Бизнесым пылъхэмрэ социальнэ лъэныкъомкIэ лажьэхэу мысатыу организациехэмрэ зэпахырэ узхэр къэмыгъэхъугъэнхэм пае мылъкур афэтIупщыгъэнымкIэ лъэIу тхылъхэр заIахыхэрэ пIалъэм джыри зы мазэ афыхагъэхъоным тегъэпсыхьагъэу УФ-м и Правительствэ иунашъо ипроект УФ-м экономикэ хэхъоныгъэмкIэ и Министерствэ къыгъэхьазырыгъ.

Шъугу къэдгъэкIыжьын, бизнесым пылъхэмрэ социальнэ лъэныкъомкIэ лажьэхэу мысатыу организациехэмрэ апае дезинфекцие Iофтхьабзэхэм ыкIи коронавирусым пэшIорыгъэшъэу ебэныгъэным атегъэ­псыхьагъэу федеральнэ бюджетым къикIэу сомэ миллиард 20 афатIупщыгъагъ. Мы IэпыIэгъум итын бэдзэогъу мазэм и 15-м аублагъ. Шапхъэу щыIэхэм ялъытыгъэу мылъкур зытефэхэрэм мы илъэсым ишышъхьэIу мазэ и 15-м нэс лъэIу тхылъ ратын фэягъэ организациер е унэе предпринимателыр зыхэт хэбзэIахь къулыкъум — почтэмкIэ, Урысыем ихэбзэIахь къулыкъу исайт ищыкIагъэр щыритхэзэ е хэбзэ Iахьыр зытырэм иунэе кабинет ыгъэфедэзэ.

Ау экономикэр коронавирусым зызщиушъомбгъурэ лъэ­хъа­ным шъолъыр пстэуми зэфэдэу къащызэIуахыжьырэп. Апэрэ, ятIонэрэ е ящэнэрэ уцугъохэу пстэури къызызэIуа­хыжьыхэрэр зэлъытыгъэр санитарнэ-эпидемиологие шап­хъэ­хэу шъхьадж зынэсыгъэхэр арых, Роспотребнадзорым мы илъэсым ижъоныгъокIэ мазэ и 8-м къызэригъэнэфагъэмкIэ — N 3.1.0178-20.

Урысыем экономикэ хэхъоныгъэмкIэ и Министерствэ къы­зэритырэмкIэ, мы мазэм и 10-м ехъулIэу къэралыгъом исубъект 85-мэ ащыщэу 4-р пстэури къы­зэIуахыжьыным иапэрэ чэзыу хэтых, 51-р — ятIонэрэм, 30-р — ящэнэрэм къякIолIагъэх.

Шъолъырым иэкономикэ икъы­зэIухыжьын бизнесым иIоф­шIэн занкIэу зэрепхыгъэм ыкIи шъхьадж зиухъумэжьыныр къы­зэрэдыхэлъытагъэм апкъ къи­кIэу бюджетэу ащ фытегъэ­псыхьагъэр зэрагъэфедагъэр процент 50 ныIэп.

Пстэури къызэIуахыжьыныр шъолъыр хэхыгъэ пэпчъ зэре­лъы­тыгъэр къыдыхилъытэзэ экономикэ хэхъоныгъэмкIэ министерствэм лъэIу тхылъхэм ятын джыри мазэкIэ лъыгъэ­кIотэгъэн фаеу ылъытагъ — 2020-рэ илъэсым иIоныгъо мазэ и 15-м нэс.

IэпыIэгъур къызэратыщтхэр мысатыу организациехэу гъэсэныгъэмрэ социальнэ лъэныкъомрэ атегъэпсыхьагъэхэр, джащ фэдэу предпринимательствэ цIыкIум ылъэныкъокIэ лажьэхэу къушъхьэ-пцыкъо гъогу­уанэхэм апылъхэр, пляжхэмрэ хьакIэщхэу номери 100-м нахь мыбэу зиIэхэр е мы къыкIэлъы­кIорэ лъэныкъохэмкIэ ла­жьэ­хэрэр (ОКВЭД шъхьаIэмкIэ IэпыIэгъур атыщт): физкультурэмрэ спортымрэ, хьакIэщ хъызмэтыр, цIыфхэм ягъэшхэн, псэукIэ фэIо-фашIэхэр, гъэсэныгъэ тедзэ ягъэгъотыгъэныр. ЛъэIу тхылъым счетэу мылъкур къызэрыхьащтыр итхэгъэн фае. IофшIэгъу мэфи 3-м къыкIоцI ащ хэплъэщтых. Шапхъэу пылъ пстэури гъэцэкIагъэ зыхъукIэ, хэбзэIахьхэмкIэ федеральнэ къулыкъум мылъкур къафилъы­тэщт, Федеральнэ казначействэм ар афитIупщыщт. ЦIыфэу Iоф щызышIэрэ пчъагъэр хэбзэIахьхэмкIэ къулыкъум ыуплъэ­кIущт УФ-м ПенсиехэмкIэ ифонд IэкIэлъ къэбарым къыпкъырыкIызэ.

Сурэтыр зэIухыгъэ къэ­бар­лъыгъэIэс амалхэм къарытхыгъ.