АР-м иминистрэхэм я Кабинет зичэзыу планернэ зэ­хэсыгъоу тыгъуасэ иIагъэр зэрищагъ Адыгеим и ЛIышъхьэу КъумпIыл Мурат. Ви­деоселектор шIыкIэм тетэу кIо­гъэ Iофтхьабзэм лъэпкъ проектхэм ыкIи къэралыгъо программэхэм ягъэцэкIэн ща­тегущыIагъэх.

Анахьэу анаIэ зытырадзагъэр шъолъырым социальнэ-эко­номикэ хэхъоныгъэ ышIыным иунэе программ ары.

Республикэм ипащэ къызэ­рэхигъэщыгъэмкIэ, мы илъэсым ыкIэм нэс унэе программэм къыдыхэлъытэгъэ лъэныкъуи 9-м ягъэцэкIэн мылъку апэIуагъэ­хьанэу агъэнафэ.

— IофшIэнышхо зэшIотэхы, мы илъэсымкIэ Iофтхьэбзэ шъхьа­Iэхэм ащыщых гъогум, псауныгъэр къэухъумэгъэным, культурэм ыкIи спортым япхыгъэ псэуалъэхэм яшIын, язэ­тегъэпсыхьан. Пшъэрылъхэм язэшIохын тынаIэ тедгъэтын, ткIуачIэ етхьылIэн фае. Тхьапэхэм ягъэхьазырын къыще­гъэжьагъэу, псэуалъэхэм яшIын ыкIи ятын нэсыжьэу. Ахэр зэкIэ игъом дгъэцэкIэнхэ зэрэ­фаем дакIоу, шапхъэу щыIэхэм адиштэнхэ фае, — къыIуагъ КъумпIыл Мурат.

АР-м экономикэ хэхъоны­гъэмкIэ ыкIи сатыумкIэ иминистрэу Геннадий Митрофановым къызэриIуагъэмкIэ, 2020-рэ илъэсым унэе программэм къыдыхэлъытэгъэ Iофтхьабзэхэм ягъэцэкIэн сомэ миллиардым ехъу пэIуагъэхьащт. Автомобиль гъогоу «Дахъо — Лэ­гъо-Накъэ» игъэкIэжьынкIэ, поселкэу Яблоновскэм Iоф щызышIэрэ культурэм и Унэу «Факел» зыфи­Iорэм, джащ фэдэу псэупIэу Инэм дэт культурнэспорт комплексым игъэкIотыгъэ гъэцэ­кIэжьынхэр яшIылIэгъэнхэмкIэ зэзэгъыныгъэхэр ада­шIыгъэх.

Поселкэу КраснооктябрьскэмкIэ газыр зыщызэбгыращырэ станцием игъэкIэжьын, Мые­къуапэ дэсхэ сабыибэ зэрыс унагъохэм псэупIэхэр ашIынхэмкIэ чIыгу Iахьэу аратыгъэхэм инженернэ инфраструктурэ аращэлIэным, нэмыкI лъэны­къохэмкIи республикэм Iоф­шIэнхэр щылъагъэкIуатэх.