Шъолъырым ихэбзэ къулы­къухэм ыкIи муниципалитетхэм непэ апашъхьэ щыт пшъэ­рылъхэм ягъэцэкIэн, тапэкIэ анахьэу анаIэ зытырагъэтын фэе лъэныкъохэм атегущыIа­гъэх тыгъуасэ АР-м иминистрэхэм я Кабинет зэхэсыгъоу иIагъэм. Ащ тхьамэтагъор щызэрихьагъ Адыгеим и ЛIышъхьэу КъумпIыл Мурат. Iофтхьабзэм хэлэжьагъ АР-м и Къэралыгъо Совет — Хасэм и Тхьаматэу Владимир Нарожнэр.

Республикэм ипащэ кадрэхэм алъэныкъокIэ правительствэм зэхъокIыныгъэу фэхъугъэхэм къащыуцугъ. Шъугу къэдгъэ­кIыжьын, шышъхьэIум и 4-м Александр Наролиным премьер-министрэ IэнатIэр ежь ишIоигъоныгъэкIэ къыгъэтIы­лъыгъ нэмыкI IофшIапIэ зэрэ­Iухьэрэм ыпкъ къикIэу.

Зэхэсыгъом илъэхъан Адыгеим и ЛIышъхьэ Александр Наролиным рэзэныгъэ гущы­Iэхэр фигъэзагъэх шIуагъэ къы­тэу министрэхэм я Кабинет пэщэныгъэ зэрэдызэрихьагъэм фэшI. КъумпIыл Мурат къызэрэхигъэщыгъэмкIэ, А.Наролиным опытышхоу зэригъэгъотыгъэр нэмыкI IофшIэпIэ чIыпIэм – Адыгэ Республикэм ипредставительствэу Краснодар краим иадминистрацие ипащэ (игубернатор) дэжь щыIэм щигъэфедэщт.

— Уипсауныгъэ изытеткIэ ыкIи уишIоигъоныгъэкIэ премьер-министрэм иIэнатIэ къэбгъэтIылъыгъ, ау командэм укъыхэнэжьы. Лъэныкъо шъхьа­Iэу узфэгъэзэгъэщтхэм ащыщ Тэхъутэмыкъое ыкIи Теуцожь районхэм, Адыгэкъа­лэ япсэупIэхэр зэтегъэпсыхьэгъэнхэр, инвестициехэмкIэ мы чIыпIэхэр джыри нахь хъопсагъо хъунхэм Iоф дэшIэгъэныр, индустриальнэ паркэу «Яблоновскэр» гъэпсы­гъэныр. Хэ­хъо­ныгъэ тэзыгъэшIыщт проектхэм мыхэр ащыщых, рес­публикэмкIи мэхьанэшхо яI. ГъэIорышIэным ылъэныкъокIэ опытэу пIэкIэлъыр бгъэфедэзэ мы пшъэрылъхэр зэрэбгъэ­цэкIэщтхэм сицыхьэ телъ, — къыхигъэщыгъ КъумпIыл Мурат.

Джыри кадрэхэмкIэ зы унашъо зэрэщыIэр Адыгеим и ЛIышъхьэ къыIуагъ. Ежь ишIоигъоныгъэкIэ ыкIи пенсием зэрэкIуагъэм къыхэкIэу фи­нансхэмкIэ министрэу щытыгъэ Долэ Долэтбый иIэнатIэ Iу­кIы­жьыгъ. Илъэс пчъагъэхэм къа­кIоцI щытхъу хэлъэу финанс лъэныкъом пэщэныгъэ дызэрихьагъ.

— Уисэнэхьат хэшIыкIышхо фыуиIэу, пшъэдэкIыжьышхо пхьызэ уиIофшIэн зэрэбгъэцэкIагъэм ишIуагъэкIэ респуб­ликэм ибюджет системэ зыпкъ идгъэуцон, шъолъырым ежь ихахъохэр нахьыбэ тшIынхэ тфызэшIокIыгъ. Профессионал лъэшхэр зыхэт командэ бгъэпсын плъэкIыгъ. ТапэкIэ зетхьащт финанс политикэр ыкIи шъолъырым ифинанс документ шъхьаIэ епхыгъэ IофшIэныр дгъэцакIэхэ зыхъукIэ ведомствэм опытышхоу IэкIэлъыр къызфэдгъэфедэщт, — къыIуагъ республикэм ипащэ.

Александр Наролинымрэ Долэ Долэтбыйрэ гущыIэр заштэм илъэс пчъагъэхэм Iоф зыдашIэгъэхэ Адыгеим и ЛIышъхьэ, министрэхэм я Кабинет хэтхэм зэрафэразэхэр къаIуагъ. АР-м и Премьер-министрэ ыкIи финансхэмкIэ министерствэм ипащэ IэнатIэхэм аIухьащтхэр зэрагъэнэфэщтхэр КъумпIыл Мурат къыIуагъ. Ащ дакIоу джырэ уахътэм лъэпкъ проект­хэм, федеральнэ ыкIи республикэ программэхэм ягъэцэкIэн анахьэу анаIэ тырагъэтын зэрэфаер къэзэрэугъоигъэхэм къариIуагъ.

— Iофэу дгъэцакIэрэм зэ­фэхьысыжь дэгъу фэхъуным, ар цIыфхэм зэхашIэным фытегъэпсыхьагъ. Гъогу картэхэм къадыхэлъытэгъэ лъэныкъо пстэури зэшIотхыным тыпы­лъын фае. Ащ пае министрэхэм я Кабинет хэт нэбгырэ пэпчъ ипшъэрылъхэр зэрифэшъуашэу ыгъэцэкIэнхэм, хабзэм зыкIыныгъэ хэлъыным мэхьанэшхо иI, — къыхигъэ­щыгъ кIэухым КъумпIыл Мурат.

АР-м и ЛIышъхьэ ипресс-къулыкъу. Сурэтхэр А. Гусевым тырихыгъэх. ­