ЯтIонэрэ чэзыум зыфагъэхьазыры
Адыгеим пчэныщэм икъэхьыжьын зыщегъэушъомбгъугъэным тегъэпсыхьэгъэ инвестпроектэу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Агрохолдинг Мирный» зыфиIорэм зэшIуихырэм иятIонэрэ чэзыу IофшIэн зыфэгъэхьазырыгъэным тегъэпсыхьэгъэ зэхэсыгъо тыгъуасэ зэхищагъ Адыгэ Республикэм и ЛIышъхьэу КъумпIыл Мурат.
Ащ хэлэжьагъэх Мыекъуапэ ипащэу Андрей Гетмановыр, АР-м мэкъу-мэщымкIэ иминистрэу Къуанэ Анзаур, зэфэшIыгъэ Iахьзэхэлъ хъызмэтшIапIэу «Птицефабрика Родниковская» зыфиIорэм ипащэу Маллах Винсент.
«Мэкъу-мэщым тегъэпсыхьэгъэ чIыгу щыIэныр — республикэм имэкъумэщ-къыдэгъэкIын лъэныкъо хэхъоныгъэ езыгъэшIыщт инвесторхэм якъещэлIэнкIэ мэхьанэшхо зиIэ Iофыгъохэм ащыщ. ТэркIэ апшъэр гектар пэпчъ шIуагъэ къытэу гъэлэжьэгъэныр, шъолъырым ибюджет федэ къыфегъэхьыгъэныр ары», — игущыIэ къыщыхигъэщыгъ КъумпIыл Мурат.
ЛIышъхьэм джащ фэдэу къыIуагъ пчэныщэм икъэхьыжьынкIэ инвестиционнэ проектышхом иятIонэрэ Iахь зэшIохыгъэным республикэм зызэрэщыфагъэхьазырырэр. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Агрохолдинг Мирный» зыфиIорэм ипащэхэм ащ сомэ миллиарди 2,7-рэ пэIуагъэхьанэу агъэнафэ. Пшъэрылъхэм ащыщых щэ къэзытыщт пчэнышъхьэ пчъагъэр мини 8-м нэгъэсыгъэныр ыкIи щэу къахьыжьыщтыр илъэсым тонн мини 6-м кIэгъэхьэгъэныр. Проектым изегъэушъомбгъун ыкIи Iусым иугъоижьын атегъэпсыхьагъэу хъызмэтшIапIэм чIыгу гектар 600-м ехъурэ псэуалъэхэмрэ чэтэхъо фабрикэм къыщищэфыжьынхэ гухэлъхэр щыIэх.
Шъугу къэдгъэкIыжьын, зигугъу тшIырэ инвестиционнэ проектым иапэрэ чэзыу ыкIэм фагъакIо. Урысые мэкъумэщ къэгъэлъэгъонэу «Дышъэ бжыхь-2019-рэ» зыфиIорэм щызэдашIыгъэгъэ зэзэгъыныгъэм къыхиубытэу инвестициеу къыхалъхьагъэм ипчъагъэ сомэ миллион 600-м ехъу. Илъэсым икъихьагъум компанием Мыекъопэ районым ит псэупIэу Трехречнэм фермэ щигъэпсыгъ, щэ бэу къэзыхьыжьырэ пчэн лъэпкъэу шъхьэ мин ащ чIигъэуцуагъ ыкIи илъэсым иящэнэрэ мэзищ джыри шъхьэ 500 къыщэнэу рехъухьэ.
«ХъызмэтшIапIэу «Агрохолдинг Мирный» зыфиIорэм инвестпроектэу щыIэныгъэм щыпхырищырэм тишъолъыркIэ мэхьанэшхо иI. Адыгеир УрысыемкIэ пчэныщэр анахьыбэу къызщахьыжьыхэрэм ащыщ хъуным гугъэпIэшIухэр къетых», — къыIуагъ КъумпIыл Мурат.
Ящэнэрэ чэзыум къыриубытэу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Агрохолдинг Мирный» зыфиIорэм щэ къэзытыщт пчэнышъхьэ пчъагъэр мин 24-м нигъэсын ыкIи щэ гъушъэу бэдзэрым лъэшэу къызщыкIэупчIэхэрэм икъэшIын зэтыригъэпсыхьан гухэлъхэр щыIэх.
АР-м и ЛIышъхьэ ипресс-къулыкъу