Мэкъумэщ хъызмэтыр
Фэдэ къэмыхъугъэу
УФ-м мэкъу-мэщымкIэ иминистрэу Дмитрий Патрушевым тхьамэтагъор зыщызэрихьэгъэ зэхэсыгъом социальнэ мэхьанэ зиIэ мэкъумэщ продукциер ыкIи гъомылапхъэхэр уплъэкIугъэнхэм иIофыгъо щытегущыIагъэх.
Видеоконференцие шIыкIэм тетэу кIогъэ Iофтхьабзэм хэлэжьагъ АР-м мэкъу-мэщымкIэ иминистрэу Къуанэ Анзаур. Ар зипэщэ министерствэм къызэрэщытаIуагъэмкIэ, мэкъумэщ отраслэм иIофхэм, гъомылапхъэхэм ябэдзэршIыпIэ изытет ащ щытегущыIагъэх.
Мы лъэныкъомкIэ мыгъэ Адыгеим инэу зэрыгушхон иI. Фэдэ къыхэмыкIыгъэу лэжьыгъэ бэгъуагъэ республикэм щыIуахыжьыгъ. ПстэумкIи тонн мин 553-рэ мэхъу къаугъоижьыгъэр, зы гектарым, гурытымкIэ лъытагъэу, центнер 51,8-рэ къытыгъ. Аужырэ илъэс 20-р пштэмэ, ар анахь къэгъэлъэгъон ин.
Джащ фэдэу бжыхьэсэ рапс тонн мин 25,8-рэ пстэумкIи къаугъоижьыгъ. БлэкIыгъэ илъэсым егъэпшагъэмэ, ар тонн мин 12-кIэ нахьыб. Зы гектарым, гурытымкIэ лъытагъэу, центнер 25,4-рэ къырахыгъ. Ари 2019-рэ илъэсым ебгъапшэмэ, центнери 4,8-кIэ нахьыб.
Мы уахътэм тичIыгулэжьхэм 2021-рэ илъэсым Iуахыжьыщт бжыхьэсэ лэжьыгъэм ипхъын етIупщыгъэу зыфагъэхьазыры.
ЯIофхэм язытет зыщигъэгъозагъ
АР-м мэкъу-мэщымкIэ иминистрэу Къуанэ Анзаур блэкIыгъэ тхьамафэм Шэуджэн районым имэкъумэщ хъызмэтшIапIэхэм ащыщхэр къыкIухьагъэх.
ООО-у «Заря» зыфиIорэр поселкэу Заревом щэлажьэ. Адыгеим ихъызмэтшIэпIэ пэрытхэм ар ащыщ. ПстэумкIи чIыгу гектар 2181-у яIэм щыщэу бжыхьэсэ коцым 907-рэ рагъэубытыгъагъ, 194-м хьэр тырапхъэгъагъ. Ахэр Iуахыжьыгъахэх. Коцэу къуагъоижьыгъэр тонн 5442-рэ мэхъу, за гектарым, гурытымкIэ лъытагъэу, центнер 60 къырахыгъ. Хьэ тонн 1261-рэ къаугъоижьыгъ, ащ изы гектар, ари гурытымкIэ лъытагъэу, центнер 65-рэ къытыгъ. Ахэр зытырахыжьыгъэхэр къэкIощт илъэсым Iуахыжьыщтхэм афагъэхьазырых.
Джащ фэдэу гъатхэм халъхьагъэу лэжьыгъэ чылапхъэ ашIыщт натрыф гектар 243-рэ ыкIи тыгъэгъазэу 837-рэ яI. Ахэм ом зэхъокIыныгъэу фэхъугъэхэр ягоуагъэхэп, лэжьыгъэ бэгъуагъэ къатынэу щэгугъых.
Нэужым министрэр лым ыкIи щэм ахэшIыкIыгъэ гъомылапхъэхэм якъыдэгъэкIынкIэ мэкъумэщ кооперативэу «Деревенские сыры» зыфиIорэм щыIагъ. Ар къуаджэу Къэбэхьаблэ щызэхащагъ.
Министрэр ащ ипащэу Шъаокъо Аслъанчэрые IукIагъ, хъызмэтшIапIэм изегъэушъомбгъункIэ ищыкIагъэхэм, къэралыгъо IэпыIэгъоу къызIэкIигъэхьан ылъэкIыщтхэм зэдатегущыIагъэх.