Урысые общественнэ организациеу «Единэ Россием и НыбжьыкIэ гвардие» зыфи­Iорэм ишъолъыр къутамэу Адыгеим итым илIыкIохэр Хэгъэгу зэошхом иветеранэу Иван Дзюбэ дэжь щыIагъэх.

Ахэр апэрэ мафэп зызэ­нэIосэгъухэр. Ау мызэгъэгуми ветераным ыгу къыгъэкIыжьыгъ ищыIэныгъэ гъогу, хьазабэу зэо илъэсхэм ащэчыгъэр. Зэпэуцу­жьыр къызежьэм, Иван Дзюбэ джыри еджапIэм чIэсыгъ, яенэрэ классыр къыухыгъагъ. Илэгъу­бэмэ афэдэу, заор къызежьэм еджэным лъыпимыдзэжьэу, шъо­фым Iоф щызышIэщтыгъэхэм ахэхьагъ, нэужым танкхэм зыщапэуцужьыщтхэ окопхэм ятIын Ставрополь пэмычыжьэу щы­зэшIозыхыщтыгъэхэм ахэтыгъ зэуапIэм щыIэхэм зэрилъэкIэу IэпыIэгъу афэхъоу. Ащ ыуж Урал ащагъ, УIэшыгъэ КIуачIэхэм щахэхьагъ, нахь кIасэу апэрэ Ленинград лъэсыдзэ училищэм агъэкIуагъ. Младшэ лейтенантэу гъэкIэкIыгъэ шIыкIэкIэ ар къыухыгъ ыкIи станковэ пулеметхэм явзвод икомандир IэнатIэм Iуагъэхьагъ. Апэрэ Белорусскэ зэуапIэм Iутэу пыим пэуцужьыгъ.

Заор къызаухым Иван Дзюбэ дзэм бэрэ къулыкъу щи-хьыгъ ыкIи зэтегъэуцожьын IофшIэнхэм ахэлэжьагъ.

Джырэ уахътэм зыщыпсэурэ къалэу Мыекъуапэ ветераныр дэгъоу щашIэ ыкIи щагъэлъапIэ. Ар зыщыпсэурэ щагур ары Мыекъопэ гарнизоным иоркестрэ мэфэкI маршкIэ ТекIоныгъэм и Мафэ ехъулIэу зыдэхьэгъагъэр, ветераным имэфэ анахь шъхьаIэ зэрифэшъуа­шэу иунэ щигъэмэфэкIын амал иIэным фэшI. Шъошэ зэкIужьыр щыгъэу ветераныр ихьакIэхэм къапэгъокIыгъагъ.

Ащ къыпэу Iофтхьабзэу «Палисадник Победы» зыфиIорэм къыхиубытэу иунэ чIэхьапIэ волонтерхэм къэкIхэрэр ща­гъэтIысхьэгъагъ, къэгъагъэхэм азыфагу ветераным ыцIэ зытетхагъэр хагъэуцогъагъ блэ­кIырэ пэпчъ ылъэгъунэу къэ­ра­лыгъор къэзыухъумагъэр, Хэ­гъэгу зэошхом иветеран мыщ зэрэщыпсэурэр.

«Мыщ фэдэ Iофтхьабзэхэр амалышIух зэуапIэм Iутыгъэхэм тирэзэныгъэ афитIотыкIынымкIэ, лъытэныгъэу афэтшIырэр къэдгъэлъэгъонымкIэ. НыбжьыкIэхэм тырягъусэу мэфэкIхэм ямызакъоу, илъэс реными ты­наIэ атетыным тыпылъ. Агухэр зэIухыгъэхэу, сыд фэдэрэ уахъти IэпыIэгъу хъунхэу ахэм къа­хэкIырэр макIэп. Iофтхьабзэу «ТекIоныгъэм иIорытх» зыфи­Iорэр Хэгъэгу зэошхом фэгъэ­хьыгъэ шIэныгъэхэр зыщыу­уплъэкIушъущтхэ Iофтхьабзэу щыт. ХьэкIэ лъапIэхэу ащ къед­гъэблагъэхэрэр зэпэуцужьым хэлэжьагъэхэр арых. ТиныбжьыкIэхэм арэлъэгъу ти ЛIы­хъужъхэр, ахэм щысэ атыра­рэх», — къыIуагъ Урысые общественнэ организациеу «Еди-нэ Россием и НыбжьыкIэ гвар­­дие» зыфиIорэм ишъолъыр къутамэу Адыгеим итым ипащэу, Мыекъуапэ идепутатэу Бэрзэдж Асиет.