Хэгъэгу зэошхом илъэхъан лъфыгъабэу иIэр заом зытIупщи, янахьыбэр зымылъэгъужьыгъэ бзылъфыгъэу Шъхьэлэхъо Чэбэхъан блэкIыгъэ шэмбэт мафэм шапсыгъэ къуаджэу ШIоикъо шIэжь саугъэт къыщыфызэIуахыгъ.

ЛIышъхьэу КъумпIыл Мурат ипшъэрылъкIэ Адыгэ Республикэм илIыкIо куп Iоф­тхьабзэм хэлэжьагъ.

Шъхьэлэхъо Чэбэхъан Хэ­гъэгу зэошхом илъэхъан икIэли 9, икъорылъфи 3 ыкIи инысэ зэпэуцужьхэм ахэлэжьагъэх, хэгъэгур къагъэгъунэзэ кIэли 7-р, зы къорылъфыр ыкIи нысэр хэ­кIодагъэх.

— Хэгъэгу зэошхом ТекIоныгъэр къызщыдахыгъэр илъэс 75-рэ зыщы­хъугъэм ШIоикъо мэхьанэ-шхо зиIэ Iофтхьабзэ щы­зэхащагъ, — къащитхыгъ исоциальнэ нэ­кIубгъохэм КъумпIыл Мурат. — Сыгу къыздеIэу рэзэныгъэ гущыIэхэр афэсэ­гъазэх ащ икIэщакIохэмрэ хэлэжьагъэ­хэмрэ.

ЛIышъхьэм къызэриIуа­­гъэмкIэ, Шъхьэлэхъо Чэ­бэ­хъан ишIэжь саугъэт янэпэ­еплъ хъущт зэуапIэм зилъфы­гъэхэр зытIупщыхи, анахь лъапIэу яIэр — ясабыйхэмрэ ахэм къакIэхъуагъэхэмрэ — къэралыгъом икъэухъумэн Iоф фэзытыгъэ ны пстэуми. Ахэм егъэшIэрэ шIэжьрэ лъытэныгъэрэ къалэжьыгъ.