Уахътэр псынкIэу макIоми, хъугъэ-шIагъэхэр гъашIэм хэкIуакIэхэрэп. Абхъазымрэ Грузиемрэ заокIэ зызэпэуцухэм, зыкIи тызэмыгупшысэгъэ Iофхэр Кавказ шъолъырым къитэджагъэх.

Грузием иуIэшыгъэ купхэм заом кIагъэстызэ, Абхъазым ичIыгу щыхъушIэщтыгъэх. А уахътэм ежьхэм агу къызэрэриIорэм тетэу Абхъазым гъусэ фэхъугъэ­хэм Адыгеим щапIугъэ кIалэхэр ащыщыгъэх.

— Заом иапэрэ мафэхэм Абхъазым тызэрэкъоуцуагъэм общественнэ-политикэ мэхьэнэ ин иIагъ, — къеIуатэ Адыгэ Рес­публикэм иобщественнэ организациеу «Абхъазым игуфакIохэм я Союз» ипащэу Къуижъ Къэплъан. — ШъхьарытIупщэу Аб­хъазым кIалэхэр мыкIонхэм фэшI республикэ общественнэ движениеу «Адыгэ Хасэм» щатхыщтыгъэх. — Чэчэным, Къэбэртэе-Бэлъкъарым, Дагъыстан, Къэрэщэе— Щэрджэсым, Краснодар краим, фэшъхьафхэм ащыщ кIалэхэри Абхъазым гъусэ фэхъугъагъэх, — зэдэгущыIэгъур лъегъэкIуатэ Беданыкъо Нихьад. — Мые­къуапэ игупчэ щыкIогъэ зэха­хьэм тыхэлажьи, Абхъазым тежьэгъагъ.

Сыхъум Грузием идзэхэм аштагъ. Абхъаз хэгъэгур щымы­Iэжьэу грузин техакIохэм алъы­тэщтыгъ. Беданыкъо Нихьад къы­зэриIотэжьырэмкIэ, Кавказым ис лъэпкъхэм мамыр цIыфхэр заом имашIо къыхащыжьыщтыгъэх. Гудаутэ щырэхьатыгъэп, зэхахьэхэр щыкIощтыгъэх.

Абхъазым иапэрэ Президентэу Владислав Ардзинбэ зэIукIэм къыщиIуагъ: «Мэзым тыхэхьанышъ, партизанэу тязэощт. Ти­жъи, тикIи, тибзылъфыгъи тигъу­сэх».

Кавказым щыпсэурэ лъэпкъхэр зэкъоуцохи, Абхъазым ишъхьафитныгъэ фэзэуагъэх. 1993-рэ илъэсым Iоныгъо мазэм и 30-м текIоныгъэр къыдахыгъ.

Абхъазым имедалэу «За Победу» зыфиIорэр къызыфагъэшъо­шэгъэ гуфакIохэм ащыщ Беданыкъо Нихьад. Адыгеим икIыгъэ кIалэхэм лIыхъужъныгъэу Абхъа­зым щызэрахьагъэр гъашIэм щысэтехыпIэу щытиIэщт.

Сурэтым итхэр: Къуижъ Къэп­лъан апэрэ гуфакIохэм ащыщэу Беданыкъо Нихьад медалыр ретыжьы.