ХэбзэухъумакIохэм къаты
Нэбгырэ 41-рэ къаубытыгъ
Адыгэ Республикэм хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и Къэралыгъо автоинспекцие къызэритырэмкIэ, шышъхьэIум и 3-м щегъэжьагъэу и 9-м нэс шъолъырым игъогухэм хъугъэ-шIэгъэ 13 къатехъухьагъ, ахэм апкъ къикIыкIэ нэбгырэ 20-мэ шъобжхэр атещагъэхэ хъугъэ.
Джащ фэдэу гъогурыкIоным ишапхъэхэр гъогогъу 2700-рэ аукъуагъэу хэбзэухъумакIохэм къыхагъэщыгъ. Ешъуагъэу машинэр зезыфэщтыгъэ водитель 41-мэ административнэ пшъэдэкIыжь арагъэхьыгъ. Мыщ фэдэ хъугъэ-шIагъэхэр нахьыбэу зыщагъэунэфыгъэхэр Мыекъуапэрэ Тэхъутэмыкъое районымрэ.
ЛъэсрыкIуи 168-мэ алъэныкъокIэ административнэ протоколхэр зэхагъэуцуагъэх.
ПшъэдэкIыжь рагъэхьыщт
ХэбзэухъумэкIо къулыкъухэм оперативнэ-лъыхъон Iофтхьабзэхэр рагъэкIокIызэ Краснодар краим щыпсэурэ илъэс 29-рэ зыныбжь кIэлакIэм хэбзэнчъэу наркотикхэр къыригъэкIокIынхэ ылъэкIыщтэу къэбар къаIэкIэхьагъ.
Хъулъфыгъэр республикэм икъэлэ шъхьаIэ къыщаубытыгъ. КъызэрэнэфагъэмкIэ, ащ гъэбылъыпIэ чIыпIэ иIагъ, оперативникхэм ар къызалъыхъум зэкIоцIыщыхьэгъэ пкъыгъо 40 къырагъотагъ, ахэм наркотик зэрахылъэр экспертизэм къыгъэлъэгъуагъ. Къагъотыгъэр зэкIэмкIи грамм 27-м ехъу.
КъэIогъэн фае, нэмыкI бзэджэшIагъэ зэрихьагъэу зэрегуцафэхэрэм къыхэкIэу хъулъфыгъэм ылъэныкъокIэ уголовнэ Iоф къызэIуахыгъэу щытыгъ. Лажьэ иIэу загъэунэфыкIэ илъэс 20-м нэс хьапс къыхьын ылъэкIыщт.