтынэу еджэкIо цIыкIухэм афэсэгъэхьы.

Апэрэ класс

Непэ тэгушIо, Непэ тэчэфы. ЕджэпIэ нэфынэм — ТыгуIэу тыкъэкIо.

Бжыхьэм иапэрэ маз, Мазэм иапэрэ маф. Апэрэ класс, Апэрэ гъогу — Гъогу мафэ орэхъу! ТикIэлэегъадж — ТигугъэпIэ дахэр, ТиеджэпIэ гоIу Тыкъыоблэгъагъ. ШIэныгъэм тыфэблэ, Гъогу мафэ орэхъу.

КIэлэегъаджэм сыгурэIо

ЕджэпIэшIум сыщэгушIо, ЕджэпIэшхом сыщэгушхо. КIэлэегъаджэм сыгурэIо, Сэ еджакIэр къызгурэIо.

Тхэн амалри къысIэкIэхьэ. Хьарыф благъэхэр къэкIыхьэх. Хьисап ужым сурэт сэшIы, СшIэрэм ренэу хэсэгъахъо.

Сихъупхъагъэ сигъэтхъэжьзэ, Орэд цIыкIухэр зыфэсIожьзэ, Сяни, сяти сэгъэгушIох. Синыбджэгъухэри сэгъэшIух.

ШIухьафтынхэр нэпэеплъых

ШIухьафтынхэр матэм илъых, Имыфагъэр Iанэм телъ. Нани, тати тэ къытэплъ, Янэплъэгъуи гушIо Iуплъ.

Къысатыгъэр сэ нэрыплъ, Сшыпхъу цIыкIуи иI бгъэхэлъ. СшынахьыкIи лъэпэрапэу, Зыгъэчэфрэр — тэмэтелъ.

Синыбджэгъур тхъоплъ-пэплъ. ФэмыплъэкIрэр шыцIыкIу хьаплъ. ТыгушIопсэу тызэхаплъ. ТимэфэкIи тэ тыпаплъ.

Нани, тати тэ къытэплъ. Янэплъэгъуи гушIо Iуплъ. ЯшIулъэгъуи гугъэ псалъ. ШIухьафтынхэр нэпэеплъ.

Сызфэсакъэу бзыужъый

СимэфэкIым укъысфахь, Бзыу пстэуми уанахь гуахь. ШIу уалъэгъоу узэрахь, Удэхащэшъ агу урехь.

ГъучIы хъагъэм о удэс, Еджэгъу ужым сыкъыпфэс. УсшIодахэу сыпкIэрыс, Нани усэр къыпфеус.

УигъучI хъагъэ ит лъэой, Умзэщынэу уиунай. Къэбгъэдахэрэр — дунай Сызфэщагъэу — попугай.

Гъунджэм ренэу о укъещ, Узэплъыжьы, уемызэщ. Орэд жъынчым кIеогъэщ, Сэ о ренэу сыпфэзэщ.

Хъуны-шхыныр огъэтакъу, Уипсы къаргъуи къисэгъэкъу. ПкIэтэ-лъатэу цIыкIужъый, Сэ сикIасэу Iушыжъый.

Сызфэсакъэу бзыужъый, Зынэ цIыкIухэр щыгъыжъый, Зызигъэпщрэм шъэбэжъый, ЗыIэсэжьрэм — щырыжъый.

Хъут Сар. Адэмый.