Урысыем футболымкIэ иапшъэрэ куп хэт командэхэм 2020 – 2021-рэ илъэс ешIэгъур рагъэ­жьагъ.

Командэ 16 зэнэкъокъум хэлажьэ. Апэрэ зэIукIэгъухэм якIэуххэр зэтэгъапшэх.

«Химки» — ЦСКА — 0:2, «Тамбов» — «Ростов» — 0:1, «Уфа» — «Краснодар» — 0:3, «Спартак» — «Шъачэ» — 2:2, «Арсенал» — «Ахмат» — 0:0, «Урал» — «Динамо» — 0:2, «Ротор» — «Зенит» — 0:2, «Рубин» — «Локомотив» — 0:2.

Пчъагъэу 0:2-р гъогогъуи 4 зэIукIэгъухэм кIэух афэ­хъугъ, 0:1-у зы ешIэгъу аухыгъ, 0:3-у зы зэIукIэгъу дгъэунэфы­гъэр. ГъэшIэгъоныр якъалэхэм ащешIэгъэ командэхэм къэлапчъэм Iэгуаор зыкIи зэрэдамыдзагъэр ары. Къэлап­чъэм Iэгуаор дэзыдзэхэрэм ешIэгъур агъэдахэ, ау «Спартак» нэмыкI командэхэм къафэгумэкIыхэрэр агъэгушIонхэ алъэкIыгъэп.

Кабеллэ къыхахыгъ

«Краснодар» ешIэкIэ дахэ къалэу Уфа къыщигъэлъэ­гъуагъ. Р. Кабеллэ тIогъогогъо, М. Берг зэ хъагъэм Iэгуа­ор радзагъ. Вандерсон ухъумакIохэр ыгъэплъэхъухи, Iэгуа­ор Кабеллэ ылъэныкъокIэ ытыгъ. ЕшIэкIо пчъагъэ Кабеллэ ыпашъхьэ щытыгъэми, лъэшэу Iэгуаом еуи, хъагъэм ри­дзагъ. «Уфа» икъэлэпчъэIутэу А. Беленовым Iэгуа­ом зылъидзынэу игъо ифагъэп, нэплъэгъукIэ ыгъэкIотагъ.

Апэрэ зэIукIэгъухэр зэхэщакIохэм зэфахьысыжьыгъэх. Кабеллэ зэкIэми анахь дахэу къэлапчъэм Iэгуаор дидзагъэу къыхахыгъ.

«Спартак» игумэкIыгъохэр

«Спартак» «Шъачэ» дешIэзэ 2:0-у пчъагъэр текIоны­гъэр къыхьыщтыгъ. Соболевымрэ Ларссонрэ зырызэ къэлап­чъэм Iэгуаор дадзагъ. «Шъачэ» пенальтикIэ гъогогъуитIо хъа­гъэм Iэгуаор ридзи, 2:2-у зэIукIэгъур аухыгъ.

Судьяу Василий Казарцевым пенальтир, анахьэу ятIонэрэр, зэригъэунэфыгъэр хэукъоныгъэкIэ зэхэщакIохэм фалъытагъ. «Рубин» «Зенит» зыдешIэм, судьям пенальтир зэримыгъэунэфыгъэр тренер шъхьаIэу Леонид Слуцкэм къыIуагъ.

Шъыпкъэр зэдгъэшIэнэу тыфаемэ, ВАР-р упчIэжьэгъу ашIын, унэшъо тэрэз къыхахын зэрэфаер къыхэтэгъэщы.

ЦСКА-р дахэу «Химки» текIуагъ. Алан Дзагоевым хъагъэм Iэгуаор зэрэридзагъэм уеплъынкIэ гъэшIэгъоныгъ. А. Дзюбэ офсайдым итэу Iэгуаор дидзагъ.

ЧIыпIэхэр

1. «Краснодар» — 3 2. «Динамо» — 3 3. «Зенит» — 3 4. «Локомотив» — 3 5. ЦСКА – 3 6. «Ростов» — 3 7. «Спартак» — 1 8. «Шъачэ» — 1 9. «Арсенал» — 1 10. «Ахмат» — 1 11. «Тамбов» — 0 12. «Ротор» — 0 13. «Рубин» — 0 14. «Урал» — 0 15. «Химки» — 0 16. «Уфа» — 0.

Я 2-рэ ешIэгъухэр

14.08, 18:30 «Арсенал» — «Уфа» 14.08, 19:00 «Шъачэ» — «Химки» 14.08, 20:00 «Спартак» — «Ахмат» 15.08, 15:30 «Рубин» — «Урал» 15.08, 18:30 ЦСКА – «Тамбов» 15.08, 19:30 «Локомотив» — «Краснодар» 15.08, 20:30 «Ростов» — «Зенит».