Адыгэ Республикэм и ЛIышъхьэу КъумпIыл Мурат пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром инвест» зыфиIорэм икъутамэ ипащэу Денис Саврухиным видеоселектор шIыкIэм тетэу тыгъуасэ зэдэгущыIэгъу дыриIагъ. Тэхъутэмыкъое районым гъэстыныпхъэ шхъуантIэм ипсэуалъэхэр щышIыгъэнхэм иIофыгъу ары анахь шъхьаIэу щытыгъэр.

Iофтхьабзэм хэлэжьагъэх Адыгеим иминистрэхэм я Кабинет хэтхэр, компаниеу «Газпром инвестым» иподразделение зэфэшъхьафхэм ялIыкIохэр.

Шъугу къэдгъэкIыжьын, республикэм гъэстыныпхъэ шхъуантIэр IэкIэгъэхьэ­гъэ­ным ыкIи зищыкIагъэхэм ящэлIэгъэным хэхъоныгъэ ышIынымкIэ программэу 2016 — 2020-рэ илъэсхэм ателъыта­гъэм къыдыхэлъытагъэу газыр зыщызэбгыращырэ станциеу «Новый Сад» зыфиIо­рэмрэ къуаджэу Тэхъутэмыкъуаерэ поселкэу Яблоновскэмрэ якIолIэщт газрыкIуапIэмрэ ашIынхэу щыт. Джащ фэдэу псэупIэхэр зэзыпхыщтхэ газрыкIуапIэу «Щынджый — Натыхъуай —Красноармейскэр — Новомогилевскэр — Старомогилевскэр» зыфиIорэр агъэ­псынэу агъэнафэ.

Шъолъырыр инвестициехэмкIэ хъопсагъоу щытынымкIэ, анахьэу псэупIэхэм яшIынкIэ, мы проектхэм мэхьанэшхо зэряIэр Адыгеим и ЛIышъхьэ хигъэунэфыкIыгъ.

— ПАО-у «Газпромым» ипащэхэм мы IофыгъохэмкIэ зэдэгущыIэгъухэр адытиIагъэх. Непэ пшъэрылъышхо зэшIотхынэу къытпыщылъ — ыпэ титэу шъолъырым хэхъоныгъэ едгъэшIыныр. Къэралыгъо программэхэм, лъэпкъ проектхэм, джащ фэдэу республикэм социальнэ-экономикэ хэхъоныгъэ ышIыным иунэе программэ къадыхэлъыта­гъэу мы IофшIэныр тэгъэцакIэ. УФ-м и Правительствэ иунашъо диштэу унэе программэм епхыгъэ Iофтхьабзэхэр щыIэныгъэм щыпхырыщыгъэнхэр пшъэрылъ шъхьаI, — къыIуагъ КъумпIыл Мурат.

Республикэм ипащэ къызэрэхигъэщыгъэмкIэ, 2024-рэ илъэсым нэс телъытэгъэ унэе программэм Iофтхьэбзэ шъхьа­Iэу къыдыхэлъытагъэхэм ащыщ инфраструктурнэ пэрыохъухэр дэгъэзыжьы­гъэнхэр, ащ хэхьэ Тэхъутэмыкъое рай­онри. Непэрэ мафэм ехъулIэу муниципалитетым ит газ зэбгырыщыпIэ станциитфым технологическэу запыбгъэ­нэн плъэкIыщтэп.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз Майкоп» зыфиIорэм игенеральнэ пащэу Игорь Сырчиным къызэриIуагъэмкIэ, районым Iоф щызышIэрэ мыщ фэдэ станциищым атегъэуагъэр сыхьатым къыкIоцI кубометрэ мин 44-рэ мэхъу. Джыри тедзэу кубометрэ мин 25-рэ ящыкIагъ. Псэуалъэу «Новый Сад» зыфиIорэм иIофшIэн зыригъажьэкIэ мы гумэкIыгъор дэгъэзыжьыгъэ хъущт.

Денис Саврухиным къызэрэхигъэщыгъэмкIэ, ыпшъэкIэ зигугъу къашIыгъэ псэуалъэхэм япроектхэм ягъэхьазырын джырэ уахътэм дэлажьэх. ШIуагъэ къы­тэу программэр гъэцэкIэгъэным фэшI газрыкIуапIэхэр зытырашIыхьащтхэ чIыгу Iахьхэр зыехэм зэзэгъыныгъэхэр адашIынхэ фае.

АР-м экономикэ хэхъоныгъэмкIэ ыкIи сатыумкIэ иминистрэу Геннадий Митрофановым къызэриIуагъэмкIэ, мы IофшIэныр шIэхэу аухыщт.

Зэхэсыгъом зэфэхьысыжьхэр къыфишIыхэзэ, КъумпIыл Мурат пшъэрылъ къыгъэуцугъ мыщ фэгъэзэгъэ ведомствэхэмрэ муниципалитетымрэ Iоны­гъом и 15-м нэс гъэхьазырын IофшIэнхэр зэшIуахынхэу.

АР-м и ЛIышъхьэ ипресс-къулыкъу.