Iофыгъоу щызэрахьэхэрэм яшIуагъэкIэ Адыгеим эпидемиологиемкIэ изытет зыпкъ щеуцожьы, медицинэм иучреждениехэр ыпэкIэ Iоф зэрашIэщтыгъэхэм техьажьых. Адыгэ Республикэм и ЛIышъхьэ къыкIигъэтхъыгъ федеральнэ гупчэм иIэпыIэгъу мэхьанэу иIэм ыкIи пандемием илъэхъан IэпыIэгъу тедзэр игъоу зэрэщытыгъэм, медицинэ организациехэм къафатIупщыгъэри ахэтэу.

Джащ фэдэу шышъхьэIу мазэм и 12-м УФ-м и Правительствэ унашъо ышIыгъ Адыгэ Республикэм сомэ миллион 61,4-м ехъу къыфитIупщынэу. Ар мылъку IэпыIэгъу тедзэу медицинэ организациехэм агъэ­федэнэу къыдыхэлъытагъ ошIэ- дэмышIэ Iоф къызыщыхъурэ лъэхъаным е узхэу цIыфхэм япсауныгъэ егоон зылъэкIыщтхэм заушъомбгъуным ищынагъо зыщыщыIэм.

Мы унашъор ашIыгъ УФ-м и Федеральнэ ЗэIукIэ и Комиссиеу бюджет мылъкур зэрагощыщтым дэлажьэрэм къызэрахилъхьагъэмкIэ ыкIи УФ-м и Къэралыгъо Думэ Адыгеир къыщызыгъэлъэгъорэ депутатэу Владислав Резник иIэпыIэгъукIэ.

УФ-м и Премьер-министрэу Михаил Мишустиным Правительствэм изэхэсыгъо къызэрэщиIуагъэмкIэ, коронавирусым епхыгъэ гумэкIыгъом шIокI зимыIэ медицинэ ухъумэным ипшъэрылъхэр къыгъэхьылъа­гъэх. IэзапIэхэмрэ сымэджэщ­хэмрэ мылъкоу агъэкIодырэм хэхъуагъ зэпахырэ узыкIэм игъэхъужьын зэрэпылъхэм ыпкъ къикIэу, федэу къахьыжьырэми къыщыкIагъ зэшIуахыщтыгъэ IэпыIэгъур нэмыкI лъэныкъо­хэмкIэ къызэрэзэтырагъэуцуагъэм пае. Коронавирусым пэу­цужьыгъэным зиIофшIэн емыпхыгъэхэм ялэжьапкIи ащ нахь макIэ ышIыгъ. Мы узымкIэ сымаджэхэм ягъэхъужьын медицинэ учреждениехэм тырагъэ­кIуадэрэм ыкIи сымэджэщхэм ачIафэхэрэм узыкIэм икъыхэгъэщын зэрэзэшIуахыщтым мылъку IэпыIэгъу тедзэр апэIуа­гъэхьащт.

УФ-м и Правительствэ иIэпэчIэгъэнэ фонд къикIэу Адыгеим ибюджет мылъкур къи­хьащт. Нэужым республикэ бюджетым икIэу шIокI зимыIэ медицинэ ухъумэным ичIыпIэ фонд ибюджет ар фатIупщыщт. Сы­мэджэщхэмрэ IэзапIэхэмрэ зыпкъ итэу Iоф ашIэныр, врачхэмрэ нэмыкI IофышIэхэмрэ лэжьапкIэ ятыгъэныр ащ ишIуа­гъэкIэ зэшIохыгъэ хъущтых.

АР-м и ЛIышъхьэ ипресс-къулыкъу. Сурэтыр Н. Гусевам тыри­хыгъ.