Лъэпкъ проектэу «Культура» зыфиIорэм игъэцэкIэн къыхиубытэу 2019-рэ илъэсым къыщыублагъэу кино къызщагъэлъэгъорэ чIыпIэхэр лъэхъаным диштэу зэтегъэпсыхьэгъэнхэмкIэ къэралыгъо мылъку IэпыIэгъу ягъэгъотыгъэным тегъэпсыхьэгъэ зэнэкъокъум кином ифонд зэфэхьысыжьхэр фишIыгъэх.

Ахэм якIэуххэмкIэ муниципальнэ бюджет учреждениеу «Инэм къэлэ псэупIэм культурэмрэ киномрэкIэ и ГъэIорышIапI» зыфиIорэм сомэ миллиони 5 фатIупщыщт зы кино гъэлъэгъуа­пIэм изэтегъэпсыхьан пэIуагъэ­хьанэу.

Урысые Федерацием ипсэупIэхэм адэт кино гъэлъэгъуапIэхэм IэпыIэгъу ягъэгъотыгъэнымкIэ Урысые программэр 2015-рэ илъэсым къыщыублагъэу къэралыгъом щыпхыращы. Ар зытегъэ­псыхьагъэр нэбгырэ мин 500-м нэс зыдэс псэупIэхэм лъэпкъ фильмхэр къащагъэлъэгъон алъэкIыныр ары.

Программэр зыщыIэм къыщыубла­гъэу Адыгеим сомэ 30 000 000 зытефэ­гъэ кино гъэлъэгъопIи 6 къыщызэIуа­хыгъ.

Зэтырагъэпсыхьажьыгъэ кинозалхэм мэзищ къэс къащагъэлъэгъорэ кином ызыныкъо нахь мымакIэу зыубытыхэрэр тикъэралыгъо щытырахыгъэ­хэр арых.