Зэпахырэ узэу дунаир зэлъызыкIугъэр къызежьагъэм къыщыублагъэу зыныбжь илъэс 65-м шIокIыгъэ тинахьыжъхэмкIэ ыкIи хэужъыныхьэгъэ уз зиIэхэмкIэ щынагъоу зэрэщытыр врачхэм, медицинэм пылъ шIэныгъэлэжьхэм къаIо.

ЗэрагъэунэфыгъэмкIэ, уз гъэтIылъыгъэ зиIэм коронавирусыр къызеуалIэкIэ, ар къе­гъэбырсыры, вирусыр хагъэ­кIыгъэми, адрэм фыримыкъухэу бэрэ къыхэкIы. Ащ фэшI инсульт хъугъагъэу е ащ ищы­нагъо зиIэхэр анахьэу мы зэпахырэ узым зыщызыу­хъумэн фаехэм зэращыщхэр врачхэм емызэщэу къаIо. Гу­хэ­кIми, мызэу, мытIоу ар аужырэ мэзэ зытIуми къагъэлъэ­гъуагъ.

УФ-м зыухъумэжьынымкIэ и Министерствэ игоспитальхэм ащыщ иотделениеу гум хирургическэу зыщеIазэхэрэм ипащэу, медицинэ шIэныгъэхэмкIэ кандидатэу Григорий Громыко гупчэ гъэзет горэм инсультым ищынагъо зышъхьащытхэм коронавирусым иягъэ зэраригъэкIырэм джырэблагъэ къыщытегущыIагъ. Ащ къызэриIорэмкIэ, коронавирусыр къызэолIагъэу ащ хьылъэ е хьылъэдэдэ ышIыгъэм ытхьабыл е ышъхьэкуцI лъыпцIагъэ иуцон ылъэкIыщт. Ары ащ фэ­дэм инсульт къеолIэным ищынагъо шъхьащытэу зыкIалъы­тэрэр. ЛъыпцIагъэм шъхьэкуцIым Iоф езыгъашIэрэ лъынтфэр зызэфишIыкIэ, лъыр рымы­кIо­жьэу ар егъалIэ. Ащ тетэу «ишемический» зыфаIорэ инсультыр цIыфым къео.

Врачым къызэриIотагъэмкIэ, инсультыр зэтырафы. «Геморрагический» зыфаIорэр лъыр лъэшэу зэрэдэкIоягъэм (повышенное давление), шъхьэ­куцIым екIурэ лъынтэфхэр зэ­рэзэщыкъуагъэхэм къахэкIын ылъэкIыщт. ТIумкIи лъынтфэхэр афэмыщыIэу къызэIэутхэшъ, шъхьэкуцIым лъыпцIагъэр еуцо, а зыдэуцогъэ чIыпIэм Iоф ымы­шIэжь ешIы.

«ИшемическэкIэ» заджэхэрэр цIыфым ыныбжь хэкIуатэу илъынтфэхэр зэхэкIыхьэхэмэ е лъыпцIагъэр, нахьыбэрэмкIэ ар гум къекIы, шъхьэкуцIым екIумэ ары къызыхэкIырэр. Гур мыпсаоу, тэрэзэу Iоф ымы­шIэрэмэ, ащ фэдэ инсульт къыз­дихьынкIэ щынагъо мэхъу. «Аритмия сердца» зыфиIорэ узыр врачым щысэу къыхьыгъ ыкIи ар непэ хирургическэ шIы­кIэхэмкIэ зэ­рагъэ­хъужьырэм къыкIигъэт­хъыгъ.

Ишемическэ инсультыр на­хьыбэу бзылъфыгъэхэм къяуа­лIэу ары къызэриIуагъэр.

НыбжьыкIэхэм лъынтфэ уз горэ къадэхъугъэу яIэмэ ары ащ ищынагъо ашъхьащыт зы­хъурэр. Джащ фэдэу цIыфым янэ, ятэ, янэжъ, ятэжъ лъынтфэ, гу узхэр яIагъэхэу, инсульт къяолIэгъагъэу щытмэ, ежьыми ар къеонкIэ щынагъо мэхъу.

Мы уз тхьамыкIагъор къеолIэным ищынагъо зышъхьа­щытхэр, гум епхыгъэ уз зиIэхэр сыдигъокIи япсауныгъэ пстэумэ анахьэу фэсакъынхэ, врачым дэжь игъом кIонхэ, Iэзэгъу уцэу къафыратхыкIы­гъэхэм игъом яшъонхэ фае. Ахэм тутыныр, шъон пытэхэр къаухьанхэ, япсау­ныгъэ къызэтезгъэнэщт шапхъэхэр агъэцэкIэнхэ фае.

Коронавирусым зызэриу­шъомбгъурэм къыщыкIагъ, ар къызэузыхэрэм япчъагъэ нахь макIэ хъугъэ. Арэу щытми, щынагъо джыри щыI. Мыхэм афэдэу зыныбжь хэкIотагъэхэри коронавирусым фэса­къынхэ фае. Сыда пIомэ, джыри зэ къэтэIожьы, COVID-19-р хэужъыныхьэгъэ уз зиIэхэмрэ зыныбжь хэкIотагъэхэмрэ ана­хьэу афырекъу.