2020-рэ илъэсым шышъхьэIум и 13-м къыщегъэжьагъэу и 15-м нэс шъолъыр фестиваль-зэнэкъокъоу «Теуцожь Цыгъо – Адыгеим инароднэ ашуг» зыфиIорэр Адыгеим щыкIощт. УсакIор къызыхъугъэр илъэси 165-рэ зэрэхъурэм Iофтхьабзэр фэгъэхьыгъ.

Фестивалым кIэщакIо фэхъугъэх Адыгэ Республикэм культурэмкIэ и Министерствэ, АР-м народнэ культурэмкIэ и Гупчэ ыкIи Теуцожь район администрациер.

Шъолъыр фестиваль-зэнэкъокъум хэлэжьэщтых Краснодар краим, Къэрэщэе-Щэрджэсым, Къэбэртэе-Бэлъкъарым ыкIи Адыгеим культурэмкIэ яучреждениехэм яорэдыIохэр, якъэшъуакIохэр, музыкальнэ Iэмэ-псымэхэм къязыгъа­Iохэрэр, усэ къеджэным фэкъу­лайхэр, нэмыкIхэри.

Зэнэкъокъум хэлажьэхэрэм лъэныкъуищкIэ уасэ афашIыщт: Теуцожь Цыгъо итхыгъэхэм (ежь фэгъэхьыгъэу) IупкIэу къяджэнхэр, усакIом ытхыгъэ­хэм атехыгъэ къэгъэлъэгъонхэр къа­шIынхэр, адыгэ тхакIохэм ятхыгъэхэм ыкIи адыгэхэм ямузыкальнэ фольклор афэгъэ­хьыгъэхэр, ижъырэ адыгэ орэдхэр, мэкъамэхэр шыкIэпщы­нэм, адыгэ пщынэм, къамылым ыкIи нэмыкI музыкальнэ Iэмэ-псымэхэм къарагъэIонхэр.

ШышъхьэIум и 13-м фестивалым хэлажьэхэрэм явидеотехыгъэхэр АР-м культурэмкIэ и Министерствэ ыкIи АР-м народнэ культурэмкIэ и Гупчэ яофициальнэ сайтхэм къарагъэхьащтых.

ШышъхьэIум и 14-м шъолъыр зэнэкъо­къум изэфэхьысыжьхэр ашIыщтых ыкIи ащ икIэуххэр культурэм епхыгъэ сайтхэм къарагъэхьащтых.

ШышъхьэIум и 15-м сыхьатыр 17-м Теуцожь районым ит къуаджэу Гъобэ­къуае Теуцожь Цыгъо имузей-унэу дэтым фестивалым текIоныгъэ къыщыдэзыхыгъэхэм щафэгушIощтых ыкIи зэнэкъо­къум хэлэжьагъэхэм апае Гала-концерт щыIэщт.