ШышъхьэIум и 6-м Федеральнэ Кадастрэ палатэр кIэщакIо зыфэхъугъэ игъэкIотыгъэ экологическэ Iофтхьабзэу «Сохраним родной край» зыфиIорэм республикэм и Кадастрэ палатэ иIофышIэхэр хэлэжьагъэх.

Учреждением иIофышIэхэм Мыекъуапэ щыпсэухэрэм нахьыбэу зызщагъэпсэфырэ чIыпIэр, псыхъоу Шъхьэгуащэ иIэгъо-благъохэр агъэкъэбзагъэх, хэкIыр аугъоигъ.

Iофтхьабзэм мурад шъхьаIэу иIагъэр чIыопс къэкIуапIэхэр къэухъумэгъэнхэ ыкIи тыкъэзыуцухьэрэ дунаим уфэсакъын зэрэфаер агурыгъэIогъэныр ары. Проектэу «Сохраним родной край» зыфиIорэр Кадастрэ палатэр илъэс 20 зэрэхъугъэм фагъэхьыгъ. Iофтхьабзэм хэлажьэх Урысыем ишъолъырхэм я Кадастрэ палатэхэм яIофы­шIэхэр.

«Тикъалэ ыкIи ащ къыпэгъу­нэгъу чIыпIэхэр къабзэу ыкIи гуIэтыпIэу щытынэу зэкIэми тыфай. Экологическэ акцием изэхэщэнкIэ, псыхъоу Шъхьэгуа­щэ рекIокIырэ нэпкъхэм ягъэ­къэбзэнкIэ тэри тиIахьышIу хэтшIыхьагъ», — къыIуагъ рес­публикэм и Кадастрэ палатэ ипащэ игуадзэу Нэхэе Мурат.

ЗэкIэмкIи Iофтхьабзэм учреж­дением иIофышIэ 30-м ехъу хэлэжьагъ. Палатэм и НыбжьыкIэ совет хэтхэм мы Iофтхьабзэм дырагъэштагъ ыкIи чанэу хэлэжьагъэх.

«Iофтхьабзэм тигуапэу тыхэ­лажьэ. Псыхъоу Шъхьэгуащэ инэпкъхэм ныбжьыкIэхэм защагъэпсэфынэу якIас, ренэу мы чIыпIэм тыкъэкIо ыкIи хэкIыр къэтымыгъанэу Iутэхыжьы. Тэгугъэ, щысэу къэдгъэлъэгъуа­гъэр нэмыкIхэми лъагъэкIотэнэу, тичIыопс къабзэу щытынымкIэ яшIуагъэ къагъэкIонэу, — еIо республикэм и Кадастрэ палатэ и НыбжьыкIэ совет итхьаматэу Шъхьэлэхъо Къэплъан.

Iофтхьабзэм хэлэжьагъэхэм псыхъоу Шъхьэгуащэ инэпкъхэр агъэкъэбзагъэх. Апч къутагъэ­хэр, бэшэрэб нэкIхэр ыкIи нэмыкI хэкIыр бэу къаугъоигъ.

Ведомствэм зэрилъытэрэмкIэ, чIыопсым узэрэфыщытым, ар къызэрэуухъумэрэм елъы­тыгъ цIыфым ипсауныгъэ изытет зыфэдэщтыр.

КIарэ Фатим.